Thursday, June 20, 2024

တရုတ် အထူးသံတမန် သျှမ်းပြည်က တိုင်းရင်းသား လက်နက်ကိုင်များ နှင့် တွေ့ဆုံဆွေးနွေး

Must read

မြန်မာနိုင်ငံ ဆိုင်ရာ တရုတ်အထူးသံတမန် မစ္စတာ တိန့်ရှီးဂျွန်းသည် သျှမ်းပြည်ရှိ တိုင်းရင်းသား လက်နက်ကိုင်တို့ နှင့် တွေ့ဆုံဆွေးနွေးမှု ပြုလုပ်ခဲ့ကြောင်း သတင်းသိရသည်။

တိန့်ရှီးဂျွန်း

ပြီးခဲ့သည့် ရက်ပိုင်းအတွင်း တရုတ်အထူးသံတမန်အသစ် မစ္စတာ တိန့်ရှီးဂျွန်း(Deng Xijun) သည် ကချင်လွတ်မြောက်ရေးတပ်မတော် (KIA) ၊ ဝ ပြည်သွေးစည်းညီညွှတ်ရေး တပ်မတော် (UWSA) နှင့် အမျိုးသားဒီမိုကရက်တစ် မဟာမိတ် တပ်မတော် (NDAA) တို့နှင့် တွေ့ဆုံခဲ့ကြသည်။

အဆိုပါ တွေ့ဆုံမှုတွင် အမေရိကန် ပြည်ထောင်စု ဝါရှင်တန် ဒီစီ၌ NUG မှ နိုင်ငံခြားရေး ဝန်ကြီးရုံး ဖွင့်လှစ်ခြင်း နှင့် ပတ်သက်ပြီး ဆွေးနွေးမှု ဖြစ်နိုင်ချေ ဖြစ်ကြောင်း မြန်မာနိုင်ငံအရေး လေ့လာသုံးသပ်သူများက ပြောဆို နေကြသည်။

တရုတ်သည် အမေရိကန်မှ လက်နက် ကူညီထောက်ပံ့ပေးမှု အရေးဖြင့် မြန်မာနိုင်ငံအရေး အခင်းအကျင်းများကို ပါဝင်လာမည်ကို စိုးရိမ်သည့်အတွက် ၎င်းတို့၏ သြဇာ သက်ရောက်မှု ရှိသည့် တိုင်းရင်းသား လက်နက်ကိုင် တပ်ဖွဲ့များနှင့် တွေ့ဆုံခြင်းဖြစ်နိုင်မည်ဟု ယူဆကြောင်း မြန်မာနိုင်ငံအရေး လေ့လာသုံးသပ်သူ ဦးရဲထွန်း (သီပေါ) က သျှမ်းသံတော်ဆင့်ကို ပြောသည်။

“တရုတ်အထူးကိုယ်စားလှယ်က ဘာကြောင့် လာတွေ့သလဲဆိုတာကို အတိအကျတော့ သူတို့ထုတ်ပြန် ကြေညာမှပဲ သိရမှာပေါ့နော်။ ဒါပေမဲ့ မှန်းကြည့်ရမယ်ဆိုရင် NUG က အမေရိကန်မှာ ရုံးဖွင့်တော့ အမေရိကန်က နိုင်ငံခြားရေး ဒုဝန်ကြီးလည်း လာတက်တယ်၊ နောက်တခါ NDAA ဥပဒေလည်း ထွက်ခဲ့ပြီဆိုတော့ ဥပဒေထဲမှာ NUG, PDF တွေနဲ့ တရားဝင် ထောက်ခံထားတဲ့ အနေအထားကို ထည့်ထားပြီး ဥပဒေပြဌာန်းထားတာရှိတယ်။ အဲ့လို အနေအထားအရ အမေရိကန်က မြန်မာ့အရေးမှာ လက်နက်နဲ့ ပါဝင်လာမှာကို တရုတ်တွေက စိုးရိမ်တာ။ အဲ့လို စိုးရိမ်လို့ ဒီအခု တွေ့ဖို့လိုအပ်နေတဲ့ သူတို့ အရင်တုန်းက သြဇာသက်ရောက်မှုတွေ ရှိတဲ့ အဖွဲ့တွေနဲ့ လာညှိနှိုင်းတိုင်ပင်တယ်လို့ ကျနော်ထင်တယ်” ဟု ဦးရဲထွန်း (သီပေါ) က သျှမ်းသံတော်ဆင့်ကို ပြောသည်။

