သျှမ်းပြည် အခြေစိုက် ပအိုဝ်းအမျိုးသား အဖွဲ့ချုပ် (PNO/PNA) မှ စစ်ကောင်စီတို့ လုပ်ဆောင်မည့် ၂၀၂၃ ခုနှစ် ရွေးကောက်ပွဲ အတွက် နိုင်ငံရေး မှတ်ပုံတင် တင်သွင်းထားကြောင်း သတင်းသိရသည်။
ပြီးခဲ့သည့် ဖေဖော်ဝါရီလ ၁၆ ရက်တွင် နိုင်ငံရေးပါတီများ မှတ်ပုံတင်ခြင်းဆိုင်ရာ ဥပဒေ ပုဒ်မ ၂၅ အရ ပအိုဝ်းအမျိုးသား အဖွဲ့ချုပ် (PNO/PNA) က နိုင်ငံရေးပါတီ အဖြစ် ဆက်လက်တည်ထောင်ရန် နိုင်ငံရေး မှတ်ပုံတင် တင်သွင်းလိုက်ပြီ ဖြစ်ကြောင်း စစ်ကောင်စီပိုင် ကြေးမုံသတင်းစာတွင် ရေးသားထားသည်။
အဆိုပါ ထုတ်ပြန်ချက်တွင် ပအိုဝ်းအမျိုးသား အဖွဲ့ချုပ် (PNO/PNA) ပါတီမှ နိုင်ငံရေး ပါတီအဖြစ် ဆက်လက် ရပ်တည် လိုခွင့် နှင့် မှတ်ပုံတင်ခွင့် တင်သွင်းရာ ပြည်ထောင်စု ရွေးကောက်ပွဲ ကော်မရှင်က ဆက်လက် စိစစ်နေဆဲ ဖြစ်ကြောင်း ထုတ်ပြန်ချက်၌ ပါရှိသည်။
ပအိုဝ်းအမျိုးသား အဖွဲ့ချုပ်သည် စစ်အာဏာသိမ်းမှု မဖြစ်ခင် ပြီးခဲ့သည့် ၂၀၁၅ မှ ၂၀၂၀ အစိုးရသက်တမ်းတွင် ပါတီကိုယ်စားပြု လွှတ်တော် ကိုယ်စားလှယ်များ အဖြစ် ပြည်နယ်လွှတ်တော်မှ ၆ ဦး၊ ပြည်သူ့လွှတ်တော်မှ ၃ ဦး၊ အမျိုးသား လွှတ်တော်မှ ၁ ဦး ဖြင့် အနိုင်ရ တိုင်းရင်းသား ပါတီ တစ်ခုဖြစ်သည်။
၂၀၂၃ ရွေးကောက်ပွဲအတွက် စစ်ကောင်စီ၏ နိုင်ငံရေးပါတီများ ဆိုင်ရာ ဥပဒေသစ်အရ တနိုင်ငံလုံး အဆင့်ဖြင့် ရွေးကောက်ပွဲ ဝင်မည့် နိုင်ငံရေးပါတီများသည် ပါတီရန်ပုံငွေ ကျပ်သိန်း ၁ ထောင် တင်ပြနိုင်မှသာ နိုင်ငံရေးပါတီ အဖြစ် မှတ်ပုံတင်လျှောက်ထားနိုင်မည် ဖြစ်သည်။
ပြည်နယ်/တိုင်းမှာပဲ ရွေးကောက်ပွဲဝင်မည့် ပါတီများသည်လည်း ယခင် အရပ်သား အစိုးရလက်ထက်က ပေးသွင်း ရသည့် ရန်ပုံငွေ ကျပ် ၃ သိန်းအစား ဥပဒေသစ်အရ ကျပ်သိန်း ၁၀၀ ပြနိုင်မှသာလျှင် နိုင်ငံရေး ပါတီ မှတ်ပုံတင် တင်နိုင်မည် ဖြစ်သည်။
ထို့အပြင် တနိုင်ငံလုံး အတိုင်းအတာဖြင့် ရွေးကောက်ပွဲဝင်မည့်ပါတီသည် ပါတီမှတ်ပုံတင်ပြီး ရက်ပေါင်း ၉၀ အတွင်း ပါတီဝင်အင်အား ၁ သိန်း ရှိရမည်ဖြစ်ပြီး ပြည်နယ် နှင့် တိုင်းအဆင့် ဝင်ပြိုင်မည့် ပါတီအတွက် ပါတီဝင် လူအင်အား ၁ ထောင် စည်းရုံးနိုင်ရမည်ဟု သတ်မှတ်ထားသည်။
စစ်တပ်မှ နိုင်ငံတော် အာဏာသိမ်းပြီး ၂၀၂၂ ခုနှစ် မေလမှ စပြီး ပအိုဝ်းပြည်သူ့စစ်တပ်ဖွဲ့ (PNO/PNA) က တစ်အိမ် လျှင် ငွေ ၃ သောင်း နှင့် ဆန်တစ်ပြည်ကို တောင်းခံခဲ့ပြီး ရပ်ရွာလုံခြုံရေးအတွက် ကျေးရွာတစ်ခုကို အမျိုးသား လူငယ် အယောက် ၂၀ တောင်းခံမှု ပြုလုပ်ခဲ့သည်။
လက်ရှိတွင်လည်း ပအိုဝ်းပြည်သူ့စစ်တပ်ဖွဲ့ (PNO/PNA) စစ်သင်တန်းခေါ်ယူခြင်းသည် စုစုပေါင်း (၇) ကြိမ်မြောက် ရှိလာပြီဖြစ်ရာ အဆိုပါ ရပ်ရွာလုံခြုံရေးအကြောင်းပြသည့် PNO/PNA စစ်သင်တန်းကို ဒေသခံလူငယ်များက သဘောမကျ ကြကြောင်းလည်း စုံစမ်းသိရှိရသည်။
