သျှမ်းပြည် ကျောက်မဲခရိုင် ကျောက်မဲမြို့နယ် ဝမ့်မိုင်ကျေးရွာ စစ်ရှောင် အမျိုးသားတစ်ဦးသည် ယာဉ်တိုက်ခံထားရပြီး ခွဲစိတ်ကုသရန် အကူညီ လိုအပ်နေကြောင်း စုံစမ်းသိရှိရသည်။
ဆိုင်ကယ် တိုက်ခံထားရသည့် အသက် ၅၅ နှစ် လုံးအောင်ဆာသည် ဦးခေါင်းကွဲ နှင့် ခြေထောက်တစ်ဖက်ကျိုး ဒဏ်ရာရရှိခဲ့ကာ သီပေါဆေးရုံ၌ ဆေးဝါး ကုသခံယူနေရပြီး လာမည့် (မတ်လ ၁၁ ရက်) တွင် ခွဲစိတ်ကုသရမည်ဖြစ်ကာ ငွေရေးကြေးရေး အခက်ခဲရှိနေသဖြင့် အကူညီ လိုအပ်နေကြောင်း စစ်ရှောင်ကူညီသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ ဆိုင်ကယ်တစ်စီးက သူ့ကိုတိုက်ပြီး ထွက်ပြေးသွားတယ်။ ဖြစ်တဲ့ရက်က သူတောင် အခင်းမှာ မေ့လဲသွားတာ။ ဦးခေါင်းကွဲပြီး ခြေထောက်ပါ ကျိုးသွားတယ်။ အခု ခွဲစိတ်ရမယ်လို့ ဆရာဝန်တွေကပြောတယ်။ သူတို့က စစ်ရှောင်တွေဖြစ်တော့ ခွဲစိတ်ကုသဖို့ ပိုက်ဆံမရှိဘူး။ အကူညီ လိုအပ်နေတယ် “ ဟု ၎င်းက ပြောသည်။
လုံးအောင်ဆာသည် ပြီးခဲ့သည့် (မတ်လ ၇ ရက်) ညနေ ၈ နာရီအချိန် ဝမ်မိုင်ကျေးရွာ လမ်းဆုံအနီးတွင် လမ်းလျှောက်သွားနေစဉ်အတွင်း ဆိုင်ကယ် တိုက်ခံရကြောင်း သိရသည်။
ထို့အပြင် ဒေသခံများသည် ယာဉ်စည်းကမ်း၊ လမ်းစည်းလမ်း နှင့် ပတ်သက်၍ လိုက်နာမှု မရှိခြင်းကြောင့် တစ်လအတွင်းမှာ ယာဉ်တိုက်မှုပေါင်း (၂၀) ကြိမ် ဖြစ်ပွားနေကြောင်း လူမှုကူညီရေး အသင်းထံမှ သိရသည်။
