ကျားဖြူပါတီသည် မူရင်း “ရှမ်းတိုင်းရင်းသားများ ဒီမိုကရက်တစ်ပါတီ” မှ “ ရှမ်း နှင့် တိုင်းရင်းသားများ ဒီမိုကရက်တစ်ပါတီ” ဟု နာမည် ပြောင်းလဲကာ နိုင်ငံရေးပါတီ အဖြစ် မှတ်ပုံတင်ထားကြောင်း သတင်းသိရသည်။

ယင်းကဲ့သို့ နာမည်ပြောင်းလဲခြင်း နှင့် ပတ်သက်ပြီး ကျားဖြူပါတီသည် ပြည်ထောင်စုအဆင့် ရွေးကောက်ပွဲ ပါဝင် ယှဥ်ပြိုင်မည် ဖြစ်ရာ သျှမ်းနှင့်ထပ်တူ တခြား တိုင်းရင်းသားများအတွက် ရည်ညွှန်းသည့် ပါတီ ဖြစ်စေရန် ရည်ရွည်ပြီး ပါတီနာမည်ကိုပြောင်းလဲခြင်းဖြစ်ကြောင်း ပါတီ ဥက္ကဌ လုံးစိုင်းအိုက်ပေါင်းက သျှမ်းသံတော်ဆင့်ကို ပြောသည်။

“ကျနော်တို့က တိုင်းဒေသကြီး ၆ နေရာ ၊ ပြီးတော့ သျှမ်းပြည် ဆိုတော့ စုစုပေါင်း ၇ နေရာကို ရွေးကောက်ပွဲဝင်မယ်ဖြစ်တယ်၊ ဒါကြောင့်မို့ သျှမ်းလူမျိုး တစ်ခုတည်းအတွက် မဟုတ်ပဲ တခြား တိုင်းရင်းသားတွေ အတွက် လည်း ဖြစ်စေတယ်လို့ ပြောချင်တာပေါ့။ အခုက ပါတီနာမည်ရော ပြီးတော့ ပါတီရဲ့ လိုဂိုအမှတ်တံဆိပ်မှာ နောက်ထပ် ဝါစိမ်းနီ လေးနဲ့ ဘောင်ခတ်ထားတယ်၊ အပြောင်းအလဲ အနည်းငယ်ပေါ့” ဟု ဦးစိုင်းအိုက်ပေါင်းက ပြောသည်။

လက်ရှိတွင် ကျားဖြူပါတီသည် လိုဂိုအမှတ်တံဆိပ် ပြောင်းလဲခြင်း မရှိဘဲ ယခင် လိုဂိုအတိုင်းသာ အသုံးပြုထားသော်လည်း ဘေးနားတွင် ဝါစိမ်းနီ ဘောင်ခတ်ထားမှု အပိုပါဝင်လာကြောင်း ဦးစိုင်းအိုက်ပေါင်းက ပြောသည်။

ရှမ်းနှင့် တိုင်းရင်းသားများ ဒီမိုကရက်တစ်ပါတီ (ကျားဖြူပါတီ) သည် သျှမ်းပြည် နှင့်အတူ ရန်ကုန်တိုင်း၊ မန္တလေးတိုင်း၊ ဧရာဝတီတိုင်း၊ ပဲခူးတိုင်း၊ တနင်္သာရီတိုင်း နှင့် နေပြည်တော်တို့ကို ဝင်ရောက်ယှက်ပြိုင်မည် ဖြစ်ကြောင်း သိရသည်။

လက်ရှိတွင် စစ်ကောင်စီ လက်အောက်ခံ ပြည်ထောင်စု ရွေးကောက်ပွဲ ကော်မရှင်ထံသို့ နိုင်ငံရေး မှတ်ပုံတင် တင်ထားလျက်ရှိသည်။

စစ်ကောင်စီတပ်ဖွဲ့သည် အာဏာသိမ်း ၂ နှစ်ကျော်ကြာလာပြီးနောက် ပြည်ထောင်စုအဆင့် ရွေးကောက်ပွဲ ကျင်းပမည်ဟု ကြေညာထားသော်လည်း မည်သည့်နေရာ မည်သည့်အချိန်တွင် ကျင်းပပြုလုပ်မည်ကို ထုတ်ပြန်ပြောဆိုခြင်း မရှိသေးပေ။

လက်ရှိ ၂၀၂၃ ရွေးကောက်ပွဲကို ပြည်ထောင်စုအဆင့် ရွေးကောက်ပွဲ ဝင်ရောက်ယှဥ်ပြိုင်မည့် ကျားဖြူပါတီသည် ၂၀၂၀ ပြည့်နှစ် အထွေထွေ ရွေးကောက်ပွဲတွင် မိုင်းပန်မြို့နယ် မဲဆန္ဒနယ် ပြည်နယ်လွှတ်တော် အမတ် တစ်နေရာတည်းသာ အနိုင်ရ ခဲ့သည်။