“ ရှင်းရှင်းပြောပါ..ကျယ်ကျယ်ပြောပါ၊ ဒုက္ခသည်များကို ကြိုဆိုကြပါ..၊ ရွှေ့ပြောင်းအလုပ်သမားများကို ကြိုဆိုကြပါ..၊ အမျိုးသမီးများကို ကြိုဆိုကြပါ “ ဆိုပြီး ထမီအလံကိုင်ဆောင်ကာ ဟော်ဟစ် တောင်းဆိုခဲ့သည်။

ယမန်နေ့ မတ် (၈) ရက် အပြည်ပြည်ဆိုင်ရာ အမျိုးသမီးများနေ့ အထိမ်းအမှတ်အနေဖြင့် ထိုင်းနိုင်ငံ ချင်းမိုင်မြို့တွင် မြန်မာရွှေ့ပြောင်းအလုပ်သမားများ၊ ထိုင်းရောက် ပြည်သူများနှင့် ထိုင်းနိုင်ငံရှိ အမျိုးသမီးအဖွဲ့များတို့ ပူးပေါင်းပြီး ချီတက်ပွဲ ပြုလုပ်ခဲ့သည်။

လမ်းမ ချီတက်ပွဲကို ယမန်နေ့ (မတ်လ ၈ ရက်) ညနေပိုင်း ၅ နာရီခွဲ အချိန်ကစပြီး ချင်းမိုင် Practice Center near Nawarat Bridge ကနေ Tha Pae Gate အထိ အမျိုးသမီးများ အပါအဝင် အမျိုးသားများ ၊ LGBT များက ထမိန်အလံများ ထူ၍ လမ်းမပေါ်၌ ချီတက်ပွဲကို ကျင်းပပြုလုပ်ခဲ့သည်။

ချီတက်ပွဲတွင် လူဦးရေ စုစုပေါင်း ၃၀၀ ကျော်က ပါဝင်ပူးပေါင်းခဲ့ကြသည်။

“ ကျမတို့က အမျိုးသမီးလို့ ပြောလိုက်ပြီဆိုရင် အမျိုးသမီးမှာ မတူညီတဲ့ အရာတွေရှိတယ်။ အမျိုးသမီး ဖြစ်တည်တဲ့ အပေါ်မှာ ကြုံရတဲ့ စိန်ခေါ်ချက်တွေ၊ ပိုပြီးတော့ တွေ့ကြုံရတဲ့ အခက်ခဲတွေ ရှိတယ်။ ရွှေ့ပြောင်း အလုပ်သမား အမျိုးသမီးတွေမှာလည်း အခက်ခဲတွေ အများကြီးရှိတယ်။ လူ့အခွင့်အရေး ချိုးဖောက်ခံရတာတွေ၊ ကာကွယ်ပေးခြင်း မခံရတဲ့ ဟာမျိုးတွေ၊ ကျမတို့က ရွှေ့ပြောင်းအလုပ်သမားဖြစ်တဲ့အတွက် အထောက်ထား နဲ့ မလုပ်နိုင်တဲ့ချိန်မှာ အလုပ်ရှင်ကဖြစ်စေ၊ အုပ်ချုပ်ရေးကနေဖြစ်စေ ခွဲခြားဆက်ဆံခံရတာတွေ အများကြီးရှိတယ်။ ဒါကြောင့် အမျိုးသမီးအပေါ် ဒါမျိုးတွေ မလုပ်ဖို့ ကြိုဆိုပေးဖို့ ကြွေးကြော်ချက်တွေက အရေးကြီးတယ် “ ဟု ထိုင်းရောက် မြန်မာအမျိုးသမီး မအယ်လီနာက ပြောသည်။

အဆိုပါ အမျိုးသမီးများနေ့ကို မြန်မာအမျိုးသမီးများအဖွဲ့ချုပ် (WLB)၊ MAP Foundation၊ HRDF၊ Education Foundation၊ Asia Pacific Forum on Women, Law and Development စသည့်ဖြင့် အဖွဲ့အစည်း စုစုပေါင်း ၁၉ ခုက ပူးပေါင်းစီစဉ်ခဲ့ကြောင်း သိရသည်။

လမ်းမပေါ် ချီတက်ပွဲထဲက တောင်းဆိုချက် ဆောင်ပုဒ်များမှာ “ အမျိုးသမီးများ ငြိမ်းချမ်းရေး နှင့် လုံခြုံရေးရဖို့ ပြောင်းလဲမှု အတွက်ရဲရင့်စို့” “ အမျိုးသမီးများသည်လည်း အမျိုးသားများနှင့် တန်းတူအခွင့်အရေး ရှိရမည်။ ခွဲခြားနှိမ်ချခြင်း ရပ်တန့်ပါ “ ဆိုပြီး တောင်းဆိုကြသည်။

