သျှမ်းပြည် လင်းခေးခရိုင် မိုင်းပန်မြို့တွင် တပေါင်းပွဲကို အကြောင်းပြပြီး စစ်ကောင်စီတပ်ဖွဲ့မှ လောင်းကစားထည့် ဖွင့်လှစ်နေကြောင်း စုံစမ်းသိရှိရသည်။
ယနေ့ မတ်လ ၁ ရက်နေ့မှစပြီး ၅ ရက်နေ့အထိ မိုင်းပန်မြို့အဝင် မဟာတေဇာဓိပတိ စေတီတော်မှ ပြုလုပ်သည့် တပေါင်းပွဲကို အကြောင်းပြပြီး စစ်ကောင်စီတပ်ဖွဲ့မှ လောင်းကစားများကို ဖွင့်လှစ်နေကြောင်း မိုင်းပန်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ ဒီညကစပြီးတော့ တပေါင်းလပြည့်အထိ လောင်းကစားတွေ ဖွင့်သွားမယ်လို့ သိရတယ်။ ဒီလောင်းကစားဝိုင်း ထဲမှာ ကုန်းကင်း၊ လေးကောင်ဂျင်နဲ့ ဖဲဝိုင်းတွေ အကုန်ပါတယ်။ ဒီလောင်းကစားကိုတော့ စစ်ကောင်စီရဲ့ လက်အောက်ခံ ဌာနဆိုင်ရာတွေရဲ့ ခွင့်ပြုချက်နဲ့ ဖွင့်ထားတယ်” ဟု ၎င်း အမျိုးသားတစ်ဦးက ပြောသည်။
အဆိုပါ လောင်းကစားဝိုင်း ဖွင့်လှစ်လာခြင်းကြောင့် ခိုးဆိုးလုယက်မှုများ ဖြစ်ပွားမည်ကို ဒေသခံများ စိုးရိမ်နေကြောင်း သိရသည်။
ထို့အပြင် ကြက်သွန်ဖြူ ဈေးနှုန်းမြင့်တက်လာသည့် ကာလမှာ လောင်းကစားဝိုင်း ပြုလုပ်လာလျှင် ခြံအတွင်းရှိ ကြက်သွန်ဖြူများ ခိုးခံရမည်ကို တောင်သူများက စိုးရိမ်နေရကြောင်း မိုင်းပန်ဒေသခံ တောင်သူအမျိုးသား တစ်ဦးကပြောသည်။
“ မိုင်းပန်မှာက ကြက်သွန်ဖြူဘဲ စိုက်စားကြတာလေ။ အခုလည်း တစ်ပိဿကို (၅,၀၀၀)၊ (၆,၀၀၀) ကျပ် အထိ ဈေးတက်နေတာ။ လောင်းကစားဝိုင်းတွေ လုပ်လာတော့ ကြက်သွန်တွေ ခိုးခံရမှာကြောက်တယ်။ အခုခြံထဲမှာက နုတ်ပြီးသား၊ မနုတ်ရသေးတဲ့ဟာတွေကော အများကြီး ကျန်သေးတယ်။ ခိုးခံရမှာကြောက်လို့ တချို့တွေတောင် ခြံမှာသွားအိပ်စောင့်ရတယ်“ ဟု ၎င်းတောင်သူတစ်ဦးက ပြောသည်။
လောင်းကစားဝိုင်း ဖွင့်လှစ်လာမှုနှင့် ပတ်သက်ပြီး အရေးယူပေးပါရန် သျှမ်းပြည်ပြန်လည် ထူထောင်ရေး ကောင်စီ၊ သျှမ်းပြည်တပ်မတော် (RCSS/SSA) တပ်ဖွဲ့ကို တိုင်ကြားထားသည်။
စစ်တပ်က အာဏာသိမ်းပြီးနောက်ပိုင်း သျှမ်းပြည်တွင်း ပြုလုပ်သည့် ပွဲတိုင်းတွင် စစ်ကောင်စီမှ လောင်းကစား ထည့်သွင်းလာနေကြောင်း သိရသည်။
Leave a Comments