သျှမ်းပြည် မူဆယ်ခရိုင် မူဆယ်မြို့နယ်ရှိ မြန်မာ – တရုတ် နယ်စပ်ဂိတ် ဖြတ်နိုင်ဖို့အတွက် မူဆယ်ဒေသခံများကို နိုင်ငံကူး လက်မှတ် စာအုပ်အနီ လုပ်ဆောင်ပေးနေကြောင်း သတင်းသိရသည်။

ယနေ့ (ဇန်နဝါရီ ၂၅) ရက်တွင် မူဆယ်မြို့နယ်ရှိ မြန်မာ – တရုတ်နယ်စပ်ဂိတ် ဖြစ်သည့် ရွှေနန်းတော် ဂိတ်ပေါက်၌ ဌာနဆိုင်ရာ တာဝန်ရှိသူများက နိုင်ငံကူးလက်မှတ် စာအုပ်အနီကို လုပ်ဆောင်ပေးနေကြောင်း မူဆယ်မြို့ခံများထံမှ သိရသည်။

အဆိုပါ စာအုပ်အနီကို စစ်ကောင်စီလက်အောက်ခံ သက်ဆိုင်ရာ ဝာာဝန်ရှိသူများက လုပ်ဆောင်ပေးနေခြင်း ဖြစ်ကြောင်း ရွှေနန်းတော်ဂိတ်ပေါက်မှ တာဝန်ရှိသူ အမျိုးသား တစ်ဦးက သျှမ်းသံတော်ဆင့်ကို ပြောသည်။

“ဒီနေ့မှ စလုပ်ပေးတာပါ၊ ရွှေနန်းတော် ဂိတ်ပေါက်မှာ လုပ်ပေးနေတာ၊ ပထမဆုံးအနေနဲ့ ဒီ ၁၃/ ကိုင်တဲ့ မူဆယ် နမ့်ခမ်းက ပြည်သူတွေကို အရင်ဆုံး လုပ်ပေးမယ်လို့ ပြောတယ်၊ နိုင်ငံကူး လက်မှတ် စာအုပ်အနီရဖို့အတွက် မှတ်ပုံတင် မိတ္တူ၊ အိမ်ထောင်စု မိတ္တူရယ် Passport ပုံ ၃ ပုံ လိုအပ်မယ်” ဟု ရွှေနန်းတော်ဂိတ်ပေါက်မှ တာဝန်ရှိသူ အမျိုးသား တစ်ဦးက ပြောသည်။

လက်ရှိတွင် နိုင်ငံကူးလက်မှတ် စာအုပ်အနီကို လုပ်ဆောင်ပေးနေသော်လည်း နှစ်နိုင်ငံ ဖြတ်သန်းမှုအတွက် ရနိုင်မရနိုင်ကြောင်းကို မသေချာသေးကြောင်းလည်း ၎င်းက ဆက်ပြောသည်။

လက်ရှိတွင် မြန်မာ – တရုတ် နှစ်နိုင်ငံ ဖြတ်သန်းခွင့် နှစ်နိုင်ငံကူး လက်မှတ်အတွက် ကုန်ကျစရိတ်လည်း တိတိကျကျ မသိရသေးကြောင်း မူဆယ်မြို့ခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

“အခု သူတို့လုပ်ပေးတဲ့ စာအုပ်အနီက နှစ်နိုင်ငံ ဖြတ်လို့ရတယ်ဆိုပေမဲ့ ဘယ်အချိန်မှာ စတင်အသုံးပြုနိုင်မလဲတော့ မသိသေးဘူး၊ အရင်နှစ်က စာအုပ်အနီဖိုးကို ၅၀၀ ကျပ်ပဲ ပေးခဲ့ရပေမယ့် ဒီနှစ်မှာ ဈေးနှုန်းအပြောင်းအလဲ ဖြစ်မယ်ထင်တယ်၊ ရုံးပိုင်းအချိန်မှာပဲ လုပ်ပေးဖြစ်မှာလို့ ကြားတယ်” ဟု မူဆယ်မြို့ခံက သျှမ်းသံတော်ဆင့်ကို ပြောသည်။

အဆိုပါ နိုင်ငံကူး လက်မှတ် စာအုပ်အနီသည် သက်တမ်း ၁ နှစ်ရှိပြီး သက်တမ်းအားဖြင့် ၁ နှစ်အထိ အသုံးပြုနိုင် မည်ဖြစ်ကြောင်းလည်း သိရသည်။

မြန်မာ – တရုတ်နယ်စပ် ကုန်သွယ်ရေးဂိတ်ပေါက်များသည် ကိုဗစ် – ၁၉ နှင့် နိုင်ငံရေး အခြေအနေများကြောင့် ၃ နှစ်ကျော်ကြာအောင် ပိတ်ထားခဲ့ရပြီး ပြီးခဲ့သည့် ဇန်နဝါရီလ ၈ ရက်နေ့တွင် တရုတ်ဘက်မှ စတင်ကာ ပြန်လည် ဖွင့်လှစ်ခဲ့သော်လည်း မြန်မာပြည်ဘက်မှ သွားလာခွင့်ကို ပိတ်ပင်ထားနေဆဲ ဖြစ်သည်။

လက်ရှိ အချိန်တွင် နယ်စပ်ဂိတ်၏ နှစ်ဘက်ဂိတ် တံခါးပေါက်များ၌ ကူးသန်းသွားလာရေးအတွက် စောင့်မျှော်နေသူများ နှင့် အခြေအနေကို စောင့်ကြည့်နေသည့် ကားသမားများ၊ ကုန်သွယ်များ၊ ဒေသခံများ များပြား နေကြောင်း သိရသည်။

ယင်းကဲ့သို့ နယ်စပ်ဂိတ်ပေါက်များ ပြန်လည် ဖွင့်လှစ်လာခြင်း နှင့် ပတ်သက်ပြီး မူဆယ်ဒေသခံများအနေဖြင့် ကိုဗစ်-၁၉ ကူးစက်မှုနှုန်း ပြန်မြှင့် တက်လာမည်ကို စိုးရိမ်နေကြသည်။