သျှမ်းပြည် တောင်ကြီးခရိုင်အတွင်းရှိ မြို့နှင့်ကျေးလက်ဒေသ ကျေးရွာများတွင် စစ်ကောင်စီမှ လူဦးရေစာရင်းကောက်ယူရာတွင် အိမ်ထောင်စုစာရင်းထဲမှ လူဦးရေ လျော့နေပါက စစ်ဆေးမေးမြန်းမှုများရှိကြောင်း သတင်းရရှိသည်။
ပြီးခဲ့သည့် ဇန်နဝါရီ (ဒုတိယအပတ်)တွင် စတင်ပြီး ပင်လောင်းမြို့တွင် လူဦးရေ စာရင်းကောက်ယူရာတွင် အိမ်ထောင်စုထဲမှ လူဦးရေ လျော့နည်းမှု ရှိပါက PDF နှင့် CDM ပြုလုပ်နေခြင်းရှိ၊ မရှိ မေးမြန်းမှုပြုလုပ်နေကြောင်း ပင်လောင်းဒေသခံ အမျိုးသားတစ်ဦးက သျှမ်းသံတော်ဆင့် ကိုပြောသည်။
“လူဦးရေ စာရင်းလာကောက်တဲ့အချိန်တုန်းက အိမ်မှာဘယ်သူရှိလဲ၊ လူအပိုရှိလား မေးတယ်ဗျ။ အိမ်ထောင်စုထဲ နာမည်ရှိပြီး လူကပျောက်နေရင် သူဘယ်သွားလဲ၊ ခရီးထွက်နေသလား၊ ဘယ်နေရာမှာနေလဲ။ ဘာညာမေး တယ်ဗျ” ဟု ၎င်းက ပြောသည်။
စစ်ကောင်စီသည် အဓိကအားဖြင့် ပြည်သူ့ကာကွယ်ရေးတပ်ဖွဲ့ဝင် PDF ၏ လူဦးရေစာရင်းနှင့် ဝရမ်းပြေး နေသော အကြမ်းမဖက် CDM ပြုလုပ်ထားသူ လူဦးရေစာရင်းကို စာရင်းအတိအကျ သိရှိလိုချင်သဖြင့် စစ်ဆေးမေးမြန်းနေကြောင်းလည်း ဖြစ်သည်ဟု သိရသည်။
အလားတူ တောင်ကြီးမြို့တွင် စစ်ကောင်စီ သန်းခေါင်စာရင်း လိုက်လံကောက်ခံခြင်း မရှိသေးသော်လည်း အိမ်ထောင်စု စာရင်းထဲရှိ လူဦးရေ ပျောက်ဆုံးခြင်း အကြောင်းအရင်းကို လိုက်လံစစ်ဆေးမည်ဟုလည်း သတင်းထွက် ပေါ်နေကြောင်း သိရသည်။
“ စစ်ကောင်စီ လူဦးရေ စာရင်းကောက်နေတာဆိုတာ ကြားနေရတယ်၊ လာကောက်တာတော့ မရှိသေးဘူး။ ကျနော် သိထား၊ ကြားထားတာက လူဦးရေစာရင်း ကောက်တဲ့နေရာမှာ ကျနော်တို့ အိမ်ထောင်စုစာရင်း လူဦးရေ ၅ ယောက်ရှိတယ်ဆိုရင် သူတို့လာကောက်တဲ့ အခါမှာလည်း အဲ့ ၅ ယောက်လုံး ရှိနေရမယ်။ ဒီထဲ ကလေး ၂ ယောက်က အိမ်မှာမနေဘူး၊ ပျောက်နေတယ်ဆိုရင် ဒီကလေးတွေက PDF တွေလားဆိုပြီး သိချင်တာ “ ဟု တောင်ကြီးမြို့ ဒေသခံ အသက် ၄၀ နှစ်ကျော် အမျိုးသားတစ်ဦးက ပြောသည်။
လာမည့် သြဂုတ်လတွင် စစ်ကောင်စီ ကျင်းပမည့် ရွေးကောက်ပွဲအတွက် တစ်အိမ်တက် တစ်အိမ်ဆင်း လူဦးရေ စာရင်းလိုက်လံကောက်ခံနေခြင်းအတွက် ယခု (ဇန်နဝါရီ ၉) ရက်က စစ်ကောင်စီ တရားဝင်ထုတ်ပြန်ထားခြင်း ဖြစ်သည်။
သျှမ်းပြည်တွင် မူဆယ်၊ တာချီလိတ်၊ ကျိုင်းတုံ၊ လွိုင်လင်၊ ဆီဆိုင်နှင့် ပင်လောင်းတို့မှာ ရွေးကောက်ပွဲအတွက် စစ်ကောင်စီမှ လူဦးရေ စာရင်းကို လိုက်လံကောက်ခံခဲ့ပြီး ဖြစ်ကြောင်းလည်း သိရသည်။
