Sunday, May 26, 2024

မိုင်းယော်တိုက်နယ်အတွင်း ရွာသစ်တည် အခမ်းအနား စစ်ကောင်စီ လက်နက်ကြီးဖြင့် ပစ်ခတ်

Must read

သျှမ်းပြည် လားရှိုးမြို့နယ် မိုင်းယော်တိုက်နယ်အတွင်းတွင် ဒေသခံများ ရွာသစ်တည် အခမ်းအနား ပြုလုပ်ကျင်းပနေစဥ် စစ်ကောင်စီတပ်မှ လက်နက်ကြီးများဖြင့် ပစ်ခတ်ခဲ့ကြောင်း စုံစမ်းသိရသည်။

မိုင်းယော်မြို့နယ်

ယမန်နေ့ (မတ်လ ၁ ရက်) တွင် လားရှိုးမြို့ အခြေစိုက် စစ်ကောင်စီ ၆၈ တပ်ရင်းမှ မိုင်းယော်တိုက်နယ် ပန်ခုတ် – လွယ်လျန်ကျေးရွာအနီး ရွာသစ်တည်နေသည့် အခမ်းအနားဘက်သို့ လက်နက်ကြီးဖြင့် ပစ်ခတ်ခဲ့ကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

“အရင်က ပန်လော့ ၊ လွယ်ကျန်း နဲ့ နမ့်ဆန် တောင်ပေါ်ဘက် ရှိနေတဲ့ တအာင်း (ပလောင်) လူမျိုးတွေက အခု ဒီမြေပြန့် ဒေသဘက်ကို ပြောင်းလာနေကြတာ၊ မနေ့က ရွာသစ်တည် အခမ်းအနားပွဲ လုပ်နေကြတဲ့ အချိန်မှာ စစ်ကောင်စီကနေပြီးတော့မှ လက်နက်ကြီးနဲ့ကျတာ၊ ရွာပြင်မှာကျတာပေါ့၊ ထိခိုက်မှုတော့ မရှိဘူး” ဟု မိုင်းယောက်တိုက်နယ်မှ အမည်မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

စစ်ကောင်စီ ၆၈ တပ်ရင်းမှ လက်နက်ကြီးဖြင့် ၈ ချက်ထက်မနည်း ပစ်ခတ်ခဲ့ခြင်းဖြစ်ကြောင်း ဒေသခံများက ပြောသည်။

လက်ရှိ ရွာသစ်တည်နေသည့်နေရာသည် လွယ်ခေါ် နှင့် လုံမွန်းရွာ တို့နှင့်လည်း နီးစပ်နေသည့်အတွက် ဒေသခံများက စိုးရိမ်ကြောက်လန့်နေကြကြောင်းလည်း သိရသည်။

“အခုလိုမျိုး တအာင်း (ပလောင်) လူမျိုးတွေ ရွာသစ်တည်နေတာ သတင်းရလို့ စစ်ကောင်စီဘက်က လက်နက်ကြီးနဲ့ ပစ်တာလို့တော့ သိရတယ်၊ အဲ့နေရာကို ဦးတည်ပြီး ပစ်ပေမယ့် အနီးပတ်ဝန်းကျင်မှာ ရှိတဲ့ ရွာတွေကလည်း ကြားရတော့ ကြောက်ကြတယ်၊ စစ်ကောင်စီက ဘာကြောင့် ပစ်တာလဲတော့ မသိရဘူး” ဟု အထက်ပါ ရွာခံက ဆက်ပြောသည်။

ပြီးခဲ့သည့် ဖေဖော်ဝါရီလ အတွင်းတွင်လည်း မိုင်းယော်တိုက်နယ် ဂျာယန်ကျေးရွာအနီးရှိ ဂျာယန်ပြည်သူ့စစ် တပ်စခန်းကို တအာင်း (ပလောင်) အမျိုးသား လွတ်မြောက်ရေး တပ်မတော် TNLA က ဝင်ရောက်စီးနင်းချိန်တွင် စစ်ကောင်စီဘက်မှ လေကြောင်းဖြင့် တိုက်ခိုက်မှု ပြုလုပ်ခဲ့သည်။

စစ်ကောင်စီမှ နိုင်ငံတော် အာဏာသိမ်းယူပြီး နောက်ပိုင်းတွင် စစ်ကောင်စီ တပ်ဖွဲ့မှ ဦးတည်ချက်မရှိ လက်နက်ကြီးများ ရမ်းသမ်းပစ်ခတ်ခြင်း၊ လေကြောင်းလိုင်းဖြင့် ပစ်ခတ်ခြင်း တို့ကြောင့် အရပ်သား ပြည်သူတို့ ထိခိုက်မှုများ ရှိသည့်အပြင် သေဆုံးမှုအထိ ရှိလာခဲ့သည်။

စစ်ကောင်စီတပ်ဖွဲ့သည် ၂၀၂၁ ခုနှစ် ဖေဖော်ဝါရီ ၁ ရက်မှ စတင်ပြီး ပြည်သူများကို စစ်ရာဇာဝတ်မှု ကျူးလွန်ခဲ့သည်။ စစ်ကောင်စီသည် စစ်ကောင်စီတပ်ဖွဲ့သည် ဂျီနီဗာ သဘောတူညီချုပ် စာချုပ်ချုပ်ဆိုထားသည့် တပ်ဖွဲ့တစ်ခုဖြစ်သည်။ ဂျီနီဗာ သဘောတူညီချက်အရ စစ်ပဋိပက္ခများကြား အရပ်သား လူထုများကို ရည်ရွယ်ချက်ရှိရှိ ပစ်မှတ်ထား တိုက်ခိုက်ခြင်း၊ တိုက်ခိုက်မှု လုပ်ရင် အရပ်သားများ အသက်ဆုံး၊ ဒဏ်ရာရမှာ သိလျက်ဖြင့် ရည်ရွယ်ချက်ဖြင့် တိုက်ခိုက်မှု လုပ်ဆောင်ခြင်း မပြုလုပ်ရန် ပါရှိသည်။

Leave a Comments

- Advertisement -spot_img

Latest article