စစ်အာဏာသိမ်းပြီး စစ်သားများ အုပ်စုလိုက် မုဒိမ်းကျင့်မှု ၁၅ မှု ရှိနေကြောင်း မြန်မာအမျိုးသမီး များ သမဂ္ဂ (BWU) ထုတ်ပြန်ထားသည့် အစီရင်ခံစာ တွင်ရေးသားထားသည်။

ထိုအစီရင်ခံစာကို BWU မှ ဖေဖော်ဝါရီ ၆ရက်နေ့တွင် ထုတ်ပြန်ခဲ့ပြီး စစ်ကောင်စီ အာဏာသိမ်းသည့် ၂နှစ်တာကာလအတွင်း ကောက်ယူသည့် စာရင်းအရသိရသည်။

စစ်တပ်မှ အုပ်စုဖွဲ့ မုဒိမ်းကျင့်သည့်အမှုပေါင်း (၁၅)မှု ထိရှိခဲ့ပြီး အရပ်သားများမှ ကျူးလွန်သည့် မုဒိမ်းမှု (၁၀)မှု အထိရှိခဲ့ကာ စစ်တပ်၏ စစ်ကြောရေးစခန်းတွင် လိင်ပိုင်းဆိုင်ရာ ထိပါးနှောက်ယှက်မှု ၃မှု ရှိခဲ့သည်။

“ ဒီ ၁၅ မှုမှာက အကြမ်းဖက်စစ်တပ် အာဏာသိမ်းရန် ကြိုးပမ်းခဲ့တဲ့ ၂ နှစ်တာ ကာလကနေ စုစည်းထားတာ ဖြစ်ပါတယ်။ ဒီရထားတဲ့ အမှု ၁၅ မှုဟာဆိုရင် အကြမ်းဖက်စစ်တပ်ဘက်ကနေ အုပ်စုဖွဲ့ ကျူးလွန်တဲ့ မုဒိမ်းမှုတွေကို စုစည်းထားတာ ဖြစ်ပါတယ်။ ဒီ ၁၅ မှုဟာ အကျဉ်းထောင်ထဲက‌ အမှုတွေ မပါဝင်ပါဘူး” ဟု စစ်တမ်းကောက်ယူရာတွင် ပါဝင်သည့် BWU မှ တာဝန်ရှိသူတစ်ဦးက သျှမ်းသံတော်ဆင့်ကိုပြောသည်။

လက်ရှိကောက်ယူထားသည့် စစ်တမ်းများသည့် ခိုင်လုံသည့် သတင်းမီဒီယာမှ ပြုစုထားသည့် အမှုများဖြစ်ကြောင်း၊ လက်လှမ်းမီသည့် အမှုများသာဖြစ်ပြီး မြေပြင်တွင်မသိလိုက်သည့် အမှုများရှိနိုင်သေးကြောင်း ၎င်းက ဆိုသည်။

အရပ်သား အစိုးရထံကနေ တစ်ဆင့် စစ်တပ်မှ နိုင်ငံတော် အာဏာသိမ်းယူသည့် စစ်ကောင်စီကြောင့် အချိန်နှစ်နှစ် အတွင်း နိုင်ငံအနှံ့မှ အမျိုးသမီး ၄၁၄ ဦး သေဆုံးခဲ့ရပြီး ၂၇၇၈ ဦး ဖမ်းဆီးထိန်းသိမ်းခံခဲ့ ရကြောင်းလည်း မြန်မာ အမျိုးသမီးများသမဂ္ဂ အစီရင်ခံစာတွင် ဖော်ပြထားသည်။

ဖမ်းဆီးခံထားရသည့် နိုင်/ကျဥ်းအမျိုးသမီးများသည် ရန်ကုန်တိုင်းမှ ၇၅၈ ဦး အများဆုံးဖြစ်နေပြီး သျှမ်းပြည် နယ်စပ် ကရင်နီပြည် (ကယားပြည်) မှ ၉ ဦးပါဝင်ကြောင်း သိရသည်။

ထို့အပြင် အာဏာသိမ်းယူသည့် ကာလအတွင်း စစ်ကောင်စီတပ်မှ လက်နက်ကြီး လက်နက်ငယ်များ ပစ်ခတ်မှု၊ မြေပြင်သပိတ် အကြမ်းဖက်ဖြိုခွင်းမှု၊ စစ်ကြောရေးတွင် နှိပ်စက်ညှဉ်းပန်းမှုများကြောင့် အမျိုးသမီး ၄၁၄ ဦးထိ သေဆုံးခဲ့ရကြောင်း BWU၏ စစ်တမ်းတွင်ဖော်ပြထားသည်။

ယင်းကဲ့သို့ သေဆုံးမှုများအနက် ကျေးရွာတွေထဲစစ်ကြောင်းထိုးချိန် ပစ်ခတ်မှုကြောင့် သေဆုံးသူ ၇၈ ဦး၊ လေကြောင်း တိုက်ခိုက်မှုကြောင့် ၂၆ ဦး၊ ဖမ်းဆီးခံရချိန်တွင် သေဆုံးသူ ၅၃ ဦး နှင့် ဆန္ဒထုတ်ဖော်နေချိန် ပစ်ခတ်ဖြိုခွဲမှုကြောင့် ဦးခေါင်းကျည်ထိမှန် သေဆုံးသူ အယောက် ၂၀ ဦးရှိနေသည်။

လက်ရှိ အစီရင်ခံစာသည် နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ အချက်အလက် များကို အဓိက မှီငြမ်းကိုးကားထားခြင်းဖြစ်ပြီး လက်တွေ့မြေပြင် အချက်အလက် ကိန်းဂဏန်းများယခုထက်ပို၍ များနိုင်ကြောင်းလည်း မြန်မာ အမျိုးသမီးများ သမဂ္ဂက အစီရင်ခံစာ၌ ထည့်သွင်းဖော်ပြထားသည်။