သျှမ်းပြည် မူဆယ်ခရိုင် ကွတ်ခိုင်မြို့နယ်အတွင်းတွင် တိုင်းရင်းသား လက်နက်ကိုင် တပ်ဖွဲ့ နှင့် အာဏာသိမ်း စစ်ကောင်စီ တပ်ဖွဲ့တို့သည် နှစ်ရက်ဆက်တိုက် တိုက်ပွဲဖြစ်ပွားခဲ့ကြောင်း သတင်းသိရသည်။

ယနေ့ (ဖေဖော်ဝါရီ ၁၀) ရက် နံနက်ပိုင်း ၁၀ နာရီဝန်းကျင်တွင် ကွတ်ခိုင်မြို့ ရှုခင်းသာအနီး၌ ပစ်ခတ်သံများ ထွက်ပေါ်လာပြီး နမ့်ခိုက်ဂိတ်မှ စတင်ကာ ယာဥ်တန်းများ ရပ်နားထားရကြောင်း ဒေသခံ ကားသမား တစ်ဦးက သျှမ်းသံတော်ဆင့်ကို ပြောသည်။

“တိုက်ပွဲသံက လမ်းရဲ့ အပေါ်ဘက်မှာ ကြားရတာ၊ လမ်းမကြီး နဲ့ သိပ်ဝေးမယ်မထင်ဘူး၊ သေနတ်သံတွေက အတိုင်းသားကြားနေရတယ်၊ နမ့်ခိုက်က စစ်ကောင်စီ စစ်ဆေးရေးဂိတ်ကလည်း ကားသမားတွေကို ရှေ့ဆက် မသွားဖို့ တားထားကြတယ်၊ အဲ့မှာ နာရီဝက်လောက် ကြာပြီး အသံငြိမ်မှ ဆက်သွားခွင့်ပြုတာ” ဟု ကြုံတွေ့ရသည့် ကားသမားက ပြောသည်။

ကားသမားများသည် နာရီဝက်ကြာအောင် ရပ်ထားရပြီး ကားနှင့်အတူ တခြား ဆိုင်ကယ်သမားများ ဖြတ်သန်း သွားလာခွင့်လည်း နမ့်ခိုက်စစ်ဆေးရေးဂိတ်မှ စစ်ကောင်စီ တပ်သားများက တားမြစ်ထားကြောင်း အထက်ပါ ကားသမားက ဆက်ဆိုသည်။

အဆိုပါ တိုက်ပွဲသံသည် နာရီဝက်နီးပါး ထွက်ပေါ်လာပြီး ၁၀ နာရီခွဲကျော်၌ အသံငြိမ်သွားကြောင်း နှင့် တိုက်ပွဲအတွင်း မည်သည့် လက်နက်ကိုင် အဖွဲ့အစည်းတို့ ပါဝင်သည်ကို အသေးစိတ် မသိရသေးပေ။

ယမန်နေ့ ဖေဖော်ဝါရီလ ၉ ရက်နေ့ မနက်ပိုင်းတွင်လည်း ကွတ်ခိုင်မြို့နယ် မန်ပြိန်းအုပ်စု ကောင်းခန်ရွာအနီး၌ ကချင်လွတ်မြောက်ရေး တပ်မတော် ( KIA) နှင့် စစ်ကောင်စီတပ်ဖွဲ့တို့ ထိတွေ့တိုက်ပွဲ ဖြစ်ပွားခဲ့သည်။

လားရှိုး – မူဆယ် ပြည်ထောင်စု လမ်းပိုင်းရှိ ကွတ်ခိုင် နှင့် သိန္နီမြို့နယ်တို့အတွင်းတွင် စစ်ကောင်စီ တပ်ဖွဲ့ နှင့် တိုင်းရင်းသား လက်နက်ကိုင်တပ်ဖွဲ့တို့ မကြာခဏ တိုက်ပွဲဖြစ်ပွားလေ့ရှိပြီး ဒေသခံများ နှင့် ကားသမားများအတွက် သွားရေးကြန့်ကြာမှု နှင့် လုံခြုံရေးအတွက် စိုးရိမ်ရကြောင်းလည်း အထက်ပါ ကားသမားက ဆက်ပြောသည်။

“ကားသမားတွေ အတွက်ကျ ဒီဘက်လမ်းတွေမှာ ဒီလိုတိုက်ပွဲတွေကို တစ်ခေါက်မက ကြုံတွေ့နေရတယ်၊ တချို့ ခရီးသည်တွေဆို ဒီလိုမျိုးတခါမှ မကြုံဖူးတော့ ကြောက်လန့်နေတာရှိတယ်၊ ပြီးတော့ အရေးကြီး ခရီး ဆိုရင်လည်း ကြန့်ကြာမှုတွေ ရှိနိုင်တယ်၊ ဒေသခံတွေလည်း အဲ့လိုပါပဲ၊ ဘယ်သူမဆို ကြောက်ကြရတယ်” ဟု ၎င်းက ပြောသည်။

ကွတ်ခိုင်မြို့နယ်အတွင်းသည် မြောက်ပိုင်းမဟာမိတ် တိုင်းရင်းသားလက်နက်ကိုင်များဖြစ်ကြသည့် ကိုးကန့်တပ်ဖွဲ့ MNDAA ၊ တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) ၊ ကချင်လွတ်မြောက်ရေး တပ်မတော် KIA နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA တို့က သွားလာလှုပ်ရှားနေသည်။

အာဏာသိမ်း စစ်ကောင်စီ တပ်ဖွဲ့သည် ၂၀၂၃ ခုနှစ် ဇန်နဝါရီလ ၁ ရက်နေ့မှ စပြီး ဒီဇင်ဘာ (၃၁) ရက်နေ့ထိ တစ်နှစ်ကြာ အပစ်ရပ် ကြေညာထားသော်လည်း တကယ်တမ်း စစ်မြေပြင်တွင် တိုင်းရင်းသား လက်နက်ကိုင် တပ်ဖွဲ့များ၊ တော်လှန်ရေး အင်အားစုများ နှင့် တိုက်ပွဲများ ဆက်လက်ဖြစ်ပွားနေဆဲ ဖြစ်သည်။