သျှမ်းပြည် ကျောက်မဲခရိုင် နောင်ချိုမြို့တွင် စစ်ကောင်စီ တပ်ဖွဲ့ နှင့် ဒေသခံပြည်သူ့ကာကွယ်ရေး ပူးပေါင်း တပ်ဖွဲ့ (PDF) တို့ တိုက်ပွဲကြောင့် ဒေသခံ ရွာသား ၁၅၀ ကျော် စစ်ရှောင်ထွက်ပြေးနေရကြောင်း သတင်းရရှိသည်။
အဆိုပါ စစ်ရှောင်ထွက်ပြေးရသည့် နောင်ချိုမြို့နယ်မှ လုံခန်ရွာ၊ နားခါးရွာ၊ ခေးနင်းရွာ (ဒိုးပင်ရွာ) နှင့် ပိန်းညို့ရွာတို့မှ ဒေသခံရွာသား ၁၅၀ ကျော်တို့က ဟိုခိုရွာရှိ ဘုန်းကြီးကျောင်းသို့ စစ်ရှောင်ခိုလှုံနေပြီး လက်ရှိတွင် အစားအသောက်နှင့် အနွေးထည်များ လိုအပ်နေကြောင်း ဒေသခံများထံမှ သိရသည်။
“စစ်ရှောင်လာရတာကတော့ ၃ ရက်ရှိနေပြီပေါ့၊ ဒီက ဘုန်းကြီး နဲ့ ရွာလူကြီးတွေကပဲ ကူညီပြီး စီစဥ်ပေးထားတယ်။ ဒါပေမဲ့ လူပေါင်း ၁၅၀ ကျော် အတွက်တော့ မလုံလောက်နိုင်သေးဘူးပေါ့၊ အဓိကကတော့ အနွေးထည် နဲ့ အစားအသောက်တွေ လိုအပ်တယ်” ဟု စစ်ရှောင်ကို ကူညီပေးနေသည့် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ဖေဖော်ဝါရီလ ၁၀ ရက်တွင် အာဏာသိမ်း စစ်ကောင်စီ တပ်ဖွဲ့က တိုက်လေယာဥ် သုံးစီးဖြင့် နောင်ချိုမြို့နယ်အတွင်း လှုပ်ရှားနေသည့် PDF တပ်ဖွဲ့များကို ထိုးစစ်ဆင် တိုက်ခိုက်မှုကြောင့် ကျေးရွာ ၄ ရွာမှ ဒေသခံ ၁၅၀ ကျော်တို့က စစ်ရှောင်ထွက်ပြေးနေရခြင်းဖြစ်သည်။
ယင်းတိုက်ပွဲကြောင့် ဒေသခံများ စစ်ရှောင်ထွက်ပြေးရသည့်အပြင် လုံခန်ကျေးရွာမှ ဘုန်းကြီးကျောင်း လက်နက်ကြီးထိ ပျက်စီးသည့်အပြင် ဒေသခံ နေအိမ် ၂ အိမ်လည်း ပျက်စီးရကြောင်း ဒေသခံများက ပြောသည်။
“လုံခန်ရွာက အိမ် ၂ လုံး ပျက်တယ်၊ ဘုန်းကြီးကျောင်းလည်း ပျက်တယ်၊ တခြား မသိရသေးတဲ့ ထိခိုက်ပျက်စီးမှုလည်း ရှိကောင်းရှိမှာပါ။ တိုက်ပွဲအတွင်း ထိခိုက်ကျဆုံးမှုလည်း ရှိတယ်လို့ သတင်းတွေ ကြားရတယ်၊ ဒါပေမဲ့ အသေးစိတ်တော့ မသိရသေးဘူး” ဟု အထက်ပါ စစ်ရှောင်ကူညီသူ အမျိုးသားက ဆက်ပြောသည်။
လက်ရှိတွင် မြေပြင် ထိတွေ့တိုက်ပွဲ ငြိမ်သက်သွားသော်လည်း နှစ်ဖက် တပ်ဖွဲ့ စစ်ရေးတင်းမာမှုများ ရှိနေသေးသည့် အတွက် စစ်ရှောင်များက နေရပ်မပြန်နိုင်သေးကြောင်း ၎င်းက ဆက်ပြောသည်။
ပြီးခဲ့သည့် ၂၀၂၂ ခုနှစ် သြဂုတ်လ အတွင်းမှာလည်း စစ်ကောင်စီ တပ်ဖွဲ့ နှင့် ဒေသခံပြည်သူ့ကာကွယ်ရေး ပူးပေါင်းတပ်ဖွဲ့တို့ တိုက်ပွဲဖြစ်ပွားခဲ့မှုကြောင့် ခေးနင်းရွာ (ဒိုးပင်ရွာ)၊ ဟိုခိုရွာ နှင့် ကုလားကွဲရွာတို့က ဒေသခံ ၁,၀၀၀ ကျော် စစ်ရှောင်ထွက်ပြေးခဲ့ရသည်။
အာဏာသိမ်း စစ်ကောင်စီ တပ်ဖွဲ့သည် ၂၀၂၃ ခုနှစ် ဇန်နဝါရီလ ၁ ရက်နေ့မှ စပြီး ဒီဇင်ဘာ (၃၁) ရက်နေ့ထိ တစ်နှစ်ကြာ အပစ်ရပ် ကြေညာထားသော်လည်း တကယ်တမ်း စစ်မြေပြင်တွင် တိုက်ပွဲများ ဆက်လက် ဖြစ်ပွားနေဆဲ ဖြစ်သည်။
Leave a Comments