သျှမ်းပြည် လားရှိုးခရိုင် လားရှိုးမြို့နယ်အတွင်းရှိ အရှေ့မြောက်ပိုင်းတိုင်း စစ်ဌာနချုပ် (ရမခ) လက်အောက်ခံ ခြေမြန်တပ်ရင်း ခမရ (၅၀၄) သည် တအာင်း (ပလောင်) အမျိုးသားလွတ်မြောက်ရေး တပ်မတော် TNLA တပ် စခန်းနေရာကို ထိုးစစ်ဆင် တိုက်ခိုက်ခဲ့ကြောင်း စုံစမ်းသိရသည်။
ယမန်နေ့ (ဇန်နဝါရီ ၂၉) ရက် မွန်းလွဲပိုင်း ၁ နာရီခွဲ ဝန်းကျင်တွင် စစ်ကောင်စီတပ်သည် လားရှိုးမြို့နယ် TNLA တပ်ရင်း (၅၉၅) နေရာကို လက်နက်ကြီးဖြင့် တဖက်သတ် ပစ်ခတ်ခဲ့ပြီးနောက် စစ်ကြောင်းဖြင့် ထပ်မံ ထိုးစစ်ဆင် တိုက်ခိုက်ခဲ့ကြောင်း သိရသည်။
“လက်နက်ကြီး နဲ့ အရင်ပစ်တာပါ၊ သူတို့ဘက် လက်နက်ကြီး နဲ့ တစ်ဖက်သတ် ၁၀ မိနစ်လောက် ပစ်ခဲ့ပြီးမှ စစ်ကြောင်း နဲ့ ထိုးစစ်ဆင်ခဲ့တာ၊ ထိုးစစ်ဆင်လာတော့ နှစ်ဖက်တိုက်ပွဲ ဖြစ်ပွားခဲ့ရတယ်၊ မွန်းလွဲပိုင်း ၄ နာရီနီးပါး အထိ ထိတွေ့ တိုက်ပွဲက ပြင်းထန်ခဲ့တယ်” ဟု မြေပြင်မှ အမည်မဖော်လိုသူ TNLA အရာရှိ တစ်ဦးက သျှမ်းသံတော်ဆင့်ကို ပြောသည်။
အဆိုပါ ထိတွေ့တိုက်ပွဲ ဖြစ်ပွားသည့်နေရာသည် လားရှိုးမြို့နယ် နမ့်မောရွာ နှင့် မန်ကောင်ရွာအနီး ဖြစ်ပြီး ထိတွေ့တိုက်ပွဲက ၃ နာရီ နီးပါး ဖြစ်ပွားခဲ့ကြောင်း သိရသည်။
ယင်းတိုက်ပွဲ ဖြစ်ပွားမှု နှင့် ပတ်သက်ပြီး အသေအကျ နှင့် ထိခိုက်ကျဆုံးမှုများကို မသိရှိရသေးကြောင်းလည်း အထက်ပါ ပုဂ္ဂိုလ်က ဆက်ပြောသည်။
အာဏာသိမ်း စစ်ကောင်စီ တပ်ဖွဲ့သည် ၂၀၂၃ ခုနှစ် ဇန်နဝါရီလ ၁ ရက်နေ့မှ စပြီး ဒီဇင်ဘာ (၃၁) ရက်နေ့ထိ တစ်နှစ်ကြာ အပစ်ရပ် ကြေညာထားသော်လည်း တကယ်တမ်း စစ်မြေပြင်တွင် တိုက်ပွဲများ ရပ်တန့်သွားသည်ကို မတွေ့ရသေးပေ။
Leave a Comments