သျှမ်းပြည် လားရှိုးခရိုင် တန့်ယန်းမြို့နယ် နမ့်ဖတ်လမ်းကျေးရွာထဲတွင် ဆယ်ကျော်သက် ကလေးများ လောင်းကစားဝိုင်းတွင်းသို့ ဝင်ရောက် ဆော့ကစားနေကြောင်း စုံစမ်းသိရှိရသည်။
တရုတ်နှစ်သစ်ကူးပွဲဟု အကြောင်းပြပြီး တန့်ယန်းမြို့နယ် နမ့်ဖတ်လမ်းကျေးရွာထဲ ချယ်ရီတောင်အောက်ဘက်တွင် လောင်းကစားဝိုင်းကို ဖွင့်လှစ်ထားပြီး ဆယ်ကျော်သက် ကလေးများပါ ဝင်ရောက်ကစားနေကြောင်း သိရသည်။
“ အဲ့ဒီ လောင်းကစားဝိုင်းက ချယ်ရီတောနားမှာပဲရှိတာ။ ကလေးတွေ ကိုယ်တိုင်ကတော့ လောင်းကစားဝိုင်း ဆော့နေတာပါ။ ဒီမှာက လောင်းကစားဝိုင်းကို ထမင်းစား ရေသောက် သလို ဆော့နေကြတာပဲ။ ကလေးအဖေကိုယ်တိုင်က သူ့တို့ ကလေးကို လောင်းစားဖို့ သင်ပေးနေတာ” ဟု တန့်ယန်းမြို့ ဒေသခံ အမျိုးသမီးတစ်ဦးက ပြောသည်။
အဆိုပါ ကလေးများသည် လောင်းကစားဆော့ရာတွင်လည်း ကျပ်ငွေ ၁ သောင်း အထက် လောင်းနေကြကြောင်း သိရသည်။
“ကလေးတွေ တစ်သောင်းတန်တွေနဲ့ ကိုင်ပြီးတော့ ထိုးနေကြတာ။ ကလေးပေါက်စလေးတွေပါ။ ကလေးတွေကတော့ တစ်သောင်းတန်လား တစ်ထောင်တန်လား နာမလည်တဲ့ အရွယ်တွေပါ။ ပြီးတော့ ချယ်ရီတောလည်း ဒီနှစ်သိပ်မပွင့်ဘူး။ တောင်ခြေအောက်မှာလည်း အမှိုက်တွေ အများကြီးပဲ။ ပတ်ဝန်းကျင် ညစ်ညမ်းလို့ ဂေဟစနစ် ပျက်စီးနေတာလည်း ဖြစ်မယ်” ဟု ဒေသခံ အမျိုးသမီးက ပြောသည်။
လက်ရှိ တန့်ယန်းမြို့နယ် နမ့်ဖတ်လမ်းကျေးရွာထဲတွင် တရုတ်နှစ်သစ်ကူးကို အကြောင်းပြပြီး လောင်းကစားဝိုင်းဖွင့်လှစ်ရာတွင် တစ်လ ရှိနေပြီ ဖြစ်ကြောင်း သိရသည်။
အလားတူ စစ်တပ်က အာဏာသိမ်းပြီး ၂ နှစ်နီးပါးတွင် တန့်ယန်းမြို့နယ်ထဲ လူငယ်များ မူးယစ်ဆေးဝါးသုံးစွဲမှု များပြားလာပြီး ခိုးယူလုယက်မှုလည်း တစ်နေ့ထက် တစ်နေ့ ကြီးပွားလာနေလျက်ရှိကြောင်း သိရသည်။
