သျှမ်းပြည် ကျောက်မဲခရိုင် နောင်ချိုမြို့နယ်အတွင်း စစ်ဘေးရှောင်များတချို့ စစ်ကောင်စီ နှင့် PDF များရွာပတ်လည်တွင် တည်ရှိနေသဖြင့် တိုက်ပွဲပြန်ဖြစ်မည်ကို စိုးရိမ်စိတ်ဖြင့် နေရပ်ပြန်ရကြောင်း စုံစမ်းသိရသည်။
ပြီးခဲသည့် ဖေဖော်ဝါရီ ၁၄ ရက်တွင် နောင်ချိုမြို့နယ် ဒိုးပင်ကျေးရွာအုပ်စု ဟိုခိုကျေးရွာ ဘုန်းကြီးကျောင်းအတွင်း ရှိ စစ်ဘေးရှောင် ၅၀၀ ဝန်းကျင်သည် နေရပ်သို့ ပြန်သွားခဲ့ကြောင်း သိရသည်။
“ စစ်ဘေးရှောင်တွေကတော့ ကြောက်ကြောက်နဲ့ပဲ ပြန်သွားလိုက်ပြီ။ စစ်ကောင်စီတပ်ကတော့ တပ်မဆုတ်သေးဘူး။ ကျေးရွာဘက်တွေ သွားလာနေသေးတယ်။ ပြီးတော့ PDF , TNLA တို့ကလည်း တောတွေထဲ ရှောင်တိမ်းနေတာရှိတယ်။ ပြည်သူတွေက ပြန်သွားပြီးတော့ အခြေနေစောင့်ကြည့်နေကြတာပေါ့။ ပြန်သွားလဲ လုံခြုံမှုတွေ အပြည့်မရှိသေးဘူး။ စိတ်ပူနေရသေးတယ်။ ဖြစ်နိုင်ရင်တော့ ကျေးရွာတွေထဲမှာ တိုက်ပွဲမဖြစ်စေချင်ဘူး” ဟု နောင်ချိုမြို့ ဒေသခံအမျိုးသား တစ်ဦးက ပြောသည်။
အဆိုပါ စစ်ဘေးရှောင်များသည် နေရပ်သို့ ပြန်သွားရခြင်းသည် အလုပ်အကိုင် ပြန်လုပ်ရန် နှင့် တိုက်ပွဲငြိမ်သွားသည့်အတွက်ကြောင့် ပြန်သွားကြောင်း စစ်ဘေးရှောင်တစ်ဦးက ပြောသည်။
“ ကျနော်တို့ ရွာမှာ အလုပ်ပြန်လုပ်ရအုံးမယ်လေ။ အခုက ပြောင်းဖူးချိန်ဆိုတော့ ပြောင်းဖူးတွေကို ပြန်ကြည့်ရအုံးမယ်။ အလုပ်ကလည်း မလုပ်ရင်လည်း မဖြစ်ဘူးလေ။ ပြီးတော့ လက်နက်သံတွေကလည်း ငြိမ်သွားပြီဆိုတော့ ပြန်လာခဲ့တာ။ ပြန်လာလည်း လုံခြုံမှုတွေကလည်း မရှိသေးဘူး။ အလုပ်ပြန်လာလုပ်ဖို့ ပြန်လာခဲ့တာ” ဟု စစ်ဘေးရှောင် အမျိုးသားက ပြောသည်။
နောင်ချိုမြို့နယ်တွင် စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့သည် ဖေဖော်ဝါရီ ၁၀ ရက်နေ့မှစပြီး တိုက်ပွဲဖြစ်ပွားကာ စစ်ကောင်စီဘက်မှ လေယာဉ်ဖြင့် ဝင်ရောက်တိုက်ခိုက်ခဲ့သည့်အတွက်ကြောင့် ပြည်သူ နေအိမ်တချို့ ပျက်စီးခဲ့သည်။
အလားတူ ပြီးခဲ့သည့် ၂၀၂၂ ခုနှစ် သြဂုတ်လ အတွင်းမှာလည်း စစ်ကောင်စီတပ်ဖွဲ့ နှင့် ဒေသခံပြည်သူ့ကာကွယ်ရေး ပူးပေါင်းတပ်ဖွဲ့တို့ တိုက်ပွဲဖြစ်ပွားခဲ့မှုကြောင့် ဒိုးပင်ကျေးရွာ ၊ ဟိုခိုရွာ နှင့် ကုလားကွဲရွာတို့က ဒေသခံ ၁,၀၀၀ ကျော် စစ်ရှောင်ထွက်ပြေးခဲ့ရသည်။
အာဏာသိမ်း စစ်ကောင်စီ တပ်ဖွဲ့သည် ၂၀၂၃ ခုနှစ် ဇန်နဝါရီလ ၁ ရက်နေ့မှ စပြီး ဒီဇင်ဘာ (၃၁) ရက်နေ့ထိ တစ်နှစ်ကြာ အပစ်ရပ် ကြေညာထားသော်လည်း စစ်မြေပြင်တွင် တိုက်ပွဲများ ဆက်လက် ဖြစ်ပွားနေဆဲ ဖြစ်သည်။
Leave a Comments