သျှမ်းပြည် တောင်ကြီးခရိုင် ရပ်စောက်မြို့နယ် ပင်ဖြစ်ကျေးရွာတွင် တာဝန်ရှိ ရဲများကို အခွန်ဆောင်ပြီး မူးယစ်ဆေးဝါး ရောင်းချနေကြောင်း သတင်းရရှိသည်။
စစ်တပ် အာဏာသိမ်းပြီး ၂ နှစ် နီးပါးတွင် ရပ်စောက်မြို့နယ် ကျေးရွာများထဲတွင် မူးယစ်ဆေးဝါးကို ပေါ်တင် ရောင်းဝယ်နေကြကြောင်း သိရသည် ။
“ကျနော်တို့ ကျေးရွာမှာ ရဲတွေကို ပိုက်ဆံပေးပြီး မူးယစ်ဆေးဝါး ရောင်းနေကြတာ။ တစ်လ ကို ၂ သိန်းပေးရတယ်။ ဖမ်းတာလည်း မရှိဘူး ။ ပေါ်တင်ရောင်းနေကြတာ“ ဟု ဒေသခံ အမျိုးသားတစ်ဦး က ပြောသည် ။
မူးယစ်ဆေးဝါးရောင်းနေကြောင်းကို ရဲစခန်းသို့ သွားတိုင်ပါက ခြိမ်းခြောက်ပြီး ပြန်မောင်းထုတ်ကြောင်း ဒေသခံများက ပြောသည် ။
ထိုအပြင် ကျွဲ ၊ နွား ရောင်းဝယ်ရာတွင်လည်း ရဲစခန်းမှူးကို ၂ သောင်း အခွန်ဆောင်ပေးရကြောင်း ပင်ဖြစ် ကျေးရွာဒေသခံ တစ်ဦး ကပြောသည် ။
“ ရွာမှာ အရမ်းဆိုးနေတယ်။ ကျွဲ ၊ နွား တွေမွေးဖို့ သွားဝယ်တာတောင် ရဲတွေကို တစ်ကောင် ၂ သောင်းနှုန်းနဲ့ ပေးရတာ ။ မပေးရင် သူတို့ အကြောင်းသိမယ်ဆိုပြီး ခြိမ်းခြောက်တယ်။ မူးယစ်ဆေးဝါးရောင်းနေတာကို သွားတိုင်ရင်လဲ မောင်းထုတ်ခံရတယ် “ ဟု ၎င်း ကပြောသည်။
အာဏာသိမ်းမှုကြောင့် သျှမ်းပြည်တွင်း မူးယစ်ဆေးဝါး ပေါများလာခဲ့သည်။
ထိုအပြင် သျှမ်းပြည်အတွင်း မူးယစ်ဆေးဝါး စိုက်ပျိုးမှုသည် အများဆုံးဖြစ်ကြောင်း UNODC က ဇန်နဝါရီ ၂၆ ရက်နေ့တွင် ထုတ်ပြန်ထားသည် ။
Leave a Comments