တရုတ် အထူးသံတမန် နှင့် တွေ့ဆုံခဲ့သည့် ဆွေးနွေးမှု အခြေအနေများနှင့်ပတ်သက်ပြီး သေးစိတ် သိရှိနိုင်ရန် အတွက် တိုင်းရင်းသား လက်နက်ကိုင်များထံသို့ သျှမ်းသံတော်ဆင့်မှ ဖုန်းဖြင့် အကြိမ်ကြိမ် ဆက်သွယ်ခဲ့သော်လည်း အဆက်အသွယ်မရခဲ့ပေ။

တရုတ်အနေဖြင့် မြန်မာ့နိုင်ငံအရေး နှင့် ပတ်သက်ပြီး အမေရိကန်၏ ပါဝင်မှု ပတ်သက်မှုများကို မည်သည့်အခါမှ ပေါ့ဆစွာ မတွေးကြောင်းလည်း ၎င်းက ဆိုသည်။

“မြန်မာနိုင်ငံရဲ့ အနေအထားဟာ အိမ်နီးချင်းနိုင်ငံဖြစ်တဲ့ တရုတ်နဲ့ မဟာအကျိုးစီးပွားတည်ရှိနေတာ သိထားဖို့ လိုတယ်။ တရုတ်ပြည်ရဲ့ သဘောထားကလည်း သူက မြန်မာပြည်ကို ပြည်သူလူထု ရွေးချယ်တဲ့ အစိုးရနဲ့ ဒီမိုကရေစီ လမ်းစဥ်အတိုင်း သွားချင်တာပေါ့၊ ဒါပေမဲ့ အမေရိကန်ရဲ့ သြဇာခံ တာကို သူက မလိုလားဘူး။ အဲ့အနေအထား မရောက်ခင်မှာ သူသတိပေးတယ်၊ ဖြစ်လာရင်လည်း သူက စွက်ဖက်တယ်” ဟု ဦးရဲထွန်းက ပြောသည်။

တရုတ် အထူးသံတမန် မစ္စတာ ဆွန်ကော့ရှန် နေရာကို ဆက်ခံနေသည့် မစ္စတာ တိန့်ရှီးဂျွန်းဟာ ပြီးခဲ့သည့် ဒီဇင်ဘာလအတွင်းမှာလည်း တရုတ်နယ်စပ် တလျှောက်ရှိ တိုင်းရင်းသားလက်နက်ကိုင်များနှင့် တွေ့ဆုံမှု ရှိခဲ့သလို ကောင်စီ ဥက္ကဋ္ဌနှင့်လည်း နေပြည်တော်တွင် တွေ့ဆုံခဲ့သည်။

ထို့အပြင် တရုတ်အထူးသံတမန်သည် မြန်မာ – တရုတ် နယ်စပ် တစ်လျှောက် လှုပ်ရှားနေသည့် မြန်မာအမျိုးသား ဒီမိုကရက်တစ် မဟာမိတ်တပ်မတော် (MNDAA)၊ ရှမ်းပြည် တိုးတက်ရေးပါတီ၊ ရှမ်းပြည် တပ်မတော် (SSPP/SSA) နှင့် တအာင်း (ပလောင်) အမျိုးသား လွတ်မြောက်ရေး တပ်မတော် TNLA တပ်ဖွဲ့နှင့်လည်း တွေ့ဆုံနိုင်ချေ ရှိကြောင်း တိုင်းရင်းသားအရေး လေ့လာစောင့်ကြည့်သူတွေက သုံးသပ်ပြောဆိုထားသည်။

တရုတ်အထူးကိုယ်စားလှယ် တိန့်ရှီးဂျွန်း (Deng Xijun) သည် ၂၀၂၀ ခုနှစ်မှ စတင်ပြီး အာဆီယံဆိုင်ရာ အထူးသံတမန်အဖြစ် တာဝန် ထမ်းဆောင်ခဲ့ပြီး လက်ရှိတွင် မြန်မာနိုင်ငံဆိုင်ရာ တရုတ်အထူးကိုယ်စားလှယ် မစ္စတာ ဆွန်ကော့ရှန် (Sun Guoxiang) ၏ နေရာကို ဆက်ခံသူဖြစ်ကြောင်း သိရသည်။

Leave a Comments

- Advertisement -spot_img

Latest article