သျှမ်းပြည် ကျောက်မဲခရိုင် နောင်ချိုမြို့တွင် ဖြစ်ပွားခဲ့သည့် စစ်ကောင်စီတပ်ဖွဲ့ နှင့် ပြည်သူ့ကာကွယ်ရေးတပ်မတော် (မန္တလေး) PDF တို့ တိုက်ပွဲဖြစ်ပွားကာ စစ်ကောင်စီဘက်မှ ၂၅ ဦး သေဆုံးပြီး လက်နက်ခဲယမ်းများကိုလည်း PDF တို့က သိမ်းဆည်းရမိကြောင်း သတင်းသိရသည်။

ပြီးခဲ့သည့် ဖေဖော်ဝါရီလ ၁၀ ရက်တွင် စစ်ကောင်စီဘက်မှ လေကြောင်း တိုက်ခိုက်မှု အပါအဝင် လက်နက်ကြီး လက်နက်ငယ် များဖြင့် MDF – PDF ကို ထိုးစစ်ဆင်တိုက်ခိုက်လာပြီး တိုက်ပွဲဖြစ်ပွားခဲ့ကာ စစ်ကောင်စီဘက်က ၂၅ ဦး သေဆုံးကြောင်း (MDY-PDF) က ထုတ်ပြန်ခဲ့သည်။

ပြည်သူ့ကာကွယ်ရေးတပ်မတော် (မန္တလေး) ၏ တပ်ရင်း/တပ်ဖွဲ့များရှိရာ ပြင်ဦးလွင် နှင့် နောင်ချိုဘက်သို့ စစ်ကောင်စီဘက်မှ ထိုးစစ်ဆင် တိုက်ခိုက်ရာ MDY- PDF များမှ ခုခံ တွန်းလှန်နိုင်ခဲ့ပြီး စစ်ကောင်စီထံမှ လက်နက်ခဲယမ်း မြောက်များစွာကိုလည်း သိမ်းဆည်းနိုင်ခဲ့ကြောင်း၊ တိုက်ပွဲ အတွင်း MDY PDF ဘက်မှ ရဲဘော် ၂ ဦး ကျဆုံးခဲ့ရပြီး မျက်မြင် အတည်ပြုချက်များအရ စစ်ကောင်စီဘက်မှ ၂၅ ဦးသေဆုံးပြီး ထိခိုက် ဒဏ်ရာရသူများလည်းရှိကြောင်း ထုတ်ပြန်ချက်တွင် ဖော်ပြထားသည်။

စစ်ကောင်စီဘက်မှ ထိခိုက်သေဆုံးမှုများ နှင့် ပတ်သက်ပြီး သျှမ်းသံတော်ဆင့်မှ သီးခြားအတည်ပြုနိုင်ခြင်း မရှိသေးပေ။

ထို့အပြင် အဆိုပါ တိုက်ပွဲ ဖြစ်ပွားမှုကြောင့် နောင်ချိုမြို့မှ ကျေးရွာ ၄ ရွာနေ ပြည်သူ ၁၅၀ ကျော်သည် နေအိမ်စွန့်ခွာကာ စစ်ရှောင်ထွက်ပြေးနေရသဖြင့် အစားအသောက် နှင့် အနွေးထည်အတွက် ကူညီထောက်ပံ့မှုများ လိုအပ်နေကြောင်းလည်း ဒေသခံများထံမှ သိရသည်။

“စစ်ရှောင်လာရတာကတော့ ၁၀ ရက်နေ့ ကတည်းကပေါ့၊ ဒီက ဘုန်းကြီး နဲ့ ရွာလူကြီးတွေကပဲ ကူညီပြီး စီစဥ်ပေးထားတယ်။ ဒါပေမယ့် လူပေါင်း ၁၅၀ ကျော် အတွက်တော့ မလုံလောက်နိုင်သေးဘူးပေါ့၊ အဓိကကတော့ အနွေးထည် နဲ့ အစားအသောက်တွေ ကူညီထောက်ပံ့မှု လိုအပ်တယ်” ဟု စစ်ရှောင်ကို ကူညီပေးနေသည့် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ စစ်ရှောင်ထွက်ပြေးရသူများသည် လုံခန်ရွာ၊ နားခါးရွာ၊ ခေးနင်းရွာ (ဒိုးပင်ရွာ)၊ ပိန်းညို့ရွာ နှင့် ကြံခင်း (ပိန်းအွယ်ကျေးရွာ) ဒေသခံရွာသား ၁၅၀ ကျော်တို့က ဟိုခိုရွာရှိ ဘုန်းကြီးကျောင်းသို့ စစ်ရှောင်ခိုလှုံနေပြီး လက်ရှိတွင် အစားအသောက် နှင့် အနွေးထည်များ လိုအပ်နေကြောင်း ဒေသခံများထံမှ သိရသည်။

လက်ရှိတွင် မြေပြင် ထိတွေ့တိုက်ပွဲ ငြိမ်သက်သွားသော်လည်း နှစ်ဖက်တပ်ဖွဲ့ စစ်ရေးတင်းမာမှုများ ရှိနေသေးသည့် အတွက် စစ်ရှောင်များက နေရပ်မပြန်နိုင်သေးပေ။

ပြီးခဲ့သည့် ၂၀၂၂ ခုနှစ် သြဂုတ်လ အတွင်းမှာလည်း စစ်ကောင်စီ တပ်ဖွဲ့ နှင့် ဒေသခံ ပြည်သူ့ကာကွယ်ရေး တို့ တိုက်ပွဲဖြစ်ပွားခဲ့မှုကြောင့် ခေးနင်းရွာ (ဒိုးပင်ရွာ)၊ ဟိုခိုရွာ နှင့် ကုလားကွဲရွာတို့က ဒေသခံ ၁,၀၀၀ ကျော် စစ်ရှောင်ထွက်ပြေးခဲ့ရသည်။

အာဏာသိမ်း စစ်ကောင်စီ တပ်ဖွဲ့သည် ၂၀၂၃ ခုနှစ် ဇန်နဝါရီလ ၁ ရက်နေ့မှ စပြီး ဒီဇင်ဘာ (၃၁) ရက်နေ့ထိ တစ်နှစ်ကြာ အပစ်ရပ် ကြေညာထားသော်လည်း တကယ်တမ်း စစ်မြေပြင်တွင် တိုက်ပွဲများ ဆက်လက် ဖြစ်ပွားနေဆဲ ဖြစ်သည်။