သျှမ်းပြည် လားရှိုးခရိုင် လားရှိုးမြို့ ရပ်ကွက် ၁၂ တွင်းတွင် သုံးညဆက်တိုက် လုယက်မှုဖြစ်ပွားခဲ့ကြောင်း စုံစမ်းသိရှိရသည်။

ပြီးခဲ့သည့် ဇန်နဝါရီ ၂၇ ရက်မှစပြီး ဇန်နဝါရီ ၂၉ ရက်ထိ လားရှိုးမြို့ ရပ်ကွက် ၁၂၊ ဝမ်နားရွာတွင် နေထိုင်သည့် ဒေသခံများသည် ၃ ည ဆက်တိုက် ဆိုင်ကယ်များ လုယက်ခံနေရကြောင်း လားရှိုးမြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ သူခိုး၊ ဓားပြက ညတိုင်းလိုလို သောင်းကျန်းနေတယ်။ ဟိုညက ဆိုင်ကယ်တစ်စီး ခိုးခံရတယ်။ အဲ့ဆိုင်ကယ် တစ်စီးခိုးခံရပြီး ညကစပြီး နောက်နေ့ ၅ နာရီ ဈေးသွားရောင်းတဲ့ စိုင်းအောင်ဆိုတဲ့ တစ်ယောက်လည်း ပစ္စည်း လုယက်ခံရတယ်။ လုယက်ခံရတုန်းက သူ့ သူငယ်ချင်းလာကယ်လို့ ဘာမှတော့ မပါသွားဘူး။ မနေ့ညကလည်း ကျနော်တို့ ရပ်ကွက်ထဲမှာ ကျပ် သိန်း ၂၀ တန်တဲ့ တစ်စီး ထပ်ခိုးခံရတယ် “ ဟု ၎င်းက ပြောသည်။

အဆိုပါ လုယက်မှုများနှင့် ပတ်သက်ပြီး လားရှိုးမြို့နယ် ရဲစခန်းက တာဝန်အရ သူခိုး၊ ဓားပြများကို တစ်ကြိမ်တစ်ခါမှ ဖမ်းဆီးအရေးယူဆောင်ရွက်ပေးခြင်း မရှိကြောင်း သိရသည်။

လက်ရှိ လားရှိုးမြို့ ရပ်ကွက် ၁၂ အတွင်း နေထိုင်သည့် ဒေသခံများသည် မိမိပိုင်ဆိုင်ထားသော ပစ္စည်းများ ဘယ်ချိန်၊ ဘယ်ခါတွင် ခိုးခံရမည်ကို စိုးရိမ်နေကြောင်း ၎င်းအမျိုးသမီးတစ်ဦးက ပြောသည်။

“ ကိုယ့်မှာ ရွှေ၊ ငွေတွေ အနည်းကျဉ်းနဲ့ ကိုယ့်မိဘဆီမှာ အပ်ထားရင်တောင် စိတ်မချရတော့ဘူး။ ဆိုင်ကယ်၊ ကားတွေ ဘယ်ည အခိုးခံရမှာလည်း အမြဲစိတ်ပူနေတယ်။ ကျနော်တို့ အိပ်နေချိန်မှာ သူခိုး၊ ဓားပြတွေက မအိပ်တော့ အမြဲတမ်းကို စိတ်ပူနေရတာပေါ့။ ရဲကိုသွားတိုင်ရင်လည်း ဘာမှကို အရေးမလုပ်ပေးဘူး “ ဟု ၎င်းက ပြောသည်။

စစ်တပ်က အာဏာသိမ်းပြီး ၂ နှစ်နီးပါး ကာလတွင် လားရှိုးမြို့တွင် လောင်းကစားဝိုင်းများ ပေါများလာပြီး သူခိုး၊ ဓားပြများလည်း ယခင်နှစ်ထက် ပိုများလာပြီး ဒေသခံပြည်သူများမှာ စိတ်ပိုင်းဆိုင်ရာ၊ ရုပ်ပိုင်းဆိုင်ရာ စိုးရိမ်မှုများ ကြီးထွားနေကြောင်း သိရသည်။