သျှမ်းပြည် တောင်ကြီးခရိုင် တောင်ကြီးမြို့တွင် ယခုရက်ပိုင်းမှာ လျှပ်စစ်ဝါယာကြိုးများ မကြာခဏ ခိုးခံနေရကြောင်း စုံစမ်း သိရှိရသည်။
ပြီးခဲ့သည့် ဇန်နဝါရီ ၁၃ ရက်နေ့မှစပြီး ယနေ့အထိ တောင်ကြီးမြို့ အနောက်မြို့ပတ်လမ်း ကျောင်းကြီးစု ရပ်ကွက်အတွင်းရှိသည့် ဂေါက်ကလပ်ကွင်း၏ အနောက်မြောက်ဘက်တောင့်မှ လျှပ်စစ်မီး (Transformer) ဘောက်တစ်ခုမှ ဝါယာကြိုးများ ခိုးခံနေရကြောင်း တောင်ကြီးမြို့ဒေသခံ တစ်ဦးက ပြောသည်။
“ ကျနော်က email ဝင်စရာရှိလို့ စောင့်နေချိန်မှာ ည ၁၂ နာရီ ၁၅ မိနစ်လောက်မှာ မီးက ဖျက်ခနဲ ပျက်သွားတယ်။ ကိုယ်ကတော့ အရင်အတိုင်း မီးပျက်တယ်လို့ပဲ တွက်လိုက်တာ။ မနက်ရောက်တော့ မီးအားက ၄၀ လောက်ပဲ ရှိတယ်။ အဲ့ချိန် စုံစမ်းကြည့်မှ (Transformer) ထဲက ကေဘယ်ကြိုးတွေ ခိုးခံရတယ် “ လို့ ၎င်းက ပြောသည်။
ခိုးခံရသည့် လျှပ်စစ်ဝါယာကြိုး (ကေဘယ်ကြိုး) နှစ်ကြိုးသည် တစ်ကြိုးလျှင် ၁၅ ပေခန့်ရှည်ပြီး ကျပ်ငွေ (၈) သိန်း ဈေးနှုန်းရှိကြောင်းလည်း သိရသည်။
အဆိုပါ လျှပ်စစ်ဝါယာကြိုးများ အခိုးခံရပြီးနောက် တောင်ကြီးမြို့နယ် ( EPC) ရုံးမှ ပြန်လည်ပြုပြင်ရေးကို ၎င်းရပ်ကွက်အတွင်း နေထိုင်သည့် ဒေသခံများထံ တစ်အိမ်လျှင် ကျပ်ငွေ (၃,၀၀၀) ကောက်ခံနေကြောင်း သိရသည်။
“ လျှပ်စစ်ကြိုး တစ်ခုကို (၈) သိန်းတန်တယ်။ နှစ်ခုဆိုတော့ (၁၆) သိန်းရှိတယ်လေ၊ အဲ့ဒါကို EPC ကလာပြင်ပေးမယ်ပေါ့။ ရပ်ကွက်က (၈) သိန်း စိုက်ရမယ်ဆိုပြီး တစ်အိမ်ကို ကျပ်ငွေ (၃,၀၀၀) ကောက်တာ။ ရပ်ကွက်ကလူနဲ့ ဘာမှမဆိုင်တော့ ပြန်ရစ်ထည့်လိုက်တယ် “ ဟု ၎င်းကပြောသည်။
အလားတူ ပြီးခဲ့သည့် ဇန်နဝါရီလ (ဒုတိယအပတ်) တွင်လည်း တောင်ကြီးမြို့ မြေဖြူရပ်ကွက်မှာ ဓာတ်တိုင်ပေါ် က လျှပ်စစ်ဝါယာကြိုး တချို့ခိုးခံနေရကြောင်း သိရသည်။
အဆိုပါ လျှပ်စစ်ဝါယာကြိုးများ ခိုးခံရမှုနှင့် ပတ်သက်ပြီး တောင်ကြီးမြို့နယ် သက်ဆိုင်ရာ ရဲတပ်ဖွဲ့များက သူခိုးကို လိုက်လံဖမ်းဆီးဆောင်ရွက်ပေးခြင်း မရှိကြောင်း ဒေသခံများ၏ ပြောချက်အရ သိရသည်။
စစ်တပ်က အာဏာသိမ်းပြီးနောက်ပိုင်း သျှမ်းပြည်တွင် တရားဥပဒေစိုးမိုးမှုမှာ မရှိတော့သလို ဆိုးကျိုးလုယက်၊ သူခိုး၊ ဓားပြ များမှာလည်း နေစဉ််နှင့်အမျှ ပေါများလာနေပြီး ပြည်သူများ၏ လုံခြုံရေးမှာလည်း ပိုဆိုးဝါးလာကြောင်း သိရသည်။
Leave a Comments