သျှမ်းပြည် တောင်ကြီးခရိုင် ဆီဆိုင်မြို့နယ် ပုံးအင်းဒေသတွင် နှစ်စဉ်နှစ်တိုင်း စပါးရေလွှမ်းမိုးခံရခြင်းကြောင့် တောင်သူများသည် အရှုံးပေါ်ခဲ့ရာမှ ပဲပုတ်စေ့ကို စမ်းသပ် စိုက်ပျိုးလာနေကြောင်း သိရှိရသည်။

ပုံးအင်းဒေသ တောင်ဘက်ခြမ်း အမြင့်ပိုင်းဒေသဖြစ်သည့် နောင်စန့်ရွာတွင် ပြီးခဲ့သည့် ၂၀၂၂ ခုနှစ် သြဂုတ်လပိုင်းက ရေကြီးရေလျှံမှုဖြစ်ပွားကာ လယ်ယာစပါး ဧကပေါင်း (၂) သောင်းကျော် ရေလွှမ်းမိုးခံရပြီး ပျက်စီးဆုံးရှုံးခဲ့ရသည်။

ထို့ကြောင့် ယခု ၂၀၂၃ ခုနှစ် (ဇန်နဝါရီလ) စပြီး ပုံးအင်းဒေသ တောင်ဘက်ခြမ်းရှိ နောင်စန့်ရွာမှ တောင်သူများ တချို့သည် လယ်ယာစပါး စိုက်ခင်းအစား ပဲပုတ်စေ့များကို အစားထိုး စမ်းသပ်စိုက်ပျိုးလာနေကြောင်း နောင်စန့်ကျေးရွာ တောင်သူအမျိုးသမီး ဒေါ်နန်းဆိုင်ဟိန်းက သျှမ်းသံတော်ဆင့်ကို ပြောသည်။

“ ကျမတို့က ပဲပုတ်ကို စမ်းစိုက်ကြည့်တာ အခုနှစ်နဲ့ဆို ၃ နှစ်ရှိပြီ။ စစိုက်တဲ့နှစ်ကတော့ အနည်းအကျဉ်း လောက်ဘဲ စိုက်ပျိုးတယ်။ မနှစ်ကတော့ ထပ်ပြီး စမ်းစိုက်ကြည့်တာ ပဲပုတ်စေ့ခြောက် တစ်ပိဿကို ၂,၀၀၀ ကျပ် ဈေးရတယ်။ မနှစ်က ပဲပုတ်ဈေးကောင်းရလို့၊ ဒီနှစ်လည်း ထပ်စိုက်ကြည့်တာ ဖြစ်တယ် “ ဟု ဒေါ်နန်းဆိုင်ဟိန်းက ပြောပါသည်။

ပုံးအင်းဒေသမှာ အဓိကအားဖြင့် လယ်ယာစပါးကို အများဆုံး စိုက်ပျိုးလေ့ရှိသော်လည်း ပြီးခဲ့သည့် ၂၀၂၂ ခုနှစ် အတွင်းက စပါးရေလွှမ်းမိုးခံရခြင်းဖြင့် တောင်သူများ အရှုံးပေါ်ခဲ့ရသည့်အတွက် ယခု ၂၀၂၃ ခုနှစ်မှာ ပဲပုတ်စေ့ကို စမ်းသပ် စိုက်ပျိုးလာကြောင်း သိရသည်။

ပဲပုတ်စေ့ကို စမ်းသပ်စိုက်ပျိုးလာသည့် ပုံးအင်းဒေသ ကျေးရွာများမှာ နောင်စန့်ရွာ၊ နမ့်ကွတ်ရွာ၊ ဖိုင်လင်း နှင့် ဖိုင်ကွမ်း ရွာတို့ဖြစ်ကြပြီး ၎င်းကျေးရွာများသည် အမြင့်ပိုင်းဒေသက ကျေးရွာများဖြစ်ကြောင်း သိရသည်။

ယခင်နှစ်တွင် ပဲပုတ်စေ့ခြောက် တစ်ပိဿကို ၂,၀၀၀ ကျပ်သာ ဈေးရရှိသော်လည်း ယခုနှစ်မှာ ပဲပုတ်စေ့ခြောက် တစ်ပိဿလျှင် ၅,၀၀၀ ကျပ်ထိ ဈေးမြင့်တက်နေတယ်လို့ သတင်းထွက်ပေါ်နေသောကြောင့် တောင်သူများသည် ပဲပုတ်ဈေးကွက်မှာ စျေးကောင်းရရှိရန် မျှော်လင့်နေရသည်ဟု ဆိုသည်။

“ ကျမတို့ ရွာမှာတော့ ပဲပုတ်ကို စမ်းသပ်ပြီး စိုက်ပျိုးတဲ့သူတွေ သိပ်မရှိသေးဘူး။ ရှိရင်လည်း ၅ ယောက်လောက်ပေါ့နော်။ ဒီနှစ် ပဲပုတ်စေ့ခြောက် တစ်ပိဿကို ၅,၀၀၀ ကျပ်လောက် ဈေးရှိတယ်လို့တော့ ကြားထားတယ်။ တကယ်လို့ ပဲပုတ်ဈေးကောင်း ရလာရင်တော့ ပဲပုတ်စိုက်မယ့် တောင်သူတွေတော့ များလာမယ်။ ဒီနှစ် ပဲပုတ်ဈေးကွက်မှာ ဈေးကောင်းကောင်းရဖို့ဘဲ မျှော်လင့်နေတယ် “ ဟု ၎င်း အမျိုးသမီးတစ်ဦးက ပြောသည်။

သျှမ်းပြည် ဒေသခံအများစုသည် ပုံးအင်းဒေသထွက် ဆန်၊ စပါး များကို အားထားပြီး ပုံးအင်းစပါး ရေလွှမ်းမိုးခြင်းကြောင့် ပျက်စီးဆုံးရှုံးသွားပြီးနောက်ပိုင်း ဆန်ဈေးအဆမတန် မြင့်တက်လာမည်ကို ပြည်သူများက စိုးရိမ်နေလျက် ရှိသည်။