သျှမ်းပြည်တောင်ပိုင်း လဲချားမြို့နယ်ရှိ လူငယ်စွမ်းဆောင်ရည်မြှင့်တင်ရေးကျောင်း (CBY) မှ သျှမ်းလူငယ်ခေါင်းဆောင်ဆုရှင် (Sao Thusandi Leadership Award) (၁၅) ဦးမြောက်ကို ဆရာတော် ရရှိခဲ့ကြောင်း သတင်းရရှိသည်။
ဆုလက်ခံရရှိသည့် ဆရာတော်သည် လူငယ်စွမ်းဆောင်ရည်မြှင့်တင်ရေးကျောင်း (CBY) မှ ခေါင်းဆောင်ဖြစ်သည့် ဆရာတော်သြဇေယျ ဓမ္မဘိပါလ (M.A Sri Lanka) မှ လက်ခံရရှိခဲ့ကြောင်း သိရှိရသည်။
“ဒီဆုရမယ်လို့ တခါမှ အိမ်မက် မမက်ဖူးဘူး။ CBY မှာ တာဝန် မယူခင်ကလည်း စာသင်တိုက်မှာ သံဃာတော်တွေကို စာသင်ပေးဖူးတယ်။ ၂၀၁၉ ခုနှစ်မှစပြီး ဒီ CBY ကျောင်းကို ဒီနေ့အထိ တာဝန်ယူပြီးတော့ အများအကျိုး ပရဟိတ အကျိုးတွေ လုပ်ဆောင်ထားတယ်” ဟု ဆုလက်ခံရရှိသည့် ဆရာတော် သြဇေယျ ဓမ္မဘိပါလ က သျှမ်းသံတော်ဆင့် ကိုပြောသည်။
လဲချားမြို့ရှိ လူငယ်စွမ်းဆောင်ရည်မြှင့်တင်ရေးကျောင်း (CBY) ကျောင်းတွင် ယမန်နေ့ မတ် (၁) ရက်၌ လဲချားမြို့ရှိ ပြည်သူများမှ ဆရာတော်အား ဂုဏ်ပြုပွဲ အခမ်းအနား ပြုလုပ်ပေးပြီး ညပိုင်းတွင် ဟောပြောပွဲ ပြုလုပ်ခြင်း၊ ယနေ့ မတ်လ (၂) ရက်တွင် ဆရာတော်အား Sao Thusandi Leadership Award ဆုကို ချီးမြှင့်ခဲ့သည်။
“CBY ကျောင်းမှာက သံဃာတော်မှ မဟုတ်ဘူး။ ကျောင်းသား/လူငယ် တွေကိုလည်း စာသင်ပေးတယ်။ လူငယ်တွေ ပြည်သူတွေ အားလုံး တက်ညီလက်ညီ ပူးပေါင်းဆောင်ရွက်တတ်ဖို့ ဘုန်းဘုန်းအနေနဲ့ ပညာရေးကို အဓိက ထားပြီးတော့ လူငယ်တွေကို ပျိုးထောင်သွားမယ်။ မူးယစ်ဆေးဝါးတွေ ကင်းစင်ဖို့ နဲ့ ပညာရေးပိုင်းကို ပိုပြီး ပျိုးထောင်သွားမယ်။ ရည်မှန်းချက်ကလည်း အရင်က အတိုင်းပဲ ပညာရေးပိုင်းမှာ ဆက်လက်ပြီး မြှင့်တင်သွားမယ်” ဟု ဆရာတော်က ဆက်လက် မိန့်ကြားသည်။
CBY ကျောင်းသည် ၂၀၁၄ ခုနစ်တွင် စတင်ပြီး လဲချားမြို့ရှိ ကျောင်းတော်၌ အခြေပြုပြီး လူငယ်ဖွံ့ဖြိုးတိုးတက်ရေးအတွက် သျှမ်းလူငယ်များ ဦးစီးပြီး တည်ထောင်ခဲ့သည်။
Sao Thusandi Leadership Award ကို သီပေါစော်ဘွား စဝ်ကြာဆိုင်၏ မဟာဒေဝီ ဆုစန္ဒီမှ ချီးမြှင့်သည့် ဆု တစ်ခုဖြစ်သည်။
အဆိုပါ ဆုကို (၂၀၀၈) ခုနှစ်ကစတင်ပြီး ကိုယ်ကျိုးစွန့် အနစ်နာခံပြီး အများအကျိုးသယ်ပိုးသူ လှုပ်ရှားသူများကို တစ်နှစ် တစ်ဦး ရွေးချယ်ပြီး ဆုပေးခဲ့သည်။ ဆုလက်ခံရရှိသူများသည် ဆုလက်မှတ် နှင့် အတူ အမေရိကန် ဒေါ်လာ ၄၀၀၀ ကိုချီးမြှင့်ကြောင်းသိရသည်။
