သျှမ်းပြည် လားရှိုးခရိုင် လားရှိုးမြို့နယ် နမ့်ပေါင်ကျေးရွာအုပ်စု ကုန်းဆုံကျေးရွာအနီး တိုက်ပွဲဖြစ်ပွားခဲ့ကြောင်း စုံစမ်းသိရသည်။

အဆိုပါ တိုက်ပွဲသည် ယမန်နေ့ (မတ် ၁၂) ရက် နံနက် ၆ နာရီခွဲ ဝန်းကျင်မှစတင်ကာ လားရှိုးခရိုင် လားရှိုးမြို့နယ် နမ့်ပေါင်ကျေးရွာအုပ်စု ကုန်းဆုံရွာ အနီးတွင် တိုင်းရင်းသား လက်နက်ကိုင် တပ်ဖွဲ့ များနှင့် စစ်ကောင်စီ တို့ ထိတွေ့တိုက်ပွဲ ဖြစ်ပွားခဲ့ခြင်း ဖြစ်ကြောင်း ဒေသခံများက သျှမ်းသံတော်ဆင့်ကို ပြောသည်။

“မနေ့က မနက် ၆ နာရီခွဲမှာ တိုက်ပွဲဖြစ်တာပါ။ စစ်ကောင်စီတပ်ဖွဲ့ နဲ့ တိုင်းရင်းသား လက်နက်ကိုင်တပ်ဖွဲ့တွေနဲ့ ဖြစ်တယ်လို့ သိရတယ်။ တိုက်ပွဲက တနာရီ လောက်ကြာတယ်” ဟု နမ့်ပေါင်ကျေးရွာအုပ်စုက အမည်မဖော်လိုသူ အမျိုးသား တစ်ဦးက သျှမ်းသံတော်ဆင့်ကို ပြောသည်။

တိုက်ပွဲဖြစ်ပွားမှုကြောင့် ကုန်းဆုံရွာအတွင်းသို့ လက်နက်ကြီး တလုံးကျရောက်ပေါက်ကွဲသည့် အတွက် ကုန်းဆုံရွာခံအပါအဝင် ဖာပလန်ရွာမှ ဒေသခံများက စစ်ရှောင်ထွက်ပြေးရကြောင်း လည်းသိရသည်။

“ကုန်းဆုံရွာထဲကို လက်နက်ကြီး တစ်လုံး ကျရောက်ပေါက်ကွဲတယ်၊ ထိခိုက်မှုတော့ မရှိဘူး၊ ဒေသခံတွေက နားယရွာ ဘက်ကို စစ်ရှောင်ထွက်ပြေးသွားရတယ်၊ စစ်ရှောင် ဦးရေကိုတော့ မသိရသေးဘူး” ဟု အထက်ပါ အမျိုးသားက ဆက်ပြောသည်။

အဆိုပါ ထိတွေ့တိုက်ပွဲ ဖြစ်ပွားသည့် နယ်မြေအတွင်းတွင် မြောက်ပိုင်း မဟာမိတ် ၃ ဖွဲ့ တပ်ဖွဲ့ဝင်များ ဖြစ်ကြ သည့် ကိုးကန့်တပ်မတော် MNDAA၊ တအာင်း (ပလောင်) အမျိုးသားလွတ်မြောက်ရေးတပ်မတော် TNLA ၊ ရက္ခိုင့် တပ်မတော် AA တပ်ဖွဲ့နှင့် သျှမ်းပြည် တပ်မတော် SSPP/SSA တို့က သွားလာလှုပ်ရှားနေကြကြောင်း သိရသည်။

ပြီးခဲ့သည့် မတ်လ ၁၁ ရက်တွင်လည်း လားရှိုးခရိုင်ရှိ မိုင်းရယ်အတွင်း အာဏာသိမ်း စစ်ကောင်စီတပ်ဖွဲ့သည် ရှမ်းပြည် တိုးတက်ရေးပါတီ၊ ရှမ်းပြည်တပ်မတော် SSPP/SSA နှင့်လည်း ထိတွေ့တိုက်ပွဲ ဖြစ်ပွားခဲ့သည်။

အာဏာသိမ်း စစ်ကောင်စီ တပ်ဖွဲ့သည် ၂၀၂၃ ခုနှစ် ဇန်နဝါရီလ ၁ ရက်မှ စပြီး ဒီဇင်ဘာ (၃၁) ရက်ထိ တစ်နှစ်ကြာ အပစ်ရပ် ကြေညာထားသော်လည်း စစ်ကောင်စီတပ်၏ တိုင်းရင်းသား ဒေသများထံ တိုက်လေယာဥ် ဖြင့် ထိုးစစ်ဆင်မှု နှင့် စစ်မြေပြင် ထိတွေ့တိုက်ပွဲများ ဆက်လက် ဖြစ်ပွားနေဆဲ ဖြစ်သည်။