အလားတူ အမျိုးသမီးများနေ့ ချီတက်ပွဲတတ်ရောက်လာသူ မြန်မာရွှေ့ပြောင်းအလုပ်သမား အမျိုးသမီးတစ်ဦးက “ ကျမက အမျိုးသမီးတစ်ယောက် ဖြစ်တဲ့အတွက် အလုပ်ခွင်မှာဆိုရင် အမျိုးသားတွေထက် လစာဘယ်တော့မှ ကောင်းကောင်းမရပါဘူး။ အမျိုးသားတွေက သစ်ပင်ပေါ်ကို တက်တတ်လို့၊ အလုပ်ကြမ်း လုပ်ရလို့ ကျမမှာ အလုပ်ကြမ်း မလုပ်နိုင်တဲ့အတွက် လစာဆိုရင် အမျိုးသားတွေထက် လျှော့ပြီးပေးတယ်။ ကျမတို့မှာလည်း ကျမတို့ အလုပ်ရှိတယ်။ အုတ်တချက်ကို အမျိုးသားတွေ”မ”နိုင်သလို ကျမတို့လည်း “မ”နိုင်ပါတယ်။ ကျမတို့မှာ သူတို့ထက် အလုပ်ပိုပါတယ်။ အိမ်ထောင်ရေး၊ စားဝတ်နေရေးအကုန် ကျမတို့အမျိုးသမီးတွေ လုပ်ရတယ်။ ကျမ တောင်းဆိုချင်တာတော့ ကျား – မ တန်းတူညီမျှမှုပေးဖို့၊ အလုပ်ခွင်မှာ ကျား – မ တန်းတူလစာပေးဖို့ ထိုင်းဝန်ကြီးတွေကို တောင်းဆိုချင်ပါတယ်” ဟု ၎င်းက တောင်းဆိုသည်။

ချီတက်ပွဲအပြီးတွင် Tha Pae Gate တွင် ကျား – မ တန်းတူညီမျှမှု ဟောပြောပွဲများ၊ အမျိုးသမီးများ အနေဖြင့် တောင်းဆိုချင်သော တောင်းဆိုချက်များ၊ “ ဖိုဝါဒ လွှမ်းမိုးသော စကားဝိုင်း “ ဓာတ်ပုံများ၊ မြန်မာ့ရိုးရာ အကများနှင့် သရုပ်ဖော်ပွဲများကိုလည်း ကျင်းပပြလုပ်ခဲ့သည်။

ထို့အပြင် မြန်မာနိုင်ငံ အရေးအခင်းမှာလည်း အမျိုးသမီး ပါဝင်မှုကို မေ့ထားလို့ မရကြောင်း၊ မည်သည့် နေရာမဆို အမျိုးသမီးပါဝင်မှုက အရေးကြီးကြောင်း ထိုင်းရောက် မြန်မာအမျိုးသမီး မအယ်လီနာက ထပ်တောင်းဆိုသည်။

“တန်းတူညီမျှ ဖက်ဒရယ် အရေးမှာ အမျိုးသမီးပါဝင်ရေးကို တောင်းဆိုခဲ့တယ်။ အခု မြန်မာ့အခင်းအကျင်းမှာ တန်းတူညီမျှသွားချင်တယ်။ ဖက်ဒရယ် သွားချင်တယ်ဆိုတဲ့ ဒီလှုပ်ရှားမှုမှာ အမျိုးသမီး ပါဝင်မှုတွေ မေ့ထားလို့မရဘူး။ တန်းတူညီမျှမှုလို့ ပြောရင် လူတိုင်း တန်းတူညီမျှရမယ်။ အမျိုးသမီး၊ အမျိုးသားအတွက် အကုန်လုံး တန်းတူညီမျှရှိရမယ်လို့ တောင်းဆိုချင်ပါတယ် “ ဟု ၎င်းက ပြောသည်။

ကမ္ဘာ့ကုလ သမဂ္ဂအဖွဲ့ က ၁၉၇၅ ခုနှစ်၊ မတ်လ (၈) ရက်နေ့ကို “ အပြည်ပြည်ဆိုင်ရာ အမျိုးသမီးများနေ့” အဖြစ် တရားဝင်အသိအမှတ်ပြုခဲ့ပြီး နှစ်စဉ် မတ်လ ၈ ရက်နေ့သည် အပြည်ပြည်ဆိုင်ရာ အမျိုးသမီးများနေ့ဖြစ်ပြီး ကမ္ဘာ့တဝှမ်းလုံးတွင် အမျိုးသမီး အခွင့်အရေး နှင့် ကျား – မ တန်းတူညီမျှရေးတို့အတွက် အသိအမြင် မျှဝေရေး လှုပ်ရှားမှုများကို နှစ်စဉ် ကျင်းပလေ့ရှိသည်။