သျှမ်းပြည် တောင်ကြီးခရိုင် ဖယ်ခုံမြို့နယ် မိုးဗြဲမြို့အတွင်း စစ်ဘေးရှောင် စခန်းများတွင် ရေများရှားပါးမှုကြောင့် ဝမ်းပျက်ဝမ်းလျှောများ ဖြစ်ပွားနေကြောင်း စုံစမ်းသိရှိရသည်။

ယခု နွေဦးကာလအတွင်းတွင် ရာသီဥတု ပြောင်းလဲမှု နှင့် ရေများရှားပါးမှုကြောင့် ဝမ်းလျှောမှုများ ဖြစ်ပွားနေကြောင်း သိရသည်။

“ အစတော့ ရာသီဥတုကြောင့်ဖြစ်တာ ထင်နေတာ။ ဒါမှမဟုတ် ကျနော်တို့ စစ်ဘေးရှောင်တွေ သောက်တဲ့ရေက မသန့်လို့လားထင်တယ်။ ရေချိုးလည်း ဒီရေ နဲ့ ချိုးတယ်။ ဒီရေနဲ့ပဲ ချက်စားကြတယ်လေ။ အဲ့ဒါကြောင့်ဖြစ်တာလား မသိဘူး။ သေချာတော့ မပြောတတ်ဘူး။ လူကြီးတွေလည်း ဖြစ်နေတယ်” ဟု မိုးဗြဲမြို့ အနောက်ဘက် ကမ်းကျေးရွာဘက်ရှိ စစ်ဘေးရှောင် ကူညီသူတစ်ဦးက ပြောသည်။

မိုးဗြဲမြို့အနောက်ဘက်ကမ်းရှိ စစ်ဘေးရှောင်စခန်းတွင် တွင်းရေတောင်ကျရေကို အဓိက အသုံးပြုကြပြီး ယခင်က ရေထွက်များပြီး လက်ရှိမှာ ရေထွက်မှု နည်းလာကြောင်း သိရသည်။

ထိုအပြင် စစ်ဘေးရှောင်များသည် ကြုံရာ စားသောက်နေကြရပြီး သန့်စင်ခန်း နည်းပါးပြီး တစ်ကိုယ်ရေ သန့်ရှင်းမှု နည်းပါးသောကြောင့် ဝမ်းပျက် ဝမ်းလျှောမှုများ ဖြစ်ပွားနေကြောင်း ဖယ်ခုံမြို့ စစ်ဘေးရှာင်များကို ကူညီပေးနေသည့် သူက ပြောသည်။

“ စစ်ရှောင်တွေက ကြုံရာနေ၊ ဖြစ်သလို စားနေကြရတယ်လေ။ ရေရှားတယ်။ ပြီးတော့ သန့်စင်ခန်းကလည်း နည်းတယ်။ တစ်ကိုယ်ရေ သန့်ရှင်းမှုကလည်း အားနည်းတာကြောင့် ဝမ်းပျက်မှုတွေက ဖြစ်နေကြတာ” ဟု ၎င်းက ပြောသည်။

လက်ရှိ စစ်ဘေးရှောင်စခန်းများထဲတွင် ကလေး ၆ နှစ်မှစ လူကြီးအထိ ဝမ်းလျှောမှု ဖြစ်ပွားနေလျက်ရှိကြောင်း သိရသည်။

စစ်ဘေးရှောင်များသည် ဝမ်းလျှောရောဂါကို ဆေးဝါးကူညီထောက်ပံ့မှု မရရှိကြောင်း ၊ ကျေးရွာတွင်း ဆေးခန်းငယ်တွေမှာ ကုသနေရကြောင်း၊ ဆေးဝါးတွေကို မြို့တွင်း သွားရောက်ဝယ်ယူသော်လည်း လုံလောက်မှု မရှိကြောင်း မိုးဗြဲမြို့ စစ်ဘေးရှောင်ကို ကူညီပေးနေသူက ပြောသည်။

“ဆေးဝါးတွေကတော့ လာထောက်ပံ့ပေးတာ မရှိပေမယ့်လည်း စစ်ဘေးရှောင် ကမ့်တွေမှာ ဆေးခန်းတွေမှာပြပြီး ကုသတာတော့ ရှိတယ်။ ကျနော်တို့ဘက်က အတတ်နိုင်ဆုံးတော့ ဆရာမတွေက ဆေးပေးတယ်။ ကျနော်တို့ ကိုယ်တိုင်ကလည်း မြို့ထဲမှာ ဆေးသွားဝယ်တာရှိတယ်။ လုံလောက်မှုတော့ မရှိဘူး။ တစ်ချို့လူတွေက ဝမ်းလျှောရင် ကိုယ့်မှာရှိတဲ့ တိုင်းရင်းဆေးတွေနဲ့ ကုသနေတာရှိတယ်” ဟု ၎င်းက ပြောသည်။

လက်ရှိ စစ်ဘေးရှောင်တွေသည် ဆေးဝါးခက်ခဲမှု ရှိနေသည့်အတွက်ကြောင့် ကူညီထောက်ပံ့မှုများ လိုအပ်နေသည်။

မိုးဗြဲမြို့အတွင်း စစ်ဘေးရှောင်စခန်းသည် ၃၀ ဝန်းကျင်လောက် ရှိထားကြောင်း သိရသည်။