ထိုင်းနိုင်ငံ ဘန်ကောက်မြို့တွင် လေးထပ်တိုက် အဆောက်အဦး ပြိုကျမှုကြောင့် မြန်မာလုပ်သား ၅ ဦး ထိခိုက်ဒဏ်ရာ ရခဲ့ကြောင်း စုံစမ်းသိရှိရသည်။

ပြီးခဲ့သည့် ဖေဖော်ဝါရီ ၁၂ ရက် ညနေပိုင်း ၄ နာရီအချိန် ထိုင်းနိုင်ငံ ဟိုင်ခွမ်းခရိုင် Wat Uthai Tharam (ဝတ်ဥထိုင်းထားရမ်း) အနီး ဆောက်လက်စ အဆောက်အဦး လေးထပ်တိုက်တစ်ခု ပြိုကျမှုဖြစ်ပြီး မြန်မာလုပ်သား ၁၀၀ ကျော် ဘေးလွတ် ထွက်ပြေးတိမ်းရှောင်နိုင်ရာ ၅ ဦး ထိခိုက်ဒဏ်ရာ ရရှိခဲ့ကြောင်း ထိုင်းသတင်းမီဒီယာ Thaiger ဖော်ပြချက်အရသိရသည်။

“ ဆောက်လုပ်ရေးအတွက် အလုပ်သမား စုစုပေါင်း ၁၃၀ ဦးခန့် ငှားထားတယ်။ အများစုက မြန်မာလုပ်သားတွေ ဖြစ်ပါတယ်။ တိုက်မပြိုကျခင်မှာ အလုပ်သမား တချို့က တိုက်ပြိုတော့မယ်လို့ သတိပေးပြီး အရပ်ရပ်ကို ထွက်ပြေးတိမ်းရှောင်နိုင်ခဲ့တယ်။ မထွက်ပြေးနိုင်ခဲ့တဲ့ မြန်မာလုပ်သား ၅ ဦး ထိခိုက်ဒဏ်ရာရသွားတယ် “ ဟု ၎င်း သတင်းမီဒီယာတွင် ရေးသားဖော်ပြထားသည်။

အဆိုပါ လေးထပ်တိုက် အဆောက်အဦးသည် နှစ်ထပ်တိုက်ပေါ်ကနေ ပြိုကျလာသဖြင့် ထွက်မပြေးနိုင်သော မြန်မာလုပ်သား အမျိုးသား ၁ ဦး၊ အမျိုးသမီး ၂ ဦးသည် ဦးခေါင်းနှင့် ခန္ဓာကိုယ်ပေါ်တွင် ထိခိုက်ဒဏ်ရာ ရရှိခဲ့ကြောင်း နောက်ထပ် အမျိုးသမီး ၂ ဦးသည် အခင်းဖြစ်ပွားရာနေရာတွင် သတိလှစ်သွားကြောင်း ထိခိုက်ဒဏ်ရာရသူ မြန်မာလုပ်သား စုစုပေါင်း ၅ ဦးကို ပက်ချာရာဗက်ဆေးရုံသို့ ပို့ဆောင်ခဲ့သည်ဟု သိရသည်။

ထို့အပြင် ပြိုကျသွားသည့် လေးထပ်တိုက်ဆောက်လုပ်ရေး အဆောက်အအုံသည် ၂၀၂၂ ခုနှစ် ဇူလိုင် ၈ ရက်မှ ၂၀၂၃ ဇူလိုင် ၇ ရက်အထိ တစ်နှစ်အတွင်း ဆောက်လုပ်မည့် လူနေအိမ် နှင့် ရုံးခန်းအဆောက်အဦးများဖြစ်ကြောင်း၊ ယခု တိုက်ပြိုကျမှုဖြစ်ပွားပြီးနောက် လုပ်ငန်းများကို ရပ်ဆိုင်းပိတ်သိမ်းထားရသည်ဟု ဖော်ပြထားသည်။