သျှမ်းပြည် မူဆယ်ခရိုင် ကွတ်ခိုင်မြို့နယ် နမ့်ဖတ်ကာရွာတွင် သေနတ်ကိုင် ဓားပြတိုက်ခံရမှု ဖြစ်ပွားခဲ့ပြီး ကားတစ်စီး နှင့် ငွေသားများ ဆုံးရှုံးမှု ဖြစ်ပွားခဲ့ကြောင်း စုံစမ်းသိရသည်။

ပြီးခဲ့သည့် ဇန်နဝါရီလ ၂၇ ရက် မွန်းလွဲပိုင်း တွင် နမ့်ဖတ်ကာ ကွက် (၄) နယ်မြေဘက်ရှိ နေအိမ်တစ်ခုတွင် သေနတ်ကိုင်ထားသည့် အမျိုးသား ၅ ယောက်မှ လာရောက် ဓားပြတိုက်ယူခဲ့ကြောင်း ဒေသခံများက ပြောသည်။

“အမျိုးသား ငါးယောက် မျက်နှာဖုံးစွပ် ၃ ယောက်နဲ့ မျက်နှာဖုံးမပါတဲ့ အသက် ၄၀ အရွယ် အမျိုးသားနှစ်ယောက် ပစ္စတို သေနတ်ကိုင်ပြီးတော့ဓားပြလာတိုက်တာ၊ အိမ်မှာက အိမ်ရှင်အမျိုးသား နဲ့ သူ့သားဖြစ်သူပဲ ရှိနေတယ်၊ အိမ်ထဲကို မွှေနှောက်ပြီး ပိုက်ဆံတွေ၊ ဖုန်းတွေနဲ့ ကားလည်းယူသွားတယ်” ဟု နီးစပ်သည့် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

ဇန်နဝါရီလ ၂၇ ရက် မွန်းလွဲပိုင်း ၂ နာရီဝန်းကျင်တွင် ဓားပြတိုက်ခံရခြင်း ဖြစ်ပြီး ဓါးပြများက အိမ်ရှင် အမျိုးသား နှင့် သားဖြစ်သူကို အိပ်ခန်းထဲ သော့ခတ်ပိတ်ထားကာ အိမ်တွင်းကို မွေနှောက် သွားကြောင်း သိရ သည်။

အဆိုပါ ဓားပြတိုက်မှု နှင့် ပတ်သက်ပြီး ပြည်သူ လုံခြုံရေးအတွက် သက်ဆိုင်ရာ ဝာာဝန်ရှိသူများက တာဝန်ယူ ဖြေရှင်းနှိမ်နှင်းမှုများ မရှိသည့်အတွက် ပြည်သူများက နေ့စဥ်လူနေမှု ဘဝ လုံခြုံမှု မရှိသလို ဖြစ်နေကြောင်း ဒေသခံများက ပြောသည်။

“ဒီလိုမျိုး ခိုးဆိုးလုယက်မှုတွေ သောင်းကျန်း ဓားပြတိုက်နေတဲ့သူတွေကို ဘယ်သူကမှ နှိမ်နှင်းအရေးယူတာ မရှိ ဘူး၊ ဒါကြောင့် ဘယ်သွားသွား အမြဲတမ်း သတိထား နေရတယ်၊ လုံခြုံရေးက မရှိတော့ဘူး၊ ဘယ်အချိန်မှာ ကိုယ့်ကို လာလုပ်မယ်မှန်း မသိလို့ ကံကိုပဲ ယုံရမလိုလိုဖြစ်နေတယ်၊ ဖြစ်နိုင်ရင်တော့ ပြည်သူတွေရဲ့ လုံခြုံရေးကို ကြပ်မတ်ပေးစေချင်တာပေါ့” ဟု နမ့်ဖတ်ကာမြို့မှ ဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။

စစ်တပ်မှ နိုင်ငံတော် အာဏာသိမ်းယူပြီးနောက်ပိုင်းတွင် နိုင်ငံ နှင့် တဝှမ်းလုံး၌ လောင်းကစားဝိုင်များသာ ပေါများလာပြီး ပြည်သူလူထု၏ နေ့စဥ်လူနေမှုဘဝ ပိုမိုခက်ခဲ ကြပ်တည်းလာရကြောင်း အထက်ပါ အမျိုးသမီးက ဆက်ပြောသည်။

ဒေသအတွင်းရှိနေသည့် ရဲတပ်ဖွဲ့ဝင်များအနေဖြင့်လည်း ဒေသတွင်းဖြစ်ပေါ်နေသည့် လုယက်တိုက်ခိုက်မှုများ အပါအဝင် ဒုစရိုက်လုပ်ငန်းများကို ထိရောက်စွာ အရေးဆောင်ရွက်ခြင်းမျာ မလုပ်ဆောင်နိုင်သည့်အတွက် ပြည်သူများအနေဖြင့် စိုးရိမ်ကြောက်လန့်မှုများဖြင့်နေ့စဥ်ဘဝကို ဖြတ်သန်းနေရကြောင်းလည်းဒေသခံများထံမှ သိရသည်။