သျှမ်းပြည် လွိုင်လင်ခရိုင် ပင်လုံမြို့ အမှတ် (၁) ရပ်ကွက်တွင် လျှပ်စစ်မီးမှတစ်ဆင့် ရှော့ခ်ဖြစ်ပြီး နေအိမ်နှစ်လုံး မီးလောင်ပြာကျမှု ဖြစ်ပွားခဲ့ကြောင်း သတင်း သိရှိရသည်။
ယမန်နေ့ မတ်လ ၂ ရက် မနက်ပိုင်း ၉ နာရီ အချိန်မှ စတင်ပြီး ပင်လုံမြို့ အမှတ် (၁) ရပ်ကွက်ရှိ နေအိမ်တစ်လုံးသည် လျှပ်စစ်ထမင်းအိုး သယ်ထားရာမှ တစ်ဆင့် ရှော့ခ် ဖြစ်ပြီး မီးလောင်မှုဖြစ်ပွားခဲ့ကာ ၎င်းအနီးနားရှိ နေအိမ်တစ်လုံးလည်း မီးလောင်ပြာကျမှု ဖြစ်ပွားခဲ့ကြောင်း ပင်လုံမြို့ ရပ်ကွက် (၁) အုပ်ချုပ်ရေးမှူးက သျှမ်းသံတော်ဆင့်ကို ပြောသည်။
“ အိမ်ရှင်က ထမင်းအိုး သယ်ထားပြီး ခြံသွားတာလို့တော့ ပြောတယ်။ ခလုတ်လည်း မပိတ်ထားရတော့ ခြံသွားတဲ့အချိန်မှာ မီးလောင်သွားတာပေါ့။ ရိုးရိုး ထင်း နဲ့ ထမင်းသယ်ထားရင်တော့ ဘာမှမဖြစ် လောက်ပါဘူး။ အခုက လျှပ်စစ်အိုးတွေဆိုတော့ အိုးထဲက ရေတွေခန်းသွားရင် မရတော့ဘူး။ အိုးအပူလွန်ပြီး မီးလောင်သွားတာ” ဟု ရပ်ကွက် အုပ်ချုပ်ရေးမှူးက ပြောသည်။
အဆိုပါ မီးလောင်မှုကြောင့် နေအိမ်နှစ်လုံး မီးလောင်ပြာကျမှု ဖြစ်ပွားပြီး ပျက်စီးဆုံးရှုံးမှုမှာ ကျပ်ငွေ ၂၈ သိန်း ပမာဏရှိကြောင်း သိရသည်။
ထို့အပြင် မီးလောင်မှု နှင့် ပတ်သက်ပြီး ပြည်သူများအနေဖြင့် ဟောင်းနွမ်းနေသော လျှပ်စစ်ဝါယာကြိုးများ၊ မီးခလုတ်များကို အသုံးမပြုရန် နှင့် မီးလောင်လွယ်သည့် ပစ္စည်းများကို မသိမ်းထားရန် ၎င်းက တိုက်တွန်းထားသည်။
“ လူတွေက အကြောင်း အမျိုးမျိုးကြောင့် အခက်ခဲတော့ ရှိတာပေါ့နော်။ လျှပ်စစ်ဝါယာ အဟောင်းတွေ မလဲနိုင်တာတို့၊ မဝယ်တာတို့ပေါ့။ တစ်ခါတလေ ဝါယာကြိုးတွေက အရမ်းဟောင်းပြီဆိုရင် လဲသင့်ရင် လဲရတော့မယ်။ ပြီးတော့ အိမ်ကိုသန့်ရှင်းအောင်လုပ်သင့်တာလုပ်ပေါ့နော်။ မီးလောင်လွယ်တဲ့ဟာတွေဆို ရှင်းသင့်တာ ရှင်းရမယ်။ ဒါမှ မီးလောင်တာ မဖြစ်ဘူး၊ မီးမကူးတာ မဖြစ်တော့ဘူး “ ဟု ၎င်းက ထပ်လောင်းပြောသည်။
စစ်တပ်က အာဏာသိမ်းပြီးနောက်ပိုင်း သျှမ်းပြည်တွင်း လျှပ်စစ်မီး ပုံမှန်လာခြင်း မရှိသေးသလို လျှပ်စစ်ဗို့အားမှာလည်း အနိမ့်၊ အမြင့် ပုံမှန်လာခြင်း မရှိသဖြင့် လျှပ်စစ်ဝါယာကြိုးမှ တစ်ဆင့် ရှော့ခ်ဖြစ်ရာ မီးလောင်မှု ဖြစ်ပွားနေကြောင်း သိရသည်။
