Thursday, June 20, 2024

ပြည်ထောင်စုအဆင့်ထိ ရွေးကောက်ပွဲဝင်ရောက်ယှဥ်ပြိုင်မည်ဟု ကျားဖြူပါတီပြော

Must read

ရှမ်းတိုင်းရင်းသားများ ဒီမိုကရက်တစ်ပါတီ (SNDP) ကျားဖြူပါတီသည် ၂၀၂၃ ရွေးကောက်ပွဲအတွင်း သျှမ်းပြည် အပါအဝင် ပြည်ထောင်စု အဆင့်ထိ ရွေးကောက်ဝင် ယှဥ်ပြိုင်မည်ဟု သိရသည်။

ကျားဖြူပါတီ

သျှမ်းပြည် နှင့်အတူ တိုင်းနှင့် ပြည်နယ် ၆ ခုကို ရွေးကောက်ပွဲ ဝင်ရောက်ယှဥ်ပြိုင်ရန်အတွက် လျာထားပြီး ရန်ကုန်တိုင်း၊ မန္တလေးတိုင်း၊ ဧရာဝတီတိုင်း၊ ပဲခူးတိုင်း၊ တနင်္သာရီတိုင်း နှင့် သျှမ်းပြည်တို့ ဖြစ်ကြကြောင်း ကျားဖြူပါတီ ဥက္ကဌ လုံးစိုင်းအိုက်ပေါင်းက သျှမ်းသံတော်ဆင့်ကို ပြောသည်။

“တိုင်း ၅ တိုင်း နဲ့ ပြည်နယ် ၁ ခုပေါ့၊ အရင်က ကချင်ပြည်မှာပါ ဝင်ဖို့ လျာထားတယ်၊ ဒါပေမယ့် ကိုယ်စားလှယ်လောင်းတွေ စည်းရုံးရေးဆင်းဖို့ ပြင်နေတဲ့အချိန် ကချင် ခေါ်သတိပေးခြင်းခံရတယ်၊ အဲ့ကြောင့် သူတို့လည်း ကြောက်ပြီး ဆက်မလုပ်ရဲတော့ဘူး၊ အခြေအနေကောင်းရင်တော့ ကချင်ကိုလည်းဝင်ပြိုင်မယ်” ဟု လုံးစိုင်းအိုက်ပေါင်း က သျှမ်းသံတော်ဆင့်ကို ပြောသည်။

ကချင်ပြည်နယ်ကိုပါ ဝင်ရောက်ယှဥ်ပြိုင်ရန် လျာထားသော်လည်း ကချင်ပြည်နယ်အတွင်းရှိ SNDP ကိုယ်စားလှယ်လောင်းများကို KIO/KIA တပ်ဖွဲ့မှ ခေါ်ယူသတိပေးသည့်အတွက် နောက်ဆုတ်လိုက်ရကြောင်း လုံးစိုင်းအိုက်ပေါင်းက ဆက်ပြောသည်။

ကျားဖြူပါတီ

လက်ရှိတွင် ကျားဖြူပါတီဝင် အင်အား တစ်သိန်းကျော်ရှိနေပြီး နိုင်ငံရေးပါတီ မှတ်ပုံတင်ရန်အတွက် ပြင်ဆင်နေ လျက်ရှိသော်လည်း ငွေကြေးအခက်အခဲ ရှိနေသည့်အကြောင်း လုံးစိုင်းအိုက်ပေါင်း ကပြောသည်။

“ရွေးကောက်ပွဲဝင်ဖို့ ပါတီဝင် အင်အားအတွက်တော့ အဆင်သင့်ဖြစ်နေပါပြီ၊ ဒါပေမဲ့ နိုင်ငံရေးပါတီ မှတ်ပုံတင်ဖို့ အတွက် ပိုက်ဆံ သိန်း ၁,၀၀၀ ကျပ် အတွက် ဆိုတာကျတော့ နည်းနည်းခက်ခဲနေတယ်၊ အဲ့လောက်ပိုက်ဆံ အများကြီးကို ဘယ်လို ရှာနိုင်မလဲပေါ့၊ လောပန်းတွေကို ကျားဖြူပါတီကို လာကူဖို့ ပြောချင်တယ်” ဟု လုံးစိုင်းအိုက်ပေါင်းက ပြောသည်။

စစ်ကောင်စီတပ်ဖွဲ့သည် အာဏာသိမ်း ၂ နှစ်ကျော်ကြာလာပြီးနောက် ပြည်ထောင်စု အဆင့် ရွေးကောက်ပွဲ ကျင်းပမည်ဟု ကြေညာထားသော်လည်း မည်သည့်နေရာ မည်သည့်အချိန်တွင် ကျင်းပပြုလုပ်မည်ကို ထုတ်ပြန်ပြောဆိုခြင်း မရှိသေးပေ။

လက်ရှိ ၂၀၂၃ ရွေးကောက်ပွဲကို ပြည်ထောင်စုအဆင့် ရွေးကောက်ပွဲ ဝင်ရောက်ယှဥ်ပြိုင်မည့် ကျားဖြူပါတီသည် ၂၀၂၀ ပြည့်နှစ် အထွေထွေ ရွေးကောက်ပွဲတွင် မိုင်းပန်မြို့နယ် မဲဆန္ဒနယ် ပြည်နယ်လွှတ်တော် အမတ် တစ်နေရာတည်းသာ အနိုင်ရ ခဲ့သည်။

Leave a Comments

- Advertisement -spot_img

Latest article