သျှမ်းပြည် လားရှိုးခရိုင် သိန္နီမြို့နယ်တွင် အပစ်အခတ် တစ်နှစ်ရပ်မည်ဟု ကြေညာထားသည့် စစ်ကောင်စီ တပ်ဖွဲ့ နှင့် ကိုးကန့်တပ်ဖွဲ့တို့က တိုက်ပွဲဖြစ်ပွားခဲ့ပြီး စစ်ကောင်စီဘက် အကျအဆုံး များခဲ့ကြောင်း သတင်းသိရသည်။
ပြီးခဲ့သည့် ဇန်နဝါရီလ ၁၄ ရက် နံနက်ပိုင်း ၁၁ နာရီဝန်းကျင်တွင် သိန္နီမြို့နယ် နမ့်စလပ်ကျေးရွာအုပ်စု အနီး စခန်းတည်ထားသည့် ကိုးကန့်တပ် (MNDAA) တပ်စခန်းနေရာကို အာဏသိမ်း စစ်ကောင်စီတို့က စတင်ထိုးစစ်ဆင်တိုက်ခဲ့ကြောင်း ကိုးကန့်တပ် နှင့် နီးစပ်သူ အမျိုးသားတစ်ဦးက သျှမ်းသံတော်ဆင့်ကို ပြောသည်။
“MNDAA ရဲ့ တပ်စခန်း တည်နေရာကို စစ်ကောင်စီဘက်က ထိုးစစ်ဆင် တိုက်ခိုက်ခဲ့တာ၊ တိုက်ပွဲက နေ့လည် ၁ နာရီခွဲ အထိ ကြာတယ်၊ စစ်ကောင်စီဘက်ကပဲ တပ်ပြန်ဆုတ်သွားပြီးတော့ သူတို့ ကားတွေက တိုက်ပွဲဖြစ်တဲ့ နေရာကို အခေါက်ပေါင်းများစွာ လာသွားတယ်၊ သေတဲ့သူနဲ့ ဒဏ်ရာရတဲ့သူတွေကို လာသယ်တယ် လို့သိရတယ်” ဟု ကိုးကန့်တပ် နှင့် နီးစပ်သူ အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ ထိတွေ့တိုက်ပွဲတွင် စစ်ကောင်စီဘက်မှ ထိခိုက်ကျဆုံးမှု အရေအတွက်များကို ကိုးကန့်တပ်ဖွဲ့ MNDAA မှ အတိအကျ မသိရသေးကြောင်းလည်း ၎င်းကဆက်ပြောသည်။
ကိုးကန့်သတင်းဌာန ဖြစ်သည့် The Kokang သတင်းဌာန၏ ဖော်ပြချက်အရ ယင်းထိတွေ့တိုက်ပွဲကြောင့် စစ်ကောင်စီ၏ တပ်သား ၃၀ ကျော် သေဆုံး ဒဏ်ရာရရှိခဲ့ကြောင်း သတင်းထုတ်ပြန်ထားသည်။
တိုက်ပွဲဖြစ်ပွားပြီး နောက်တစ်ရက် (ဇန်နဝါရီလ ၁၅ ရက်) တွင် အဆိုပါ တိုက်ပွဲဖြစ်ပွားရာအနီးသို့ စစ်ကောင်စီ တပ်ဖွဲ့ဘက်မှ စစ်အင်အားများထပ်မံ ဖြည့်တင်းလာသည့်အတွက် ကိုးကန့်တပ်ဖွဲ့ MNDAA မှ မြေပြင် ကွင်းဆင်း စစ်ဆေးမှုများ မပြုလုပ်ရသေးကြောင်း အထက်ပါ ပုဂ္ဂိုလ်က ဆက်ပြောသည်။
“အခု အချိန်ထိတော့ နှစ်ဘက် စစ်ရေး တင်းမာမှုက ရှိနေတုန်းပဲ၊ စစ်ကောင်စီဘက်ကလည်း စစ်ကားတွေနဲ့ စစ်အင်အား ဖြည့်နေတယ်၊ ဒီတိုက်ပွဲကြောင့် ပြည်သူတွေ ထွက်ပြေးတိမ်းရှောင်ရတာမျိုးတော့ မရှိဘူး” ဟု ကိုးကန့် နှင့် နီးစပ်သူ အမျိုးသားကဆက်ပြောသည်။
ထို့အပြင် စစ်ကောင်စီဘက်မှ ၂၀၂၃ ခုနှစ် ဇန်နဝါရီ ၁ ရက်ကနေ ဒီဇင်ဘာ ၃၁ ရက်အထိ တနှစ်လုံး အပစ်ရပ် ကြေညာချက် ထုတ်အပြီး ယခုလို တိုက်ပွဲဖြစ်ပွားတာနဲ့ ပတ်သက်ပြီး ကိုးကန့်တပ်ဖွဲ့အနေဖြင့် ထိုထုတ်ပြန်ချက်သည် ဟာသတစ်ခုလို ဖြစ်နေကြောင်းလည်း ၎င်းက ဆက်ပြောသည်။
“စစ်ကောင်စီက တနှစ်လုံး အပစ်ရပ်မယ်လို့လည်းပြောတယ်၊ အခုက ကျနော်တို့ကို ထိုးစစ်ဆင်လာတယ်၊ ဒါကြောင့် သူတို့ရဲ့ ထုတ်ပြန်ချက်က ဟာသလိုဖြစ်နေတယ်” ဟု သျှမ်းသံတော်ဆင့်ကို ပြောသည်။
စစ်ကောင်စီတပ်ဖွဲ့သည် ငြိမ်းချမ်းရေး ဆွေးနွေးမှု လုပ်ငန်းစဥ်တွေကို ဆက်လက် အကောင်အထည်ဖော် ဆောင်ရွက်နိုင်ရန်အတွက် ၁ နှစ်တာကာလ အပစ်ရပ်ကြေညာကြောင်း ထုတ်ပြန်ပြောဆိုထားသော်လည်း တကယ်တမ်း မြေပြင်တွင် တိုက်ပွဲများ ရပ်တန့်သွားသည်ကို မတွေ့ရသေးပေ။
