သျှမ်းပြည် တောင်ကြီးခရိုင် တောင်ကြီးမြို့တွင် စစ်တပ်၏ တပ်ပိုင်နယ်မြေအတွင်း ဆိုင်ခန်းများ ဖြိုဖျက်ခံရပြီးနောက် အလုပ်လက်မဲ့ဖြင့် အိမ်ခန်းငှားခ စရိတ်များ အခက်ကြုံတွေ့နေ ရကြောင်း သိရှိရသည်။
စစ်တပ်သည် ၎င်းတို့၏ တပ်ပိုင်နယ်မြေဟုဆိုပြီး တပ်ပိုင်နယ်မြေအတွင်း ရောက်ရှိသည့် ဆေးတပ်ရင်း၊ အမှတ် (၂၆၂) တပ်ထိန်း၊ စုဆောင်းရေး တပ်ဖွဲ့ရုံး နှင့် GE တပ်နယ်မြေအတွင်းရှိ ဆိုင်ခန်းများ ပြီးခဲ့သည့် (ဇန်နဝါရီ ၂၈ ရက်)တွင် ဘူဒိုဇာကားဖြင့် ဖြိုဖျက်ပျက်စီးခဲ့ပြီးနောက် (ဖေဖော်ဝါရီ ၄ ရက်) တွင် မောချယ်ရီကားဂိတ်ရှိ ဆိုင်ခန်းများကို စစ်တပ်က ထပ်မံဖြိုဖျက် ပျက်စီးခဲ့သည်။
လက်ရှိ စစ်တပ်၏ တပ်ပိုင်နယ်မြေအတွင်း ဖယ်ရှားပေးရခဲ့သည့် ဆိုင်ခန်းများမှာ စုစုပေါင်း (၆၀၀) ကျော်ရှိပြီး အများစုသည် ယနေ့အချိန်ထိ ဆိုင်ခန်းများပြန်လည်ဖွင့်နိုင်ခြင်းမရှိသေးကြောင်း တချို့မှာအလုပ်လက်မဲ့များဖြစ်ကုန်ကြ ပြီး အိမ်ခန်းငှားခ စရိတ် အခက်ခဲများကြုံတွေ့နေရကြောင်း ဆိုင်ခန်းပိုင်ရှင် အမျိုးသားတစ်ဦးက ပြောသည်။
“ ဆိုင်ခန်းကတော့ အစားစားဘဲ ပုံမှန်ရယ်လို့ မရှိပါဘူး။ တစ်ခန်းကို အနည်းဆုံး တစ်လ ၃ သိန်းကျပ် လောက်ပေးပြီး ငှားရတာပေါ့။ အခုက နေစရာတွေလည်းရှားတယ်၊ ဆိုင်ခန်းဖွင့်မယ့်နေရာတွေလည်း ရှားတယ်။ အခုဘာအလုပ်မှမရှိတော့ အလုပ်လက်မဲ့နေတယ်။ ခံစားချက်တော့ ဘာပြောရမှန်း မသိတော့ပါဘူး အိမ်ငှားခလည်းဈေးတက်၊ ဆိုင်ခန်းခလည်း ဈေးတက်နေတယ် “ ဟု ၎င်းကပြောသည်။
တပ်ပိုင်နယ်မြေအတွင်း ဆိုင်ခန်းဖွင့်ပြီး စားဝတ်နေရေးအတွက် အားကိုးပြီး အလုပ်လုပ်ကိုင်သူများအပြင် ကျောင်းနေအရွယ် ကလေးများလည်း ခက်ခဲနေကြောင်း စုံစမ်းသိရှိရသည်။
“ နေရေးက အဓိကလေနော်၊ နေရေး အတွက်တောင် မပြေလည်ရင် စားရေးကလိုက်ပြီး မပြေလည်တော့ဘူး။ အဲ့ဆို ကလေးတွေက လမ်းဘေးရောက်ဖို့ များသွားမှာဘဲ။ အခုကျောင်းတွေမှာလည်း ဟိုကြေးကောက်လိုက်၊ ဒီကြေးကောက်လိုက်နဲ့ ကြားနေရတယ်။ ရှိတဲ့မိဘကတော့ တစ်သိန်းတွေ တစ်သောင်းတွေ တောင်းလည်း ကိစ္စမရှိဘူး။ မရှိတဲ့ မိဘတွေတော့ တစ်ထောင်၊ နှစ်ထောင်တောင်မပြောနဲ့ ငါးရာတောင် မလွယ်တော့ဘူး “ ဟု ဒေသခံ အသက် ၄၀ နှစ် အမျိုးသားတစ်ဦးက ပြောသည်။
လက်ရှိ နိုင်ငံရေးအခြေနေကြောင့် ပြည်တွင်းတွင် စီးပွားရေးအကြပ်အတည်းဖြစ်ပြီး ကုန်ပစ္စည်းများမှာ ယခင်ထက် ဈေးနှုန်းမြင့်တက်နေပြီး ရွှေဘိုပေါ်ဆန်းမွှေး ၂၄ ပြည်အိတ် တစ်အိတ်ကို (၁၁၀,၀၀၀) ကျပ်ထိ ဈေးမြင့်တက်နေကြောင်းလည်း သိရသည်။
