သျှမ်းပြည် လားရှိုးခရိုင် ၊ လားရှိုးမြို့နယ်အတွင်း သင်္ကြန်ပြုလုပ်ရန်အတွက် စည်းကမ်းမဲ့ ယာဉ်မောင်း လာသူများကို စောင့်ဆိုင်းစစ်ဆေးနေပြီး ငွေကောက်ယူနေလျက်ရှိကြောင်း စုံစမ်းသိရှိရသည်။

ယခု မတ်လ ပထမပတ်က စပြီး လားရှိုးမြို့နယ်အတွင်း ကား ၊ ဆိုင်ကယ် များကို စစ်ဆေးနေပြီး လိုင်စင်မပါရှိသည့် ဆိုင်ကယ်သမားကို ငွေ ၃ သောင်းထိ ကောက်ယူပြီး ကားသမားကို ၁ သိန်းအထိ ကောက်ယူလျက်ရှိကြောင်း လားရှိုးမြို့ ဒေသခံတစ်ဦးက ပြောသည်။

“ဆိုင်ကယ်ဆိုရင် ဦးထုပ်၊ ဆိုင်ကယ်နံပါတ်ပြား၊ နောက်ကြည့်မှန်၊ လိုင်စင်တွေ စစ်တယ်။ မရှိရင် သူတို့ ၃ သောင်းထိတောင်းတယ်။ ကားဆိုရင်တော့ ကားလိုင်စင်၊ ယာဉ်မောင်းလိုင်စင်တွေ စစ်တယ်။ ကားဆိုရင် ၅ သောင်းကနေ ၁ သိန်းထိ တောင်းတယ်။ သူတို့ သင်္ကြန်ပွဲ အကြီးကြီးလုပ်ဖို့အတွက် ရန်ပုံငွေ ရှာပြီး စစ်ဆေးကောက်နေတာဖြစ်တယ်”ဟု လားရှိုးမြို့ ဒေသခံတစ်ဦးက ပြောသည်။

အဆိုပါ စစ်ဆေးပြီး ငွေကြေးအများအပြား တောင်းခံနေသည့်အတွက် ပြည်သူများ သွားလာရန် ခက်ခဲမှုရှိကြောင်း သိရသည်။

ထိုအပြင် ငွေကြေးမဆောင်သည့် ဆိုင်ကယ်များကို သိမ်းယူထားပြီး နောက်နေ့ ငွေဖြင့် ပြန်လာရွေးယူခိုင်းကြောင်း လားရှိုးမြို့ ဒေသခံ တစ်ဦးက ပြောသည်။

“ အဓိကတော့ ကျေးရွာကလာတဲ့ သူတွေကို စိတ်ပူတာပေါ့။ သူတို့က ဘာမှ မသိဘူးလေ။ သူတို့ မြို့ထဲဝင်လာရင် လမ်းမသိတော့ စစ်ဆေးခံရတယ်။ ကျနော်တို့ကတော့ လမ်းကြိုလမ်းကြားထဲကနေ သွားရတာပေါ့။ ပြီးတော့ ပိုက်ဆံ အများပေးရတယ်လေ။ ပြီးတော့ အခုကလည်း စီးပွားရေး မကောင်းဘူးလေ။ ပိုက်ဆံလည်း မရှိကြဘူး။ ပိုက်ဆံမပေးနိုင်ရင်လည်း ဆိုင်ကယ်ကို ထားထားခိုင်းပြီး ပြန်လာရွေးခိုင်းတာ” ဟု ၎င်းက ပြောသည်။

လက်ရှိ လားရှိုးမြို့နယ်ထဲတွင် တက္ကသိုလ်ကျောင်း အနီး ၊ လားရှိုးပန်းခြံ၊ မန်ဆူ ကားဂိတ်တွင် စစ်ဆေးနေလျက်ရှိ ကြောင်း သိရသည်။