သျှမ်းပြည် တောင်ကြီးခရိုင် ပင်လောင်းမြို့နယ် တောင်စလုံးကျေးရွာ ၊ မြောက်စလုံးကျေးရွာ နှင့် တောင်မဲတင်းကျေးရွာ ဒေသခံများ နေရပ်မပြန်ရဲသေးကြောင်း စုံစမ်းသိရှိရသည်။
ပြီးခဲ့သည့် ဖေဖော်ဝါရီ ၂၄ ရက်နေ့က စစ်ကောင်စီ နှင့် ဖယ်ခုံမြို့နယ်အတွင်း ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲဖြစ်ပွားခဲ့ပြီး စစ်ကောင်စီဘက်မှ ကျေးရွာအတွင်း လက်နက်ကြီး ရမ်းသမ်းပစ်ခတ်မှုကြောင့် ပြည်သူများ လက်နက်ကြီး ထပ်မံပစ်ခတ်လာမည်ကို စိုးရိမ်ပြီး နေရပ်သို့ မပြန်ရဲသေးကြောင်း သိရသည်။
“ ကျေးရွာထဲက လူတွေတော့ သူတို့ ဆွေမျိုးအိမ်တွေမှာ သွားနေကြတယ်။ ရွာမှာ မနေရဲကြဘူး။ ရွာထဲလည်း မပြန်ရဲကြသေးဘူး။ ၁ ပတ် ၂ ပတ်လောက်တော့ စောင့်ကြည့်အုံးမယ်တဲ့။ တစ်ခြားရွာမှာ သွားနေကြတာ။ တစ်ချို့ကလည်း မြို့ထဲမှာ သွားနေကြတာရှိတယ်။ ဆွေမျိုးအိမ်မှာ မရှိတဲ့သူတွေကတော့ ဘုန်းကြီးကျောင်းမှာ သွားနေကြတာရှိတယ်” ဟု ပင်လောင်းမြို့နယ်အတွင်း တက်ကြွလှုပ်ရှားသူ အမျိုးသားတစ်ဦးက ပြောသည်။
အဆိုပါ ဘုန်းကြီးကျောင်းအတွင်းသို့ သွားရောက်ခိုလှုံနေသည့် စစ်ဘေးရှောင်များသည် စားဝတ်နေရေးအတွက် ဆန်၊ ဆီ၊ဆားများ လိုအပ်နေသေးကြောင်း သိရသည်။
“တစ်ချို့ ဘုန်းကြီးကျောင်းမှာ သွားနေတဲ့သူတွေတော့ စားဝတ်နေရေးအတွက် အခက်ခဲရှိတာပေါ့။ အခြေခံစားသောက်ကုန်တွေတော့ လိုအပ်နေတယ်။ သူတို့လည်း အခြေနေ ခနစောင့်ကြည့်ပြီးတော့မှ ပြန်မယ်တဲ့” ဟု အထက်ပါ အမျိုးသားက ပြောသည်။
ပင်လောင်းမြို့နယ်တွင်းတွင် လက်ရှိအချိန်ထိ စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့ စစ်ရေးတင်းမာနေလျက်ရှိသည်။
ပြီးခဲ့သည့် ဖေဖော်ဝါရီ ၂၄ ရက်တွင် စစ်ကောင်စီဘက်မှ လက်နက်ကြီး ရမ်းသမ်းပစ်ခတ်မှုကြောင့် အမျိုးသမီး တစ်ဦးသေဆုံးသွားခဲ့သည်။
