မြန်မာ – ထိုင်း နယ်စပ် တာချီလိတ် – မယ်ဆိုင် အမှတ် (၁) တံတားကို ပြန်ဖွင့်ရန်အတွက် ပြည်သူများက မျှော်လင့်နေကြောင်း စုံစမ်းသိရှိရသည်။

ဇန်နဝါရီ ၁၂ ရက်တွင် မြဝတီ – မဲဆောက် အမှတ် (၁) ချစ်ကြည်ရေး တံတား ကို ပြန်လည်ဖွင့်လှစ်ခဲ့သည်။

ထို့ကြောင့် တာချီလိတ် – မယ်ဆိုင် အမှတ် (၁) တံတားကို ပြန်ဖွင့်လှစ်ပေးရန် တာချီလိတ်ပြည်သူများက မျှော်လင့်နေကြသည်။

လွန်ခဲ့သည့် ဇန်နဝါရီ ၁၆ ရက်တွင်လည်း ထိုင်းနိုင်ငံ မယ်ဆိုင်ဘက်ခြမ်းတွင် တံတားပြန်ဖွင့်ရန်အတွက် သန့်ရှင်းရေး ပြုလုပ်နေကြောင်း၊ တရုတ်နှစ်သစ်ကူးမတိုင်ခင် ပြန်ဖွင့်နိုင်ရန်လည်း ထိုင်းဘက်က ပြင်ဆင်နေသည်ဟုလည်း ထိုင်းသတင်းဌာန ရေးသားချက်အရ သိရသည်။

“ ဖွင့်တော့မယ်လို့တော့ ကြားတယ်။ မနေ့ကလည်း သန့်ရှင်းရေးတွေ သွားလုပ်နေတာလည်းရှိတယ်။ ခရိုင်အုပ်ချုပ်ရေးမှူးတွေလည်း စည်းဝေးလုပ်နေတယ်။ ဘယ်တော့ဖွင့်မလဲတော့ မသိသေးဘူး။ ဖွင့်ဖို့တော့ မျှော်လင့်တာပေါ့။ ဖွင့်လို့ရှိရင် အသွားလာတွေ လွယ်ကူမယ်” ဟု တာချီလိတ်မြို့ ဒေသခံ အမျိုးသားတစ်ဦးက ပြောသည်။

ထိုင်းနိုင်ငံဘက်မှ ဇန်နဝါရီ ၂၂ ရက်နေ့တွင် ဖွင့်လှစ်ရန်အတွက် ကြောညာထားသော်လည်း မြန်မာဘက်မှ တစ်စုံတစ်ရာမှ တုံ့ပြန်ခြင်း မရှိပေ။

သို့သော် တံတားကို ဖွင့်လှစ်ရန်အတွက် နေပြည်တော်မှ ညွှန့်ကြားစာ ပို့လာခဲ့ကြောင်း ၊ ဖွင့်လှစ်ရမည့် နေရပ်ကိုမပါလာသည့်အတွက်ကြောင့် ပြည်သူများက ဖွင့်လှစ်မည့်အကြောင်းကို ယုံကြည်မှုမရှိကြောင်း ပြောသည်။

“ဖွင့်ဖို့တော့ နေပြည်တော်ကနေ ညွှန်ကြားစာပို့လာတယ်တဲ့။ ဒီလရဲ့ နောက်ဆုံးပတ်တွေမှာပဲ ဖွင့်သွားမယ်တဲ့။ အသေးစိတ်တော့ ဘယ်နေ့ဖွင့်မလဲ မသိသေးဘူး။ တံတားကို ဖွင့်မဲ့ ကိစ္စကလည်း ကျနော်တို့ အရမ်းကြီး မယုံရဲသေးဘူး။ တံခါးဖွင့်ပြီဆိုမှ ဖွင့်ပြီလို့ပဲ ယုံလို့ရမှာ။ အခုတော့ ဖွင့်မယ်မဖွင့်ဘူးဆို ယုံလို့မရသေးဘူး” ဟု တာချီလိတ်မြို့ တက်ကြွလှုပ်ရှားသူက ပြောသည်။

တာချီလိတ် – မယ်ဆိုင် ချစ်ကြည်ရေးအမှတ် (၁) တံခါးကို မည်သည့်အချိန်တွင် ဖွင့်လှစ်သွားမည်ကို တာချီလိတ်ခရိုင် အုပ်ချုပ်ရေးမှူး ဦးမြင့်နိုင်ကို သျှမ်းသံတော်ဆင့်မှ ဆက်သွယ်ခဲ့သော်လည်း “ အစည်းဝေး လုပ်နေကြောင်း “ ဟု ဖြေဆိုခဲ့သည်။

အလားတူ တံတားဖွင့်လှစ်ဖို့ရန်အတွက် တာချီလိတ်မဏ္ဍိုင် တွင်လည်း ဖွင့်လှစ်မည့် ရက်အတိအကျကို ဖော်ပြထားခြင်း မရှိပေ။

မြန်မာ – ထိုင်း နယ်စပ် တာချီလိတ် – မယ်ဆိုင် ချစ်ကြည်ရေး တံတားအမှတ် (၁) ကို ကိုဗစ် – ၁၉ ကြောင့် ၃ နှစ်ကြာ ပိတ်ထားခဲ့သည်။