သျှမ်းပြည် မူဆယ်ခရိုင် ကွတ်ခိုင်မြို့နယ်ရှိ ကချင်လွတ်မြောက်ရေးတပ်မတော် (KIA) နှင့် စစ်ကောင်စီ တပ်ဖွဲ့တို့ ၆ ရက်ဆက်တိုက် တိုက်ပွဲဖြစ်ပွားနေမှုကြောင့် ဒေသခံများ လုပ်ငန်းခွင် မဝင်ရသဖြင့် ဝင်ငွေ ထိခိုက်မှု ရှိလာကြောင်း စုံစမ်းသိရသည်။

ပြီးခဲ့သည့် ဖေဖော်ဝါရီလ ၁၂ ရက်နေ့ ညပိုင်းမှ စတင်ကာ ကွတ်ခိုင်မြို့နယ် ကောင်းလိန်အုပ်စု အတွင်း နှစ်ဖက် ထိတွေ့တိုက်ပွဲ ဖြစ်ပွားခဲ့ပြီး ဒေသခံများက တိုက်ပွဲအတွင်းမှ လက်နက်ကြီးများ ထိမှန်မည်ကို စိုးရိမ်မှုကြောင့် အပြင်မထွက်ရဲ ကြကြောင်း ကောင်းလိန်အုပ်စုမှ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

“ရွာဘက်ကို လက်နက်ကြီးကျမှာ၊ စစ်သားတွေ လာပစ်မှာကို ကြောက်လို့ အပြင်မထွက်ရဲကြဘူး၊ လုပ်ငန်းခွင်လည်း မသွားရဲကြဘူး၊ အဆင်ပြေတဲ့ သူတွေအတွက်တော့ ဘာမှ မဖြစ်ပေမဲ့၊ သိပ်အဆင်မပြေတဲ့သူတွေ အတွက် တော့ ခက်ခဲတာပေါ့၊ စားရေးသောက်ရေးတွေ ဝင်ငွေပိုင်း လိုအပ်ချက်တွေ ရှိလာတယ်” ဟု ကောင်းလိန်ဒေသခံ အမျိုးသားက ပြောသည်။

လက်ရှိ တိုက်ပွဲဖြစ်ပွားရာသည် ကွတ်ခိုင်မြို့နယ် ကောင်းလိန်အုပ်စုမှ နားဖယ်ရွာ၊ ကောင်းလိန်ရွာ ၊ မန်ပြိန်းအုပ်စုမှ ကောင်းခမ်းရွာ နှင့် ခါဖော့ရွာတို့နှင့် နီးစပ်နေသည့်အကြောင်းလည်း သိရသည်။

အဆိုပါ တိုက်ပွဲသည် ကွတ်ခိုင်မြို့နယ် ကောင်းလိန်ကျေးရွာအုပ်စု ဘက်ရှိ KIA တပ်မဟာ – ၆၊ တပ်ရင်း – ၉ ဌာနချုပ်ကို ဦးတည်ပြီး စစ်ကောင်စီ တပ်ဖွဲ့က တိုက်ခိုက်နေကြောင်း ၃ ရက်နေ့ မြောက် တိုက်ပွဲတွင် စစ်ကောင်စီဘက် လေယာဥ် စစ်ကူ ဖြင့် ဗုံးကြဲတိုက်ခိုက်မှု ရှိခဲ့ကြောင်းလည်း သိရသည်။

“၃ ရက်မြောက် တိုက်ပွဲမှာ (ဖေဖော်ဝါရီလ ၁၄) ရက် က စစ်ကောင်စီမှ လေယာဥ်နဲ့လာပြီးတော့ ဗုံးကြဲတာ အများကြီးပဲ အလုံးရေတွေ မရေနိုင်ဘူး၊ တိုက်ပွဲဖြစ်တဲ့ နေရာနဲ့ ရွာနဲ့က ၃ ဖာလုံလောက်ဝေးတယ်၊ ရွာဘက်ကိုတော့ မကျဘူး” ဟု ကောင်းလိန်ဒေသခံက ထပ်လောင်းပြောသည်။

ထို့အပြင် ယမန်နေ့ ဖေဖော်ဝါရီလ ၁၇ ရက်နေ့တွင်လည်း မနက်ပိုင်း ၈ နာရီမှ နေ့လည်ပိုင်း ၁၂ နာရီ အထိ တိုက်ပွဲပစ်ခတ်သံများ ကြားရကြောင်း ဒေသခံများက ပြောသည်။

ပြီးခဲ့သည့် ဖေဖော်ဝါရီ ၉ ရက်နေ့မှာလည်း ခြေလျင်တပ်အပြင် ကားဖြင့်ပါ KIA တပ်ရင်း – ၉ ဘက် ရိက္ခာ နှင့် အင်အား ထပ်ဖြည့်ပြီး စစ်ကြောင်းထိုးလာသည့် တပ်မ ၉၉ ဖြင့် ကေအိုင်အေ တပ်မဟာ – ၄၊ တပ်ရင်း – ၈ တို့အကြား ကွတ်ခိုင် – သိန္နီကြား ၃၈ မိုင် မန်ပြိန်းအုပ်စုရှိ ကောင်းခမ်းရွာ၊ လွယ်ဆမ်ဆစ်တောင်နားက နမ့်ပါချီးရွာ အနီးတို့တွင် တိုက်ပွဲ ဖြစ်ပွား ခဲ့သည်။

ထို့အပြင် ဖေဖော်ဝါရီလဆန်းပိုင်းအတွင်း နမ့်ဖလွန်ရွာတောင်ဘက် KIA တပ်မဟာ – ၆ တပ်ရင်း – ၉ နှင့် စစ်ကောင်စီ ခလရ ၄၅ တပ် တို့အကြား ထိတွေ့ တိုက်ပွဲဖြစ်ပွားခဲ့သည့်အတွက် အရပ်သား တဦး ထိခိုက်ဒဏ်ရာ ရရှိခဲ့သည်။

အာဏာသိမ်း စစ်ကောင်စီ တပ်ဖွဲ့သည် ၂၀၂၃ ခုနှစ် ဇန်နဝါရီလ ၁ ရက်မှ စပြီး ဒီဇင်ဘာ (၃၁) ရက်ထိ တစ်နှစ်ကြာ အပစ်ရပ် ကြေညာထားသော်လည်း စစ်ကောင်စီတပ်၏ တိုင်းရင်းသားဒေသများထံ တိုက်လေယာဥ်ဖြင့် ထိုးစစ်ဆင်မှု နှင့် စစ်မြေပြင် ထိတွေ့တိုက်ပွဲများ ဆက်လက် ဖြစ်ပွားနေဆဲ ဖြစ်သည်။