Sunday, February 5, 2023

SSPP ဌာနချုပ် ဝမ်ဟိုင်းကို စစ်ကောင်စီ ဂျက်ဖိုက်တာ ပျံဝဲ

Must read

သျှမ်းပြည် လွိုင်လင်ခရိုင် ကျေးသီးမြို့နယ် ဝမ်ဟိုင်းမြို့ရှိ ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA ဌာနချုပ်ကို အာဏာသိမ်းစစ်ကောင်စီမှ ဂျက်ဖိုက်တာ လာရောက် ပျံဝဲခဲ့ကြောင်း သတင်းသိရသည်။

စစ်ကောင်စီ စစ်ရဟတ်ယာဥ် ပျံဝဲနေစဥ်

ယနေ့ (ဇန်နဝါရီ ၂၄) ရက် နံနက် ၁၁ နာရီ ၅၀ မိနစ်ဝန်းကျင်တွင် Yak -130 အမျိုးအစား စစ်ကောင်စီ ဂျက်ဖိုက်တာသည် အမြင့်ပေ ၃၀၀ ကျော်ဖြင့် ဝမ်ဟိုင်းဌာနချုပ်ပေါ်၌ လာရောက်ပျံဝဲခဲ့ကြောင်း SSPP/SSA ၏ ပြောရေးဆိုခွင့် ရှိသူ ဒုတိယ ဗိုလ်မှူးကြီး စိုင်းဆုက သျှမ်းသံတော်ဆင့်ကို ပြောသည်။

“ဘာမှ ကြိုတင်အကြောင်းကြားမှု မရှိဘဲ ဌာနချုပ်ကို ဂျက်ဖိုက်တာနဲ့ ကျနော်တို့ ဌာနချုပ်ကို ပျံဝဲတယ်။ နှစ်ပတ် ပတ်ခဲ့တယ်၊ ပထမ တစ်ပတ်က အမြင့် မီတာ ၅၀၀ ဝန်းကျင် နဲ့ ဒုတိယ တစ်ပတ်မှာတော့ အမြင့် ၃၀၀ မီတာကျော်ကျော်နဲ့ ပျံခဲ့တယ်၊ အခု နေပြည်တော်ဘက်ကို ကျနော်တို့ အကြောင်းရင်းမေးမြန်းထားပေမဲ့ ဘာမှ အကြောင်းပြန်ကြားမှု မရှိဘူး” ဟု ဒု – ဗိုလ်မှူးကြီး စိုင်းဆုက သျှမ်းသံတော်ဆင့်ကို ပြောသည်။

ယင်းကဲ့သို့ ရဟတ်ယာဥ် လာရောက်ပျံဝဲမှုနှင့် ပတ်သက်ပြီး SSPP မှ စစ်ကောင်စီ၏ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေး ကော်မတီ (NSPNC) ထံသို့ မေးမြန်းသော်လည်း အကြောင်းပြန်မှု မရှိသေးကြောင်း သိရသည်။

ထို့အပြင် စစ်ကောင်စီဘက်မှ ကြိုတင်အကြောင်းကြားမှု မရှိ၊ ထိတွေ့တိုက်ပွဲ မရှိချိန် စစ်ကောင်စီဘက်မှ စစ်ရဟတ်ယာဥ်ဖြင့် လာရောက်ပျံဝဲခြင်းသည် ခြိမ်းခြောက်မှုမြှောက်သည့်အပြင် ယုံကြည်မှုကို ပျက်ပြယ် စေကြောင်းလည်း ဒု – ဗိုလ်မှူးကြီး စိုင်းဆုက ပြောသည်။

“ကျနော်တို့ ဆွေးနွေးထားတဲ့ ငြိမ်းချမ်းရေးလုပ်ငန်းစဥ်ပါတဲ့ အချက်တွေကိုမှ မထောက် အခုလို ဂျက်ဖိုက်တာ လာပျံတာကတော့ ခြိမ်းခြောက်ရာလည်းရောက်တယ်။ ပြီးတော့ ယုံကြည်မှုလည်း ပျက်စေတယ်၊ နောက်တစ်ခုက သူတို့ဘက် ငြိမ်းချမ်းရေး တကယ်လိုလားတာ မဟုတ်တာကို ပေါ်လွင်စေတယ်၊ ကျနော်တို့ တပ်သားတွေ အဲ့လေယာဥ်ကို ပစ်ချလိုက်ရင်လည်း သူတို့ပဲ အထိနာမှာ” ဟု ဒုဗိုလ်မှူးကြီး စိုင်းဆုက ပြောသည်။

ကြိုတင်အကြောင်းကြားမှုမရှိဘဲ ဂျက်ဖိုက်တာဖြင့် လာရောက်ပျံဝဲပါက SSPP/SSA အနေဖြင့် သက်ညှာတော့မည် မဟုတ်ကြောင်းလည်း SSPP/SSA ပြောရေးဆိုခွင့်ရှိသူက ဆက်ပြောသည်။

“ကြိုတင် အကြောင်းကြားမှုမရှိဘဲ ထပ်ရောက်လာရင်တော့ ပစ်ချမှာ အမှန်ပဲ၊ အဲ့ဒီအချိန်မှာ ကျနော်တို့ဘက် လွန်တယ်လို့ မပြောပါနဲ့လို့ ပြောချင်ပါတယ်” ဟု SSPP/SSA ပြောရေးဆိုခွင့် ဒု- ဗိုလ်မှူးကြီး စိုင်းဆုက သျှမ်းသံတော်ဆင့်ကို ပြောသည်။

ပြီးခဲ့သည့် ၂၀၂၁ ခုနှစ်အတွင်းမှာလည်း စစ်ကောင်စီ တပ်ဖွဲ့မှ ဝမ်ဟိုင်းဌာနချုပ်ကို စစ်ရဟတ်ယာဥ်ဖြင့် အကြိမ်ကြိမ် ပျံသန်းနေသောကြောင့် SSPP/SSA လုံခြုံရေးတပ်သားများက ရဟတ်ယာဥ်ကို ပစ်ချရာ လေယာဥ်ပေါ်ပါ အရာရှိတစ်ဦးကို ကျည်ထိမှန်ခဲ့သည့် ဖြစ်စဥ် ဖြစ်ပွားခဲ့သည်။

ယင်းကဲ့သို့ ပစ်ခတ်မှု ဖြစ်ပွားခဲ့အပြီး SSPP/SSA အနေဖြင့်လည်း စစ်ကောင်စီ ခေါင်းဆောင် မင်းအောင်လှိုင် နှင့် ဒုတိယ ဗိုလ်ချုပ်ကြီး ရာပြည့် ဦးဆောင်သည့် NSPNC နှင့် ငြိမ်းချမ်းရေး လုပ်ငန်းစဉ်ဆွေးနွေး ဆောင်ရွက်မှု ၂ ကြိမ် ထက်မနည်း ရှိခဲ့ချိန် စစ်ကောင်စီဘက်မှ ရဟတ်ယာဥ်ဖြင့် ထပ်မံလာရောက်ပျံဝဲခြင်းဖြစ်ကြောင်း သိရသည်။

Leave a Comments

- Advertisement -spot_img

Latest article