ထိုင်းနိုင်ငံရောက် တရားမဝင် အလုပ်လုပ်နေသည့် မြန်မာရွှေ့ပြောင်းအလုပ်သမားများ ဖမ်းဆီးခံနေရကြောင်း စုံစမ်းသိရှိရသည်။
ပြီးခဲ့သည့် ဖေဖော်ဝါရီ ၇ ရက် ညပိုင်းအချိန်တွင် ထိုင်းနိုင်ငံ ဘန်ကောက်မြို့၏ Night Life လမ်းဟု လူသိများသည့် Khao San လမ်းတွင် ထိုင်းလူဝင်မှုကြီးကြပ်ရေး ရဲတပ်ဖွဲ့က ခရီးသွားအဖြစ် ဟန်ဆောင်ပြီး အစားအသောက်ဝယ်ယူကာ စစ်ဆေးမှုများ ပြုလုပ်ပြီးနောက် တရားမဝင် မြန်မာအလုပ်သမား ၁၁ ဦးကို ဖမ်းဆီးမိခဲ့ကြောင်း ထိုင်းသတင်းမီဒီယာမှ တဆင့် လူမှုကွန်ရက်စာမျက်နှာပေါ်တွင် ရေးသားဖော်ပြထားသည်။
အလားတူ ချင်းမိုင်မြို့ Chang Phueak တွင် အစားအသောက်၊ သစ်သီး နှင့် အဖျော်ယမကာများ ရောင်းချနေသော အသက် ၄၀ နှစ်အရွယ် မြန်မာအမျိုးသမီးတစ်ဦးကိုလည်း ချင်းမိုင်မြို့ လူဝင်မှုကြီးကြပ်ရေး ရဲတပ်ဖွဲ့က ထမ်မံဖမ်းဆီးရမိကြောင်း မြန်မာ့ရွှေ့ပြောင်းအလုပ်သမားအရေး ဆောင်ရွက်သူ စိုင်းလိန်ခမ်းက ပြောသည်။
“ အဓိကတော့ ကိုယ့်ပတ်ဝန်းကျင် လူတွေကြောင့် ကိုယ့်ကိုယ် မနာလိုမှုတွေဖြစ်လာရင် ဒီလူကဘာဖြစ်တယ်၊ ညာဖြစ်တယ်ဆိုပြီး ထိုင်းရဲတွေကို သွားတိုင်တာပေါ့။ တကယ့်တကယ်တော့ ထိုင်းရဲတွေက ဒီလူဘာအလုပ် လုပ်တယ်၊ ဘာဖြစ်နေတယ်ဆိုတာ မသိဘူး။ ပတ်ဝန်းကျင်ကလူတွေ မကောင်းလို့၊ အကျင့်ယုတ်လို့ဘဲ ဒီလိုမျိုး အဖြစ်ပျက်မျိုးတွေ မြင်ရတိုင်း စိတ်မကောင်းဖြစ်မိတယ် “ ဟု ၎င်းက ပြောသည်။
အဆိုပါ ဖမ်းခံရသည့် အမျိုးသမီးတစ်ဦးသည် ၎င်း၏ဆိုင်ကို ဖွင့်လှစ်ရောင်းချနေခြင်းမှာ (၂) နှစ်ကျော်ပြီဖြစ်ပြီး လက်ရှိမှသာ ဖမ်းဆီးခံရခြင်းဖြစ်ကြောင်း သိရသည်။
ထိုင်းနိုင်ငံတွင် မြန်မာရွှေ့ပြောင်းအလုပ်သမားအတွက် ကန့်သတ်ထားသည့် အလုပ်မျိုးမှာ စုစုပေါင်း (၄၀) မျိုးရှိပြီး ထိုထဲမှ အလုပ် (၂၇) မျိုးကိုတော့ မြန်မာလုပ်သားများအတွက် (လုံးဝ) လုပ်ကိုင်ဆောင်ရွက်ခွင့် မပေးထားကြောင်း သိရသည်။
“ ထိုင်းမှာ ကျနော်တို့ မြန်မာရွှေ့ပြောင်းအလုပ်သမားအတွက် အလုပ်ဆိုရင် (၂) မျိုးပဲ ရှိတယ်။ ပန်းရံလုပ်မလား၊ အိမ်ဖော်လုပ်မလားပေါ့။ ဦးနှောက်နဲ့စဉ်းစားပြီး လုပ်ရတဲ့အလုပ်မျိုး၊ ချွေးမထွက်တဲ့အလုပ်မျိုးဆို လုံးဝ လုပ်ကိုင်ခွင့်မပေးထားဘူး။ စားသောက်ဆိုင်မှာတောင် ဆိုင်စောင့်ရတဲ့ အလုပ်လုပ်လို့မရဘူး၊ အနောက်မှာ ပန်းကန်ဆေးတဲ့ အလုပ်လုပ်ရတာ “ ဟု မြန်မာရွှေ့ပြောင်းအလုပ်သမား စိုင်းကျော်ဟိန်းက ပြောသည်။
ထို့အပြင် ထိုင်းနိုင်ငံမှ ကန့်သတ်ထားသော အလုပ်မျိုးကို မြန်မာလုပ်သားများ လုပ်ဆောင်နေခြင်းကို တွေ့ရှိပါက တစ်ဦးကို ဘတ် (၅,၀၀၀ မှ ဘတ် ၅၀,၀၀၀) ထိ ဒဏ်ငွေဆောင်ရသည့်အပြင် မြန်မာနိုင်ငံ နေရပ်သို့ ပြန်ပို့ခံရသည့်အဆင့်ထိ အရေးယူခံရမည်ဖြစ်ကြောင်း သိရသည်။
“ ကျမ အလုပ်လုပ်တဲ့ နေရာမှာက ပတ်စပို့ကော၊ အလုပ်ကော တရားဝင် မှန်ကန်ပါတယ်။ ဈေးရောင်းတယ် ဆိုတာလည်း သူများရဲ့ တပည့်အနေနဲ့ ဝင်လုပ်တာ။ တကယ်လို့ ကိုယ်က ကိုယ်ပိုင်ဆိုင်လေး ဖွင့်ပြီးရောင်းမယ်ဆိုရင်တော့ တရားမဝင်ဘူး” ဟု ချင်းမိုင်မြို့ ကတ်မိန်းမိုင်စျေးမှာ ဈေးရောင်းသည့် နန်းနွတ်က ပြောသည်။
စစ်တပ်က အာဏာသိမ်းပြီး ၂ နှစ်ပြည့်ကာလအတွင်းမှာ မြန်မာပြည်တွင်းတွင် စီးပွားရေး အဆမတန် ကျဆင်းနေပြီး ပြည်သူများသည် စားဝတ်နေရေးအတွက် ရှာဖွေစားသောက်ရန် ခက်ခဲလာကာ ရေကြည်ရာ မြက်နုရာ ထိုင်းနိုင်ငံအတွင်းသို့ အလုံးအရင်းဖြင့် ထွက်ပြေးတိမ်းရှောင်လာကြကြောင်း သိရသည်။
