သျှမ်းပြည် တောင်ကြီးခရိုင် ကျောက်တလုံးမြို့တွင် တည်ထားကိုးကွယ်ထားသည့် မဟာဝံသ ဗုဒ္ဓဂါယာ စေတီတော်မြတ်ကြီး ဘုရားထီးတင်ပွဲဟုဆိုပြီး ပအိုဝ်းပြည်သူ့စစ် (PNO/ PNA) သည် တစ်အိမ်လျှင် ၅,၀၀၀ ကျပ်ဖြင့် လိုက်လံကောက်နေကြောင်း သတင်းရရှိသည်။
ကျောက်တလုံးမြို့၏ မြောက်ဘက်အရပ်ရှိ မဟာဝံသ ဗုဒ္ဓဂါယာ စေတီတော်မြတ်ကြီးကို ပြီးခဲ့သည့် ၂၀၁၈ ခုနှစ်အတွင်းက စတင်ပြီး ပအိုဝ်းပြည်သူ့စစ် (PNO/PNA) ခေါင်းဆောင် ဦးအောင်ခမ်းထီးက ဦးဆောင်ကာ တည်ဆောက်လာကြောင်း ဖြစ်သည်။
လာမည့် တပေါင်းလဆန်း ၁၄ ရက်မှာ တည်ထားကိုးကွယ်ထားသည့် မဟာဝံသဗုဒ္ဓဂါယာ စေတီတော်မြတ်ကြီး ဘုရားထီးတင်ပွဲကို ပြုလုပ်မည်ဖြစ်သောကြောင့် တစ်အိမ်လျှင် ၅,၀၀၀ ကျပ် အလှူငွေထည့်ရန် ယမန်နေ့ ဇန်နဝါရီ ၂၃ ရက်က အိမ်တိုင်ရာရောက် စာပို့ခဲ့ကြောင်း သိရှိရသည်။
“ဘုရားထီးတင်ပွဲကို တပေါင်းလဆန်း ၁၄ ရက် လုပ်မယ်လို့တော့ ပြောတယ်။ ဦးအောင်ခမ်းထီး တို့က ဦးဆောင်ပြီး အထူးဒေသ (၆) ထဲရှိ ပြည်သူတွေကိုလည်း သူက ဖိတ်မယ်ထင်တယ်။ စေတနာ ရှိသလောက်တော့ သူတို့အလှူခံတယ်။ အနီးနားက ရွာတွေတော့ ဝါးလုံးရေ ဘယ်လောက်ဆိုပြီး အကန့်သတ်နဲ့ လာလှူဖို့တော့ ပြောတယ် “ ဟု ကျောက်တလုံးမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ ပွဲဖြစ်မြောက်ရေး အလှူငွေကို တပို့တွဲ လဆန်း (၁) ရက်နေ့တွင် နောက်ဆုံးထားပြီး ထည့်ပေးရန် ၎င်း စာစောင်ထဲတွင် ပအိုဝ်းစာဖြင့် ရေးသားဖော်ပြထားသည်။
ထို့အပြင် တစ်အိမ်လျှင် ၅,၀၀၀ ကျပ် အလှူငွေ တောင်းခံမှုနှင့်ပတ်သက်ပြီး ၎င်းက “တချို့လူတွေက များများလှူရတာ မကြိုက်လို့လားတော့ မပြောတတ်ဘူးဗျ။ ဒါက ကျနော်တို့ ဗုဒ္ဓဘာသာဝင်အနေ နဲ့ ဝဋ်ကြွေးလှူဒါန်း နိုင်အောင် ကျနော်တို့မှာ အားလုံးတာဝန်ရှိပါတယ်။ တချို့ မလှူနိုင်လည်းဘဲ သာဓုခေါ်ယုံလောက်သာ ကုသိုလ်ရတယ် “ ဟု ၎င်းက ထပ်လောင်းပြောသည်။
ဘုရားထီးတင်ပွဲ၏ ပွဲဖြစ်မြောက်ရေး အလှူငွေအတွက် ပအိုဝ်းကိုယ်ပိုင်အုပ်ချုပ်ခွင့်ရ ဆီဆိုင်၊ ဟိုပုံး နှင့် ပင်လောင်းမြို့နယ် အပြင် ပအိုဝ်းပြည်သူ့စစ် (PNO/PNA) လှုပ်ရှားနယ်မြေ တောင်ကြီး၊ ညောင်ရွှေ၊ လွိုင်လင် တို့ကိုလည်း အလှူငွေ ကောက်ခံမည်ဖြစ်ကြောင်း သိရသည်။
လက်ရှိမှာ PNO အနေဖြင့် အိမ်တိုင်ရာရောက် တအိမ်လျှင် ၅,၀၀၀ ကျပ်ထည့်ရန် လာရောက်စာပို့ခြင်းသည် ပိုက်ဆံရသည်ဖြစ်စေ၊ မရှိသည်ဖြစ်စေ သို့မဟုတ် ထည့်ချင်သည်ဖြစ်စေ မထည့်ချင်သည်ဖြစ်စေ ပါဝင်ရမည်ဖြစ်ကြောင်း အလှူသဘော သဘာဝသည် မိမိစိတ်တွင် လှူဒါန်းချင်စိတ်ရှိမှတာ အလှူမြှောက်ကြောင်းလည်း တောင်ကြီးဒေသခံများက ပြောသည်။
