သျှမ်းပြည်တောင်ပိုင်း တောင်ကြီးခရိုင် ပင်လောင်းမြို့နယ်အတွင်း စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲ ပြင်းထန်နေချိန် တောင်မဲတင်းကျေးရွာ ဒေသခံ (၃) ဦး သတ်ဖြတ်ခံခဲ့ရကြောင်း စုံစမ်းသိရသည်။
ယမန်နေ့ ဖြစ်ပွားခဲ့သည့် တိုက်ပွဲအတွင်းတွင် ပင်လောင်းမြို့နယ် တောင်မဲတင်းကျေးရွာဒေသခံ ၃ ဦး သတ်ဖြတ်ခံရခဲ့ကြောင်း ပင်လောင်းမြို့ ဒေသခံ တစ်ဦးက သျှမ်းသံတော်ဆင့် ကို အတည်ပြု ပြောဆိုသည်။
“ သတ်ဖြတ်ခံရတာတော့ ဟုတ်တယ်။ ဘယ်တပ်ဖွဲ့က သတ်လိုက်တာလည်းတော့ မသိဘူး။ တောင်မဲတင်းရွာက ဒေသခံတွေ ဖြစ်တယ်။ ဘယ်သူက သတ်လိုက်တာလဲတော့ အတိကျ မသိရသေးဘူး။ ၃ ယောက်သတ်ခံရတယ်” ဟု ၎င်းက ပြောသည်။
ထို့အပြင် ဖယ်ခုံမြို့နယ် အနောက်ဘက်ကမ်းတွင်လည်း ယမန်နေ့ (ဖေဖော်ဝါရီ ၂၇) ရက် ည ၉ နာရီဝန်းကျင်တွင် စစ်ကောင်စီက လက်နက်ကြီးကို ရမ်းသမ်းပစ်ခတ်ခဲ့သောကြောင့် ပြည်သူနေအိမ်ပေါ်တို့ ကျရောက်ခဲ့ပြီး ၂ ဦး ထိခိုက် ဒဏ်ရာရရှိခဲ့ကြောင်း မိုးဗြဲ PDF တပ်ရင်း ၂ က ထုတ်ပြန်ထားသည်။
အဆိုပါ ထိခိုက်ဒဏ်ရာရရှိခဲ့သည့်သူသည် အသက် ၄၇ နှစ်အရွယ် အမျိုးသမီးတစ်ဦး နှင့် အသက် ၂၇ နှစ်အရွယ် အမျိုးသား တို့ ဖြစ်သည်။
တိုက်ပွဲကြောင့် ပြည်သူနေအိမ်တချို့လည်း ပျက်စီးသွားခဲ့ကြောင်း သိရသည်။
“ အိမ်တွေလည်း ထိသွားတယ်။ ပြည်သူ ၂ ဦးက ထိခိုက်သွားတယ်။ ဒဏ်ရာကတော့ ပြင်းထန်တယ်။ သူတို့နေတဲ့နေရာက စစ်ဘေးရှောင်တွေနေတဲ့နေရာ။ စစ်ကောင်စီကလည်း အဲ့လိုနေရာတွေမှာ ရွေးပြီးတော့ ပစ်တာ” ဟု မိုးဗြဲ PDF တပ်ရင်း ၂ က ပြောသည်။
စစ်တပ်အာဏာသိမ်း ၂ နှစ်ပြည့်အချိန်ထိ စစ်ကောင်စီ နှင့် ဖယ်ခုံမြို့နယ် ပြည်သူ့ကာကွယ်ရေးတပ်ဖွဲ့တို့သည် ဖယ်ခုံမြို့နယ်အတွင်းသာ တိုက်ပွဲဖြစ်ပွားခဲ့ပြီး ယခုနောက်ပိုင်း ပင်လောင်းမြို့နယ်ထဲအထိ တိုက်ပွဲဖြစ်ပွားလာသည့် အတွက်ကြောင့် ပြည်သူများက စိုးရိမ်နေကြသည်။
ပင်လောင်းမြို့နယ်အတွင်းတွင်လည်း ကရင်နီပြည်၊ ဖယ်ခုံမြို့နယ်အတွင်း စစ်ဘေးရှောင်များ ထွက်ပြေးတိမ်းရှောင်လာသူ ရှိထားပြီး စစ်ဘေးရှောင်စခန်း ၂၀ ခန့် ရှိထားသည်။
တိုက်ပွဲသည် ပင်လောင်းမြို့နယ်အတွင်းသို့ ကူးစက်လာသည့်အတွက်ကြောင့် စစ်ရှောင်များထပ်မံပြီး စစ်ရှောင်ရမည်ကို စိုးရိမ်နေရကြောင်း တိုက်ပွဲဆက်မဖြစ်ပွားရန်အတွက် ပရဟိတ အဖွဲ့များက တောင်းဆိုလိုက်သည်။
“ တိုက်ပွဲတွေက ဒီဘက်ထိရောက်လာပြီဆိုတော့ စိတ်ပူရတယ်။ ပြည်သူတွေလည်း လယ်ယာတွေ သွားလို့မရတော့ဘူး။ ထွက်ပြေးနေရတယ်။ ဖြစ်နိုင်ရင်တော့ တိုက်ပွဲကတော့ မဖြစ်စေချင်ဘူးလေ။ အရင်ကတည်းက ထွက်ပြေးလာတဲ့သူတွေကလည်းရှိထားတယ်” ဟု ပင်လောင်းမြို့နယ်အတွင်း စစ်ဘေးရှောင်တွေကို ကူညီပေးနေသည့် ပရဟိတ အဖွဲ့က ပြောသည်။
ပင်လောင်းမြို့နယ်အတွင်းတွင် ဖေဖော်ဝါရီ ၂၄ ရက်နေ့ကစ တိုက်ပွဲဖြစ်ပွားခဲ့ပြီး ပြည်သူ ၄ ဦး သေဆုံးခဲ့ပြီး ၄ ဦး ပျောက်ဆုံးနေကာ လက်ရှိ သတင်းရေးသားသည့်အချိန်ထိ တိုက်ပွဲဆက်လက်ဖြစ်ပွားနေဆဲဟု သိရသည်။
Leave a Comments