Thursday, April 18, 2024

နောင်ချိုအတွင်း PDF သတင်းများ ထပ်မံကြားရပါက ရွာကို မီးရှို့မည်ဟု စစ်ကောင်စီ ခြိမ်းခြောက်ပြော

Must read

သျှမ်းပြည် ကျောက်မဲခရိုင် နောင်ချိုမြို့နယ်အတွင်း PDF တပ်ဖွဲ့ သတင်းများ ထပ်မံကြားသိရပါက ရွာကို မီးရှို့မည်ဟု စစ်ကောင်စီ တပ်ဖွဲ့က ခြိမ်းခြောက် ပြောဆိုခဲ့ကြောင်း သတင်းသိရသည်။

မန္တလေးတိုင်း PDF

ပြီးခဲ့သည့် ဖေဖော်ဝါရီလ ၁၀ ရက်တွင် နောင်ချိုမြို့နယ်အတွင်း မန္တလေး PDF နှင့် စစ်ကောင်စီတို့ ထိတွေ့တိုက်ပွဲ ဖြစ်ပွားခဲ့စဥ် စစ်ကောင်စီတို့က နောင်ချိုမြို့နယ်မှ ရွာသား တချို့ကို ဖမ်းဆီးသွားပြီး ပြောဆို ခြိမ်းခြောက် သည့်အကြောင်း အမည်မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

“ရွာသား ၇ ယောက်ကို ဖမ်းသွားပြီး ၆ ယောက်က ပြန်လွတ်လာတယ်၊ ၁ ယောက်ကိုတော့ PDF နဲ့ ပတ်သက်တယ်ဆိုတဲ့ စွပ်စွဲချက်နဲ့ သတ်လိုက်တာ၊ ပြီးတော့ ဒီနယ်ထဲမှာ PDF တွေ ကြားရမယ်ဆိုရင် ရွာကို မီးရှို့မယ်တဲ့၊ အဲ့လို ခြိမ်းခြောက်သွားတယ်၊ အခုလည်း သူတို့လေယာဥ်ကနေ ဗုံးကြဲလို့ ရွာက ဘုန်းကြီးကျောင်း အပါအဝင် အိမ်တွေတော်တော် ပျက်စီးတယ်” ဟု အမည်မဖော်လိုသူ ဒေသခံက ပြောသည်။

လက်ရှိတွင် တိုက်ပွဲများ ငြိမ်သက်သွားသော်လည်း စစ်ကောင်စီတပ်သည် နောင်ချိုမြို့နယ် လုံခန်ကျေးရွာ အနီး တစ်ဝိုက်တွင်သာ တပ်ဆုတ်ခွာသွားသည့်အတွက် ဒေသခံများက စိုးရိမ်ကြောက်လန့်နေရသည့်အကြောင်းလည်း သိရသည်။

ထို့အပြင် တိုက်ပွဲ ဖြစ်ပွားစဥ်အတွင်း၌ စစ်ကောင်စီတပ်၏ လေကြောင်းဖြင့် ပစ်ခတ်တိုက်ခိုက်မှုကြောင့် လုံခန်ကျေးရွာရှိ သာသနာ့ အဆောက်အဦးများ အပါအဝင် ဒေသခံအနေအိမ် အများအပြား လက်နက်ကြီး ထိမှန် ပျက်စီးခဲ့ရသည့်အတွက် ပြန်လည်ပြုပြင်ရန် အကူအညီများ လိုအပ်နေကြောင်းလည်း အထက်ပါ ဒေသခံက ဆက်ပြောသည်။

“ဘုန်းကြီးကျောင်းရော စေတီတွေရော တော်တော်ကို ပျက်စီးသွားတယ်၊ ပြီးတော့ အိမ်နှစ်လုံးကလည်း ခေါင်မိုး တည့်တည့်ကနေ ဗုံးကျမှန်တာ၊ တခြား လက်နက်အပိုင်းအစတွေ နဲ့ စစ်သားတွေ ဖောက်ထွင်းလို့ ပျက်တဲ့အိမ်တွေလည်း ၂၀ ထက် မနည်းဘူး၊ ဒါတွေကို ပြန်လည်ပြုပြင်ဖို့အတွက် အကူအညီတွေ လိုအပ်ပါတယ်” ဟု ၎င်းက ဆိုသည်။

စစ်ကောင်စီတပ်ကြောင့် အဆောက်အုံ နေအိမ်များ ထိခိုက်ပျက်စီးရသည့်အပြင် ရွာသား ၁ ဦး နှင့် ကျွဲတစ်ကောင် လည်း အသတ်ခံရကြောင်း ဒေသခံများထံမှ သိရသည်။

လက်ရှိတွင် အသတ်ခံလိုက်ရသည့် ရွာသား၏ ရုပ်အလောင်းကို ပြန်မတွေ့ရသေးသော်လည်း ရွာ၏ အနီး ပတ်ဝန်းကျင် နေရာယူထားသည့် စစ်ကောင်စီတပ်ဖွဲ့ကြောင့် ရွာသားများလည်း သွားရောက်ရှာဖွေခြင်း မပြု ရဲသေးပေ။

အာဏာသိမ်း စစ်ကောင်စီ တပ်ဖွဲ့သည် ၂၀၂၃ ခုနှစ် ဇန်နဝါရီလ ၁ ရက်မှ စပြီး ဒီဇင်ဘာ (၃၁) ရက်ထိ တစ်နှစ်ကြာ အပစ်ရပ် ကြေညာထားသည့်အပြင် တိုင်းရင်းသား လက်နက်ကိုင် တပ်ဖွဲ့များ နှင့် ငြိမ်းချမ်းရေးအတွက် ဆွေးနွေးမှုများ ရှိနေသော်လည်း စစ်ကောင်စီတပ်၏ စစ်မြေပြင်တွင် တိုက်ပွဲများ ဆက်လက် ဖြစ်ပွားနေဆဲ ဖြစ်သည်။

Leave a Comments

- Advertisement -spot_img

Latest article