သျှမ်းပြည် တောင်ကြီးခရိုင် ပင်လောင်းမြို့တွင် မိုးသည်းထန်စွာ ရွာသွန်းမှုကြောင့် စစ်ရှောင်စခန်းများ မိုးကာ လိုအပ်နေသေးကြောင်း စုံစမ်းသိရှိရသည်။
ယနေ့ (ဖေဖော်ဝါရီ ၁၇ ရက်) မနက်ပိုင်း ၅ နာရီဝန်းကျင် အချိန်၌ ပင်လောင်းမြို့နယ်အတွင်းတွင် မိုးများစတင်ရွာသွန်းကာ မိုးသီးများကြွေကျနေသဖြင့် မိုးကာဖြင့် ဖြစ်သလို ဆောက်ထားရသည့် စစ်ရှောင်စခန်းတွင် မိုးလုံလေလုံမရှိကြောင်း၊ မိုးကာအဆောက်အဦးများ အရေးပေါ် လိုအပ်နေကြောင်း စစ်ရှောင်ကူညီသူဒေသခံတစ်ဦးက ပြောသည်။
“ မိုးကာ နဲ့ ဆောက်ထားရင် မိုးကြီးရွာရင် မလုံဘူးဗျ။ အကာက ဖြစ်သလို ကာထားတော့ မိုးမလုံဘူး။ ကောင်းကောင်း ကာထားဖို့လည်း မတတ်နိုင်ကြဘူးလေ။ ဒီမနက် မိုးကြီးရွာတော့ မိုးတွေယိုတယ်၊ သူတို့ အနေအထိုင် အခင်းတွေက အစ အမိုးအကာတွေကော အခက်ခဲဖြစ်နေတယ် “ ဟု ၎င်းက ပြောသည်။
ပင်လောင်းမြို့နယ်အတွင်း စစ်ရှောင်စခန်း စုစုပေါင်း ၂၀ ခန့်ရှိရာ မိုးလုံလေလုံ မရှိသေးသည့် ကျေးရွာဘက်ရှိ စစ်ရှောင်စခန်းအများစုသည် မိုးကာ၊ အထိုင်အခင်း၊ စောင်များ လိုအပ်နေကြောင်း သိရသည်။
ထို့အပြင် ပင်လောင်းမြို့အဝင် ပြည်ထောင်စု ကားလမ်းမပေါ်တွင် စစ်ကောင်စီ စစ်ဆေးရေးဂိတ်များ ရှိနေသောကြောင့် စစ်ရှောင်များအတွက် ရိက္ခာများ သယ်ယူရန် အခက်အခဲဖြစ်နေသေးကြောင်းလည်း ပင်လောင်းမြို့မှ ယာဥ်မောင်းတစ်ဦးက သျှမ်းသံတော်ဆင့်ကိုပြောသည်။
“အသွားအလာတော့ ခက်ခဲနေတယ်ဗျ။ ဆေးဝါး၊ ရိက္ခာ ပစ္စည်းတစ်ခုခု သယ်လာရင် စစ်ဆေးမေးမြန်းတယ်။ ဆေးဝါး၊ ရိက္ခာတွေ အများကြီး သယ်လာတာတွေ့ရင် သိမ်းမယ်။ အသွားအလာတော့ ခက်ခဲနေဆဲဘဲ “ ဟု ယာဥ်မောင်းက ပြောသည်။
စစ်တပ်က အာဏာသိမ်းပြီးနောက်ပိုင်း ကယားပြည် (ကရင်နီ) တွင် တိုက်ပွဲကြောင့် ပင်လောင်းမြို့နယ် အတွင်းသို့ ထွက်ပြေးတိမ်းရှောင်နေရသည့် စစ်ရှောင်ဦးရေသည် (၅,၀၀၀) ကျော် ရှိနေကြောင်း သိရသည်။
Leave a Comments