သျှမ်းပြည် လားရှိုးခရိုင် ကွတ်ခိုင်မြို့နယ်တွင် တစ်နေ့တည်း ယာဥ်တိုက်မှု ၂ ခုဖြစ်ပြီး ၃ ဦးသေဆုံးပြီး၊ ၃ ဦး ဒဏ်ရာ ရရှိခဲ့ကြောင်း သတင်းသိရသည်။
ယနေ့ (ဇန်နဝါရီ ၂၈) ရက် နံနက်ပိုင်းတွင် ကွတ်ခိုင်မြို့နှင့် ကောင်းခါးလမ်းဆုံ ပြည်ထောင်စုလမ်းမကြီး၌ ယာဉ်တိုက်မှု ဖြစ်ပွားခဲ့ပြီး အမျိုးသမီးတစ်ဦး သေဆုံးခဲ့သည်။
“Express ကားတစ်စီး နဲ့ သားအဖ ၂ ယောက် စီးလာတဲ့ ဆိုင်ကယ်တိုက်မိခဲ့တယ်၊ ဆိုင်ကယ် နောက်က လိုက်လာတဲ့ သမီးဖြစ်သူက ခေါင်းပွင့်ပြီး ပွဲချင်းပြီး သေသွားခဲ့တယ်။ သူ့အဖေလည်း ဒဏ်ရာရ သွားတယ်။ ကားပေါ်က လူတွေတော့ မသိရဘူး” ဟု ကွတ်ခိုင်မြို့နေ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
ထို့နောက် အဆိုပါ တစ်နေ့တည်းတွင် ညနေ ၄ နာရီ အချိန်တွင်လည်း ပြည်ထောင်စုလမ်းမ လွိုင်ဆမ်ဆစ် ရွာသစ်လမ်းဆုံ ရွှေကမ္ဘာအေးလမ်းအကျော်၌ နောက်ထပ် ယာဉ်တိုက်မှုတစ်ခုဖြစ်ကာ အမျိုးသားတစ်ဦး နှင့် အမျိုးသမီးတစ်ဦး သေဆုံးကြောင်း သိရသည်။
အဆိုပါ ယာဥ်တိုက်မှုမှ ဒဏ်ရာရသူ နှင့် သေဆုံးသူများကို ကွတ်ခိုင်မြို့ လူမှုကူညီရေးအသင်းက လာရောက်သယ်ဆောင်ပြီး ဆေးရုံသို့ ပို့ဆောင်ပေးခဲ့ကြောင်းလည်း သိရသည်။
ကွတ်ခိုင်မြို့နယ်အတွင်း တစ်နေ့တည်း ယာဥ်တိုက်မှု နှစ်ကြိမ်ဖြစ်ပွားခဲ့ခြင်းသည် ယာဥ်မောင်းများ သတ်မှတ်ထားသည့် အရှိန်ထက် ပိုမမောင်းရန် နှင့် ယာဥ်စည်းကမ်း လမ်းစည်းကမ်းများ ပိုမို လိုအပ်ကြောင်း ကွတ်ခိုင်မြို့ခံ ပရဟိတ လူမှုကူညီရေးအသင်းမှ အမည်မဖော်လိုသူ တစ်ဦးက ပြောသည်။
“ယာဥ်စည်းကမ်း လမ်းစည်းကမ်းတွေကို ပိုပြီးတော့ နားလည်သဘောပေါက်ဖို့ လိုအပ်တယ်လို့ မြင်တယ်၊ တချို့က လမ်းပြောင်းပြန်မောင်းတာတွေ၊ သတ်မှတ်ထားတဲ့ အရှိန်ထက် မောင်းတာတွေရှိနေတတ်တယ်၊ ပြီးတော့လည်း လိုင်စင်မဲ့ ကားတွေဆိုတော့လည်း မှုခင်းဖြစ်ရင်တော့ လိုက်လို့ မနိုင်တာတွေရှိတာပေါ့” ဟု အထက်ပါ ပရဟိတ သမားက ပြောသည်။
ယခုရက်ပိုင်းအတွင်း ကွတ်ခိုင်မြို့တွင် ယာဥ်တိုက်မှု ၃ ကြိမ်ထက်မနည်း ဖြစ်ပွားနေသဖြင့် ယာဥ်မောင်းများ အနေဖြင့် သတိထားသွားလာကြရန်လည်း ၎င်းက ပြောသည်။
စစ်တပ်က အာဏာသိမ်းပြီးနောက်ပိုင်း ယာဥ်စည်းကမ်း လမ်းစည်းကမ်း ထိန်းသိမ်းမှု လျှော့နည်းလာပြီး ယာဥ်တိုက်မှု နေ့စဥ်နီးပါး ရှိလာသည့်အပြင် အသက်ဆုံးရှုံးရသူများလည်း ရှိနေကြောင်း သိရသည်။
Leave a Comments