သျှမ်းပြည် တာချီလိတ်ခရိုင် တာချီလိတ်မြို့တွင် အွန်လိုင်းဂိမ်း လုပ်ကိုင်သူများကို စစ်ကောင်စီ လက်အောက်ခံ ရဲတပ်ဖွဲ့များက လိုက်လံရှာဖွေ ဖမ်းဆီးခဲ့ရာ လူငယ် ၂ ဦးကို ဖမ်းဆီးမိကြောင်း သတင်းသိရှိရသည်။
ယမန်နေ့ (ဖေဖော်ဝါရီ ၂၃) ရက် ည ၈ နာရီ ဝန်းကျင်မှ စပြီး တာချီလိတ်မြို့ တော်ကော့ရပ်ကွက် လိုမာဟိုတယ် အနီး အိမ်ခန်းငှားရမ်းသည့် တိုက်တစ်ခုတွင် စစ်ကောင်စီ လက်အောက်ခံ ရဲတပ်ဖွဲ့များက အရပ်သား အဝတ်ဖြင့် လာရောက်ပြီး ကွန်ပျူတာ အသုံးပြုခြင်း ရှိ၊ မရှိ စစ်ဆေးမေးမြန်းရာ လူငယ် ၂ ဦးကို ဖမ်းဆီးသွားခဲ့ကြောင်း ထွက်ပြေးတိမ်း ရှောင်နေရသူ အမျိုးသားတစ်ဦးက ပြောသည်။
“ တချို့က ကြိုတင်သိထားတော့ ကွန်ပျူတာကို သိမ်းပြီး အခန်းကို သော့ခတ် ထွက်ပြေးရတာပေါ့။ သူတို့က ရိုးရိုးအရပ်သား အဝတ်နဲ့လာတာ။ ထွက်မပြေးနိုင်ခဲ့တဲ့ လူငယ် ၂ ယောက် ကွန်ပျူတာ နှစ်လုံးနဲ့အတူ ဖမ်းမိခဲ့တယ်။ ဘယ်သူဘယ်ဝါတော့ သေချာမသိရသေးဘူး “ ဟု ၎င်းက ပြောသည်။
အဆိုပါ ဖမ်းဆီးခံရမိသည့် လူငယ် ၂ ဦးသည် အသက် ၂၀ နှစ်ကျော် လူငယ်များဖြစ်ကြကြောင်း ၎င်းတို့ကို ဝမ်ကောင်း ရဲစခန်းသို့ ဖမ်းဆီးခေါ်ဆောင်သွားကြောင်း သိရသည်။
ထို့အပြင် အွန်လိုင်းဂိမ်း လုပ်ကိုင်သူ လူငယ်များကို စစ်ကောင်စီက လိုက်လံဖမ်းဆီးဆောင်ရွက်မှု နှင့် ပတ်သက်ပြီး “ ကျနော်တို့က အွန်လိုင်းဂိမ်းနဲ့ ပတ်သက်ပြီး ဘာမှမလုပ်ဘူး။ တော်ကြာနေ သူတို့ လာစစ်ဆေးချိန်မှာ ကျနော်တို့ကို အွန်လိုင်းဂိမ်း နဲ့ ပတ်သက်တယ်ဆိုပြီး စွပ်စွဲပြီး ဖမ်းသွားမှာကိုဘဲ ကြောက်တယ် “ ဟု အိမ်ခန်းငှား နေထိုင်သူတစ်ဦးက ပြောသည်။
စစ်တပ်က အာဏာသိမ်းပြီး (၂) နှစ်ကျော် ကာလအတွင်းမှာ နိုင်ငံရေး အခြေအနေ မငြိမ်မှုကြောင့် စီးပွားရေး၊ ပညာရေး နှင့် အလုပ်အကိုင် အခွင့်အလမ်း ရှားပါးလာရာ လူငယ်များသည် နယ်စပ်ဒေသဖြစ်သည့် မြဝတီ နှင့် တာချီလိတ်တွင် သွားရောက်ပြီး အွန်လိုင်းဂိမ်းအလုပ်ကို လုပ်ကိုင်နေခြင်းဖြစ်ကြောင်း သိရသည်။
