ထိုင်းနိုင်ငံ မြန်မာသံရုံးမှ နိုင်ငံကူးလက်မှတ်စာအုပ် သက်တမ်းတိုးသည့် အခကြေးငွေကို တိုးမြှင့်ကောက်ယူ လိုက်သောကြောင့် မြန်မာလုပ်သားများ ယခင်ထက် ပိုခက်ခဲလာကြောင်း သတင်းသိရသည်။

PJ နိုင်ငံကူးလက်မှတ် အသစ်ပြုလုပ်မည့်သူများ (သက်တမ်းတိုး) ကို မြန်မာသံရုံးမှ ယခင်က စာအုပ်အခကြေးငွေ (၈၀၀) ဘတ် (အစား) ၁၂၅၀ ဘတ်နှုန်းအထိ တိုးမြှင့်ကောက်ယူခြင်း နှင့် OWIC ကဒ်ကို ၂၅၀ ဘတ်ဆိုပြီး စုစုပေါင်း ၁၅၀၀ ဘတ်အထိ တိုးမြှင့်ကောက်ယူ လာခြင်းကြောင့် ထိုင်းရောက် မြန်မာလုပ်သားများမှာ ပိုမိုခက်ခဲလာနေကြောင်း ပတ်စပိုစ့် လုပ်ဆောင်နေသူ စိုင်းမိန်းခွမ်း (အမည်လွှဲ) ပြောသည်။

အဆိုပါ စာအုပ် အခကြေးငွေကို မတ်လ ၃ ရက်မှစပြီး တိုးမြှင့်ကောက်ယူမည် ဖြစ်ကြောင်း မြန်မာသံရုံးမှ ပြီးခဲ့သည့် ဖေဖော်ဝါရီ ၂၆ ရက်နေ့တွင် ထုတ်ပြန်ထားသည်။

“အခု ကျနော်တို့ ပတ်စပိုစ့် လုပ်ဖို့ အရမ်းခက်ခဲနေတယ်။ ထိုင်းနိုင်ငံကို အခုမှ စရောက်တဲ့သူဆို ဘာမှန်းမသိ၊ ထိုင်းဘက်ကတော့ ဖွင့်ပြီး ပတ်စပိုစ့် လုပ်ပေးနေတယ်။ ပတ်စပိုစ့်က လုပ်လို့ မပြီးမစီး နဲ့ သက်တမ်းက ထပ်တိုးရပြီ။ စာအုပ်တွေက ဘာမှမရလာသေးဘူး ထပ်ပြီး သက်တမ်းတိုးနေရတာ။ ရလာတော့လည်း စာရွက်စာတမ်းတစ်ခုထဲ ဘာမှ မရလာသေးဘူး။ အခုထပ်ပြီး ဈေးက ထပ်တက်ပြန်ပြီ ဘာကိုမှ အဆင်မပြေနေဘူး“ ဟု စိုင်းမိန်းခွမ်းက ပြောသည်။

လက်ရှိ ထိုင်းနိုင်ငံအတွင်းသို့ စတင်ရောက်ရှိလာကြသည့် မြန်မာလုပ်သားများသည် ထိုင်းဘာသာ အခက်အခဲကြောင့် မြန်မာသံရုံး၌ ကိုယ်တိုင် သွားရောက်လုပ်ကိုင်ဆောင်ရွက်ရန် ခက်ခဲနေကြောင်း သိရသည်။

ထို့ကြောင့် ပွဲစားထံမှ လုပ်ဆောင်ရသဖြင့် ကုန်ကျစရိတ်များပြားပြီး ယခုလို ဈေးနှုန်းတိုးမြှင့် လိုက်သည့်အခါ ပိုမိုအခက်ခဲ ကြုံနေရကြောင်း ထိုင်းရောက် မြန်မာလုပ်သား ခွန်ဟန်စိုးက ပြောသည်။

“ ကုန်ကျ စရိတ်သက်သာအောင် ကိုယ်တိုင်သွားလုပ်မယ်ဆိုတော့လည်း ကျနော်တို့က အခုမှ ထိုင်းရောက်တာ ထိုင်းစကားကမတတ်ဘူး။ အခုက မရှိလို့ ထိုင်းလာပြီး အလုပ်လုပ်ပါတယ်ဆိုနေမှ သူတို့ကို တဖန် ပြန်လုပ်ကျွေးနေရတယ်။ ပတ်စပိုစ့် ဖိုးနဲ့တင် တော်တော်မွဲနေပြီ။ ဈေးတက်သွားတော့ ကျွန်တော်တို့က ဘာတတ်နိုင်မှာလဲဗျာ။ ပတ်စပိုစ့် ရဖို့ အဓိကလေ ကျသလောက် ပေးရတာပေါ့ “ ဟု ၎င်းကပြောသည်။

အလားတူ ပတ်စပိုစ့် ဆောင်ရွက်ပေးနေသူ စိုင်းဟိန်း (အမည်လွှဲ) က “ အခု သူတို့ သက်တမ်းတိုးပေးနေတဲ့ နည်းက မဟုတ်သေးဘူး။ ပတ်စပိုစ့် အမျိုးအစား အမျိုးမျိုးကို ဒီ ၂ လပိုင်း ၁၃ ရက်အထိဘဲ တိုးပေးတာ။ လူက အများကြီးကို တစ်ခါတည်း သက်တမ်းအတူကုန်၊ တစ်ခါတည်း သက်တမ်းအတူတိုးမယ်ဆိုရင် မဖြစ်နိုင်ဘူးလေ။ လူဦးရေ သန်းနဲ့ချီကို တစ်ခါတည်း လုပ်ဖို့ခက်တယ်။ အချိန်ကြာတယ်“ ဟု ၎င်းက ပြောသည်။

ထို့အပြင် နိုင်ငံကူးလက်မှတ် (PJ) စာအုပ် သက်တမ်းကုန်မည့် အလုပ်သမားအတွက် ဖေဖော်ဝါရီလမှ မေလ အထိ ၃ လ ဆက်လက်နေထိုင် အလုပ်လုပ်ခွင့်ပြုခဲ့ပြီး မေလ ၁၃ ရက် နောက်ဆုံးထား သက်တမ်းတိုးရမည်ဖြစ်ကြောင်း မြန်မာသံရုံးမှ ကြေညာထားသည်။

အချိန်ကာလ ၃ လ အတွင်း သက်တမ်းတိုးရမည့် အလုပ်သမား အရေအတွက်မှာ ၂ သန်းကျော် ရှိနေကြောင်း ထိုသို့ အချိန်မီ သက်တမ်း မတိုးပြီးနိုင်မည်ကို အလုပ်သမားများအနေဖြင့် စိုးရိမ်နေလျက်ရှိကြောင်း သိရသည်။