ထိုင်းနိုင်ငံ ဆမွတ်ပရကန်ခရိုင်တွင် လူသတ်မှု ပြစ်မှုကျူးလွန်သူ မြန်မာလုပ်သား ၄ ဦးကို ဖမ်းဆီးရမိကြောင်း စုံစမ်းသိရှိရသည်။

ယမန်နေ့ (ဖေဖော်ဝါရီ ၁၅ ) ရက်တွင် ထိုင်းနိုင်ငံ ဆမွတ်ပရကန်ခရိုင် ပန်ဖီမြို့နယ်မှ မြန်မာလုပ်သား အမျိုးသား ၂ ဦး နှင့် ရယောင်းခရိုင်မှ မြန်မာလုပ်သား အမျိုးသား ၂ ဦးကို လူသတ်မှုဖြင့် ကြီးကြပ်ရေးမှုးဝန်ကြီးဌာန ထိုင်းရဲဖွဲ့က ဖမ်းဆီးရမိကြောင်း ထိုင်းသတင်း မီဒီယာမှတစ်ဆင့် လူမှုကွန်ရက်စာမျက်နှာပေါ်တွင် ရေးသားဖော်ပြထားသည်။

ဖြစ်စဉ်မှာ ၎င်း မြန်မာလုပ်သား အမျိုးသား ၄ ဦးသည် ပြီးခဲ့သည့် (ဖေဖော်ဝါရီ ၁၂ ) ရက် နံနက်ပိုင်း ၉ နာရီခွဲတွင် ထိုင်းနိုင်ငံ ဆမွတ်ပရကန်ခရိုင် ပန်ပူမြို့နယ် ကွန်ဒိုတိုက်ခန်းတစ်ခုပေါ်၌ ဗိုလ်မိုးဟိန်း (အလုပ်ရှာဖွေရေး) မှ ပွဲစားတစ်ဦးကို အဝတ်စဖြင့် လက်ပြန်ကြိုးတုတ်ပြီး ပါးစပ်ကိုပိတ်ကာ ဘယ်ဖက် ရင်ဘတ်ကို ၁ ချက်၊ ကျောကို ၁ ချက် ဓားဖြင့် ထိုးသတ်ခဲ့ကြောင်း သိရသည်။

အဆိုပါ ဗိုလ်မိုးဟိန်း (အလုပ်ရှာဖွေရေး) ဆိုသူသည် ၎င်းမြန်မာလုပ်သား ၄ ဦးကို အလုပ်ရှာပေးမည်ဟုဆိုကာ ထိုင်းဘတ်ငွေ ၁၀,၅၀၀ ဘတ်ယူပြီး အလုပ်မရှာပေးသဖြင့် မြန်မာလုပ်သားများ ငွေပြန်လည်တောင်းယူသည့်အခါတွင် စကားများ ရန်ဖြစ်ရာမှ ဓားထိုးသတ်မှု ဖြစ်ခဲ့ကြောင်း ထိုင်းနိုင်ငံရောက် ရွှေ့ပြောင်း အလုပ်သမား စိုင်းဆုက ပြောသည်။

“ သူတို့ ၄ ယောက်က ထိုင်းကိုရောက်တာ မကြာသေးဘူး၊ ရဖို့အလုပ် ရှာကြတာ။ ဗိုလ်မိုးဟိန်း ဆိုတဲ့ တစ်ယောက်က အလုပ်ရှာပေးမယ် တစ်ယောက်ကို ဘတ်ငွေ (၂,၀၀၀) ပေးဆိုပြီး တောင်းတယ်။ ၂ ပတ်လောက်ကြာသွားတာ ထင်တယ်။ အလုပ်လည်း မရှာပေးဘူးဆိုတော့ သူတို့ ၄ ယောက်က ပိုက်ဆံပြန်တောင်းရင်း စကားများ ရန်ဖြစ်ပြီး ပွဲစားကို သတ်လိုက်တာ“ ဟု စိုင်းဆုက ပြောသည်။

ပြစ်မှုကျူးလွန်သူ မြန်မာလုပ်သား ၄ ဦးထဲမှ အသက် ၂၄ နှစ် ဆွေနှောင်၊ အသက် ၂၆ နှစ် ဇင်မင်းဦး၊ အသက် ၂၀ နှစ် လမင်းသူ နှင့် အသက် ၂၀ နှစ် ပိုင်သူ တို့ ဖြစ်ကြကြောင်း သိရသည်။

လက်ရှိတွင် ပြစ်မှုကျူးလွန်သူ မြန်မာလုပ်သား ၄ ဦးကို ကြီးကြပ်ရေးမှူးဝန်ကြီးဌာန ထိုင်းရဲတပ်ဖွဲ့က ဖမ်းဆီးထားပြီး ပြစ်မှုကျူးလွန်သူကို ထိုင်းတရား ဉပဒေဖြင့် အရေးယူဆောင်ရွက်သွားမည် ဖြစ်ကြောင်းလည်း သိရသည်။

ထို့အပြင် အလုပ်ရှာဖွေရေး ပွဲစားကို လက်ပြန်ကြိုးတုတ် သတ်ဖြတ်မှု နှင့် ပတ်သက်ပြီး “ ကျနော်တို့ မြန်မာနိုင်ငံသားတွေ ရေကြည်ရာ မြက်နုရှာ ထိုင်းနိုင်ငံကို လာကြတယ်။ ဒီက အလုပ်ရှာဖွေရေး ပွဲစားတွေလည်း အလုပ်မရှာပေးနိုင်ရင် ပိုက်ဆံမတောင်းပါနဲ့။ အခုမှ သူတို့ ထိုင်းကိုရောက်လာတာ အလုပ်လည်းမရှိ၊ ပိုက်ဆံလည်း မရှိဘူး “ ဟု ၎င်းက ထပ်လောင်းပြောသည်။

ပြီးခဲ့သည့် ၂၀၂၃ ဇန်နဝါရီ ၁၅ ရက်တွင် ထိုင်းနိုင်ငံရောက် မြန်မာလုပ်သား အသက် ၃၁ နှစ် ခွန်သူရိန်စိုးမှာ ပျောက်ဆုံးသွားသဖြင့် ၎င်း၏ ဆွေမျိုးအသိုင်းအဝိုင်း နှင့် သူငယ်ချင်းများက လိုက်လံရှာဖွေရာ ဓားဒဏ်ရာဒဏ်ချက်ဖြင့် သေဆုံးနေသည့် အလောင်းကို ပြန်ရှာတွေ့ခဲ့ကြောင်း သိရသည်။