သျှမ်းပြည် လားရှိုးခရိုင် ၊ ကျောက်မဲခရိုင် အစိုးရကျောင်းများထဲတွင် သျှမ်းစာပေများ သင်ကြားပေးသူ မရှိတော့ကြောင်း စုံစမ်းသိရှိရသည်။
ကိုဗစ် – ၁၉ နှင့် စစ်တပ်က အာဏာသိမ်းပြီးနောက်ပိုင်းတွင် ဝန်ထမ်းများက အာဏာဖီဆန်ရေး CDM ပြုလုပ်လာသောကြောင့် လားရှိုးခရိုင်၊ ကျောက်မဲခရိုင်အတွင်းရှိ အစိုးရကျောင်းများတွင် သျှမ်းစာသင်ကြားမှု မရှိတော့ကြောင်း သိရသည်။
” မြို့ထဲက အစိုးရကျောင်းတွေထဲမှာတော့ သင်ကြားတာတွေက အရမ်းနည်းလာပြီ။ ရွာတွေဘက်မှာ ပဲရှိတော့ တယ်။ ကိုဗစ် -၁၉ ကြောင့် နဲ့ နိုင်ငံရေး အခြေနေတွေကြောင့် အစိုးရကျောင်းတွေမှာတော့ သင်ကြားပေးတာတွေ တော့မရှိတော့ဘူး။ တစ်ချို့ကလည်း CDM တွေလုပ်ပြီးတော့ သင်တဲ့သူတွေလည်း မရှိတော့ဘူး” ဟု ကျောက်မဲမြို့ သျှမ်းစာပေ နှင့် ယဉ်ကျေးမှုက တာဝန်ရှိသူတစ်ဦးက ပြောသည်။
ထို့အပြင် သျှမ်းစာသင်ကြားပေးသည့် ဆရာ/ဆရာမ များကလည်း လစာပုံမှန်မရရှိသည့် အတွက်ကြောင့် စားဝတ်နေရေးခက်ခဲ၍ သင်ကြားပေးသူတွေ နည်းပါးလာခဲ့ကြောင်း သိရသည်။
တစ်ဖက်တွင်လည်း အစိုးရကျောင်းများထဲတွင် ဖွင့်လှစ်ထားသည့် သျှမ်းစာသင်ကြားမှုသည် သျှမ်းစာကိုသာ အဓိက သင်ကြားပေးပြီး ရိုးရာဓလေ့ကို ထိန်းသိမ်းမှု မရှိသောကြောင့် သင်ကြားပေးမှုအတွက် အားနည်း လာကြောင်း မိုင်းရယ်မြို့နယ် သျှမ်းစာသင်ကြားပေးသည့် ဆရာတစ်ဦးက ပြောသည်။
” အစိုးရ ကျောင်းတွေမှာ သျှမ်းစာပဲ သင်ကြားပေးလို့ရတယ်။ ပြီးတော့ အဲ့နားက ရိုးရာဓလေ့ ထိမ်းသိန်းမှုကလည်း သင်ကြားပေးတာမျိုး မရှိဘူးလေ။ ပြီးတော့ ကျနော်တို့ မိုင်းရယ်မှာဆိုရင်လည်း သျှမ်းစာသင်ပေးတဲ့ သူတွေက ပုံမှန်လစာမရကြတော့ဘူး။ ပြီးတော့ CDM တွေ လုပ်သွားတဲ့သူတွေကလည်း များတယ်လေ။ အဲ့ကြောင့် သင်ပေးတဲ့သူတွေ နည်းလာတယ်” ဟု ၎င်းက ပြောသည်။
ယခင်က NLD အစိုးရလက်ထက်ထဲတွင် စာသင်ကျောင်းများထဲမှာ ညအချိန်တွင် သျှမ်းစာပေသင်ကြားပေး မှုရှိခဲ့ပြီး အာဏာသိမ်းပြီးနောက်ပိုင်း မရှိတော့ကြောင်း သိရသည်။
ထိုသို့ ကျောင်းသားများကို သျှမ်းစာသင်ကြားမှုများ နည်းပါးလာသည့်အတွက်ကြောင့် သျှမ်းလူငယ်တွေ သျှမ်းစာမတတ်တော့မည်ကို စိုးရိမ်နေကြောင်း လားရှိုးမြို့ သျှမ်းစာပေ နှင့် ယဉ်ကျေးမှု ဥက္ကဌက ပြောသည်။
” အရင်ကတော့ ကျောင်းတွေမှာ သျှမ်းစာတွေ သင်ပေးတာတော့ရှိတယ်လေ။ သျှမ်းစာတွေ သင်ပေးမှုနည်း လာတော့ ကျနော်တို့ လူငယ်တွေ ကိုယ့်ဘာသာ စာကိုမတက်မှာတော့ စိုးရိမ်တယ်။ ဒါမဲ့လည်း သျှမ်းကျောင်းတွေ နဲ့ ရွာတွေဘက်မှာတော့ သင်ပေးတာတော့ ရှိသေးတယ်။ သွားသင်စေချင်တယ်” ဟု ၎င်းက ပြောသည်။
လက်ရှိတွင်လည်း သျှမ်းစာကို ကျေးရွာများ နှင့် သျှမ်းစာပေ နှင့် ယဉ်ကျေးမှုကျောင်းများထဲတွင် သင်ကြားပေး နေလျက်ရှိကြောင်း သိရသည်။
ပြီးခဲ့သည့် ၂၀၂၂ – ၂၀၂၃ ခုနှစ် ပညာသင်နှစ်တွင်လည်း မိုင်းရယ်မြို့နယ် ဟိုယကျေးရွာရှိ အခြေခံ ပညာစာသင်ကျောင်းများမှ သျှမ်းစာသင်ဆရာ/ဆရာမများ အားလုံး လစာမရရှိကြောင်း သတင်းသိရသည်။
