သျှမ်းပြည် တောင်ကြီးခရိုင် တောင်ကြီးမြို့ ကျောင်းကြီးစု ရပ်ကွက်တွင် တပ်ပိုင် ဈေးဆိုင်ခန်း နှင့် တိုက်ခန်းများ ဘူဒိုဇာဖြင့် ဖြိုဖျက်ခံရပြီး အမျိုးသားတစ်ဦး အုတ်တံတိုင်းပိပြီး သေဆုံးသွားကြောင်း စုံစမ်းသိရှိရသည်။
ပြီးခဲ့သည့် ဖေဖော်ဝါရီ ၁၈ ရက် နံနက်ပိုင်းတွင် စစ်ကောင်စီတပ်ဖွဲ့ နှင့် လက်အောက်ခံ ဌာနဆိုင်ရာများ ပူးပေါင်းပြီး သျှမ်းရိုးမ တိုက်တန်းမှ ဆိုင်ခန်းများကို “တပ်ပိုင်မြေ မကျူးကျော်ရ” ဆိုပြီး စာစောင်ကပ်ထားကာ လူသွားလမ်းများ ပိတ်ထားကြောင်း၊ 212 ဈေးရှိ ဆိုင်ခန်းများကို ဘူဒိုဇာဖြင့် ဖြိုဖျက်ပျက်စီးခဲ့ကြောင်း ကျောင်းကြီးစု ရပ်ကွက်နေ ဒေသခံတစ်ဦးက ပြောသည်။
ထိုသို့ မဖြိုဖျက်ခင် ဖေဖော်ဝါရီ ၁၇ ရက်တွင် ဆိုင်ခန်းထဲရှိ ပစ္စည်းသိမ်းယူနေသည့် အသက် ၂၀ ကျော် အမျိုးသားတစ်ဦး အုတ်တံတိုင်းပိပြီး သေဆုံးသွားကြောင်း ၎င်းက ပြောသည်။
“သူတို့ ဆိုင်ခန်းကို ဖျက်ယူနေရင်း အုတ်နံရံ ပြိုကျလာတာ။ အဲ့ဒီ တစ်ယောက်က ဖိနပ်ကျန်ခဲ့လို့ ပြန်ယူတဲ့အချိန် ပိသွားတာဗျ၊ ဦးခေါင်းပွင့်သွားတယ်။ ဈေးကတော့ အကုန်ဖျက်ပြီးသွားပြီ၊ ချက်ချင်း သံဆူးကြိုးကာထားတယ်။ သျှမ်းရိုးမတိုက်တန်းက အင်းဝဘဏ်တစ်ခုဘဲ ကျန်တယ်။ ကျန်တာ အကုန်ထွက်ရပြီး တပ်မြေမကျူးကျော်ရ ကပ်သွားတယ် “ ဟု ၎င်းကပြောသည်။
စစ်ကောင်စီမှ ဈေးဆိုင်ခန်းများနှင့် တိုက်ခန်းများကို ဖေဖော်ဝါရီ ၁၇ ရက် နောက်ဆုံးထားကာ အပြီးအစီး ရွှေ့ပြောင်းခိုင်းနေသဖြင့် အချိန်မှီ ပစ္စည်းရွှေ့ပြောင်းနေသည့် အမျိုးသားတစ်ဦး အုတ်တံတိုင်း ပိပြီး သေဆုံးခဲ့ရသည်။
ထို့အပြင် တပ်ပိုင် ဈေးဆိုင်ခန်း နှင့် တိုက်ခန်း ဈေးဖွင့်လှစ်ရောင်းချနေသူများသည် လက်ရှိမှာ ဆိုင်ခန်းများဖြိုဖျက် ပျက်စီးခံရပြီးနောက် ဆိုင်ခန်းအသစ် ထပ်မံဖွင့်လှစ်ရန် ခက်ခဲနေကြောင်း ဆိုင်ခန်းပိုင်ရှင် အမျိုးသားတစ်ဦးက ပြောသည်။
“အခြေပျက်ကုန်တာပေါ့၊ ပိုက်ဆံရှိ သမားတွေလည်း ခံရမှတော့ မရှိသမားဆို ပိုဆိုးပေါ့ဗျာ။ အမျိုးမျိုးသော ဒုက္ခတွေ ကြုံနေရတာပေါ့။ ဆိုင်ခန်း အသစ်ထပ်ဖွင့်ဖို့လည်း မတတ်နိုင်တော့ဘူး။ အခုက ဆိုင်ခန်းခလည်း ဈေးကြီးတယ်” ဟု ဆိုင်ခန်းပိုင်ရှင် အမျိုးသားတစ်ဦးက ပြောသည်။
သျှမ်းရိုးမတိုက်တန်းအတွင်း နေထိုင်သူများသည် စစ်တပ် နှင့် စာချုပ်နှစ် ၃၀ ချုပ်ပြီး ငှားထားကြောင်း လက်ရှိ စာချုပ်မပြီးသေးချိန် ၁၀ နှစ်ကျော် ကျန်သေးချိန်မှာ စစ်တပ်က ဆိုင်ခန်းများကို ဘူဒိုဇာဖြင့် လာရောက် ဖြိုဖျက်ခဲ့ကြောင်း သိရသည်။
ပြီးခဲ့သည့် ဇန်နဝါရီ ၂၈ ရက်မှစပြီး တပ်ပိုင်နယ်မြေအတွင်းရောက် ဆေးတပ်ရင်း၊ အမှတ် (၂၆၂) တပ်ထိန်း၊ စုဆောင်းရေး တပ်ဖွဲ့ရုံး နှင့် GE ရှိ ဆိုင်ခန်းများကို စစ်ကောင်စီတပ်ဖွဲ့မှ ဘူဒိုဇာဖြင့် ဖြိုဖျက်ပျက်စီးခဲ့ကြောင်း သိရသည်။
Leave a Comments