သျှမ်းပြည် မူဆယ်ခရိုင် မုံးကိုးမြို့နယ်အတွင်း လှုပ်ရှားနေသည့် တပ်မ ၉၉ လက်အောက်ခံ စစ်ကောင်စီတပ်ဖွဲ့ သည် ကားသမားများကို ခြိမ်းခြောက်ပြီး ပိုက်ဆံတောင်းယူ နေကြောင်း သတင်းသိရသည်။

မုံးကိုးမြို့ အဝင်နားတွင် စစ်ကောင်စီ တပ်ဖွဲ့ ၎င်းတို့၏ လက်အောက်ခံ ဒေသခံ ပြည်သူ့စစ်တပ်ဖွဲ့တို့ ပူးပေါင်းပြီး ကားသမားများကို ခြိမ်းခြောက် ပိုက်ဆံ ကောက်ယူနေကြောင်း ဒေသခံများက သျှမ်းသံတော်ဆင့်ကို ပြောသည်။

“ရိုးရိုးကား တစ်စီးဆိုရင် တရုတ်ယွမ်ငွေ ၁၀ စီး ၊ ကားကြီးပြီး ကုန်ပါ ရင် ပိုက်ဆံပိုတောင်းတယ်၊ တခါတလေ တရုတ်ယွမ် ၁၀၀ ထိ တောင်းတာရှိတယ်။ အဲ့လိုခါကျတော့ ကား သမား တွေ အတွက် အဆင်မပြေဘူးလေ” ဟု အမည်မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

လက်ရှိ တရုတ်ငွေ ၁၀ ယွမ်ဆိုပါက မြန်မာငွေ ကာလပေါက်စျေး (၄,၀၀၀) ကျပ် တရုတ်ငွေ ၁၀၀ ယွမ် ဆိုပါက မြန်မာငွေ ကာလပေါက်စျေး (၄၀,၀၀၀) ကျပ် ဖြစ်ကြောင်း သိရသည်။

အဆိုပါ စစ်ကောင်စီ တပ်သား နှင့် ပြည်သူ့စစ်တပ်ဖွဲ့တို့သည် တောင်းသည့် ပိုက်ဆံ မပေးသည့် ကားသမားများကို ရှေ့ဆက်မသွားခိုင်းဘဲ သေနတ်ဖြင့် ချိန်ထားကြောင်း ၎င်းကဆက် ဆိုသည်။

“ကြောင်တောင်တောင်တွေ မလုပ်နဲ့နော် ဆိုပြီး သေနတ်ပြပြီးတော့ ခြိမ်းခြောက်တာ၊ တောင်းတဲ့ ပမာဏလည်း များလွန်းတော့ မလွယ်ဘူး၊ စကားအချေအတင်ပြောဆိုရတာတွေရှိတယ်၊ ဘယ်သူက တောင်းခိုင်းလဲလို့ မေးတော့ တပ်မှူးက တောင်းခိုင်းတာတဲ့၊ ဘာမှ တိတိကျကျ မဖော်ပြနိုင်ဘူး၊ ထင်တိုင်းလုပ်နေတာ” ဟု ၎င်းက ဆက်ပြောသည်။

စစ်အာဏာသိမ်းပြီးနောက်တွင် မုံးကိုးမြို့မှ မြန်မာ – တရုတ် နယ်စပ်အတွက် ဒေသခံ ပြည်သူများမှ တပိုင်တနိုင် အသုံးပြုနေသည့် နယ်စပ်ကုန်သွယ်ရေး လမ်းကြောင်းများ ပိတ်ထားခဲ့ရပြီး ဒေသအတွင်း ကားသမားများက ဝမ်းစာအတွက် ခက်ခက်ခဲခဲ အလုပ်လုပ်ကိုင် နေကြရကြောင်းလည်း သိရသည်။

တဖက်တွင်လည်း စစ်ကောင်စီ နှင့် သျှမ်းမြောက် ဒေသအတွင်း လှုပ်ရှားနေသည့်တိုင်းရင်းသား လက်နက်ကိုင် တပ်ဖွဲ့တို့က မုံးကိုးမြို့နယ် အတွင်း မကြာခဏ တိုက်ပွဲဖြစ်ပွားခဲ့ပြီး စစ်ရှောင် ရာချီ ထွက်ပြေး တိမ်းရှောင် နေရသည်။