သျှမ်းပြည် တောင်ကြီးခရိုင် ရပ်စောက်မြို့နယ် ပင်ဖြစ်ကျေးရွာထဲတွင် လောင်းကစားများကို လွတ်လပ်စွာ ကစားခွင့်ရှိလာသည့် အတွက်ကြောင့် အိမ်ထောင်ကွဲမှုများလာခဲ့ကြောင်း သတင်းရရှိသည်။
ပင်ဖြစ်ကျေးရွာထဲတွင် လောင်းကစားဝိုင်ဖွင့်သူများက စစ်ကောင်စီ နှင့် စစ်ကောင်စီ လက်အောက်ခံ ပအိုဝ်းအမျိုးသားအဖွဲ့ချုပ် (PNO) တို့ကို အခွန်ဆောင်ပြီး လောင်းကစားဝိုင်းကို ဖွင့်ခွင့်ရထားသည့် အတွက်ကြောင့် ပြည်သူများအတွက် ထိခိုက်လာခဲ့ကြောင်းသိရသည်။
“ သူတို့ခွင့်ပြုထားတဲ့ လောင်းကစားဝိုင်းတွေကြောင့် ကျနော်တို့ရွာမှာ အိမ်ထောင်တွေကွဲကုန်တဲ့သူတွေ မနည်းတော့ဘူး။ ရွာမှာက ယောကျာ်းဖြစ်တဲ့သူတွေက ဆိုင်ကယ်ပေါင် ဖုန်းပေါင်ပြီးတော့ လောင်းကစား လုပ်ကြတယ်။ အဲကြောင့် မိန်းမဖြစ်သူတွေနဲ့ စကားများပြီး ရန်ဖြစ်ပြီး ကွဲကြတာပါ” ဟု ပင်ဖြစ်ကျေးရွာ ဒေသခံ အမျိုးသား တစ်ဦးက ပြောသည်။
ထို့အပြင် သမိုင်းကုန်းကျေးရွာတွင်လည်း အခွန်မဆောင်ဘဲ ဖွင့်လှစ်ထားသည့် ကြက်ဝိုင်းများလည်း PNO တပ်ဖွဲ့များက ဆိုင်ကယ်လိုက်လံသိမ်းယူပြီး တစ်ယောက်ကို ၈ သောင်းကျပ်ဖြင့် ပြန်လာလှဲယူခိုင်း ကြောင်းသိရသည်။
“ သမိုင်းကုန်းရွာမှာ လုပ်တဲ့ အပျော်တမ်းကြက်ဝိုင်းကိုကြတော့ သူတို့ကို အခွန်မဆောင်လို့ ဆိုပြီး ရွာသားတွေကို ငွေကျပ် ၃၆ သိန်း တောင်းတယ်။ သူတို့ကစားဝိုင်းထဲပါတဲ့သူတွေရဲ့ ဆိုင်ကယ်ကို သိမ်းလိုက်တာ။ အဲတာ ၁ ယောက်ကို ၈ သောင်းနဲ့ ပြန်သွားရွေးခိုင်းတာ။ သွားဆော့တဲ့သူတွေက အယောက် ၁၅၀ လောက်ရှိတယ်” ဟု ပင်ဖြစ်ကျေးရွာ ဒေသခံများက ပြောသည်။
ပင်ဖြစ်ကျေးရွာထဲတွင် စစ်တပ်က အာဏာသိမ်းပြီး ၂ နှစ်ကာလတွင် စစ်ကောင်စီတပ်ဖွဲ့များကို အခွန်ဆောင်ပြီး လောင်းကစားဝိုင်း များကို လွတ်လပ်စွာဖွင့်နေကြကြောင်းသိရသည်။
ထို့အပြင် ချဲဒိုင်းများလည်း တစ်လကို ၂ သိန်းနှုန်းဖြင့် အခွန်ဆောင်ပေးနေရကြောင်း သိရသည်။
