သျှမ်းပြည် မူဆယ်ခရိုင် မူဆယ်မြို့နယ်ရှိ အမှတ် (၁) မြို့မဈေးတွင် ဖွင့်လှစ်ထားသည့် ရွှေဆိုင်တစ်ဆိုင်မှ ရွှေဆွဲကြိုး များကို သက်ကြီး အမျိုးသမီး နှစ်ဦးမှ လုယက်ယူဆောင်သွားကြောင်း သိရသည်။
ယနေ့ (ဇန်နဝါရီ ၁၇ ) ရက် နံနက် ၁၀ နာရီဝန်းကျင် မူဆယ်မြို့ အမှတ် (၁) မြို့မဈေး အပေါ်ထပ်တွင် ဖွင့်လှစ်ထားသည့် “လောဝ်ခမ်း” ရွှေဆိုင်သို့ ရွှေဝယ်သယောင် ဟန်ဆောင်လာသည့် သက်ကြီးအမျိုးသမီး နှစ်ဦးသည် ရွှေဆွဲကြိုး ၈ ကုံးခန့် လုယက်ယူဆောင်သွားကြောင်း ဆိုင်ရှင်နှင့် နီးစပ်သည့် အမျိုးသား တစ်ဦးက သျှမ်းသံတော်ဆင့်ကို ပြောသည်။
“အမျိုးသမီး ၂ ယောက်က ရွှေဝယ်ဖို့ လာကြည့်သလိုလို နဲ့ ဟိုအကုံးပြ ဒီအကုံးပြဆိုပြီး ပစ္စည်းတွေကို ထုတ်ပြ ခိုင်းတယ်၊ နောက်တော့ ရွှေဆွဲကြိုး ၁၀ ကုံးလောက်ကို ဆွဲလုပြီး ထွက်ပြေးသွားတော့တာပဲ၊ နောက်ကပြေး လိုက်ပေမယ့် မမှီ လိုက်ဘူး၊ ဆုံးရှုံးမှု တန်ဖိုးသည် ကျပ်သိန်း ၃၀၀ လောက်ရှိတယ်” ဟု အမည်မဖော် လိုသူ နီးစပ်သည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ ရွှေများလုယက်ယူဆောင်သွားသည့် အမျိုးသမီး ၂ ဦး သည် အနွေးဦးထုပ်၊ အနွေးအင်္ကျီ နှင့် မာဖလာ ပတ်ထားပြီး ဗမာစကားသာ ပြောဆိုကြပြီး အသက် ၅၀ ဝန်းကျင်ရှိကြောင်း ဆိုင်ရှင် နှင့် နီးစပ်သူက ဆက်ပြော သည်။
ပြီးခဲ့သည့် ၂၀၂၂ ခုနှစ် မေလ ၁၀ ရက် မွန်းလွဲပိုင်း ၃ နာရီဝန်းကျင်တွင်လည်း မူဆယ်မြို့ ခရစ်ယာန်ရပ်ကွက်အတွင်းရှိ ဖုန်းအဟောင်းရောင်းဝယ်ရေး ပြုလုပ်သည့် ဆိုင်တစ်ဆိုင် ကို အမည်မသိ မျက်နှာဖုံးစွပ် အမျိုးသား ၆ ယောက်က ကားတစ်စီးဖြင့် ရောက်လာပြီး ဓားပြလာတိုက်သွားသည့်အတွက် ငွေကျပ်သိန်း ၁၀၀၀ ထက်မနည်း ဆုံးရှုံးသွားသည့် ဖြစ်စဥ် ရှိခဲ့သည်။
မူဆယ်မြို့သည် စစ်တပ် အာဏာသိမ်းပြီးနောက်ပိုင်း နိုင်ငံရေး နှင့် စီးပွားရေး ကျဆင်းလာမှုကြောင့် သူခိုး၊ ဓားပြ ပေါများလာသော်လည်း သက်ဆိုင်ရာ တာဝန်ရှိသူများက အရေးယူ ဆောင်ရွက်ပေးမှု မရှိပေ။
