Thursday, May 30, 2024

မိုင်းကိုင်မြို့နယ် စစ်ကောင်စီ စစ်ဆေးရေးဂိတ်တွင် အဆမတန် ပိုက်ဆံကောက်

Must read

သျှမ်းပြည် လွိုင်လင်ခရိုင် မိုင်းကိုင်မြို့နယ် တုံလောကျေးရွာအုပ်စုထဲတွင် စစ်ကောင်စီမှ ဖွင့်လှစ်ထားသည့် စစ်ဆေးရေးဂိတ် ဖြတ်သန်းသွားသည့် ကားသမားများထံ အဆမတန် ငွေကောက်ခံနေကြောင်း သတင်းရရှိသည်။

စစ်ကောင်စီမှ ငွေကြေးကောက်ခံစဥ်

ပြီးခဲ့သည့် ဒီဇင်ဘာလမှစပြီး မိုင်းကိုင်မြို့နယ် တုံလောကျေးရွာထဲတွင် စစ်ကောင်စီက စစ်ဆေးရေးဂိတ်ကို ဖွင့်လာပြီး ကားတစ်စီးလျှင် ကျပ်ငွေ ၅ သောင်းမှ ကျပ်ငွေ တစ်သိန်းထိ ကောက်ခံနေကြောင်း ကားသမားများ အသိုင်းအဝန်းထံသိရသည်။

“ ဒီဂိတ်က ဖွင့်တာ တလ နီးပါးရှိပြီ။ သူတို့ လာဖွင့်ကတည်းက ကားတစ်စီးကို ကျပ် ၅ သောင်း၊ ကျပ်ငွေ တစ်သိန်းထိ ပေးရတယ်။ ကား ဆိုတာနဲ့တောင်းတော့တာပဲ။ ကားတောင် မစီးချင်တော့ဘူး” ဟု ကားသမားတစ်ဦး က သျှမ်းသံတော်ဆင့် ကိုပြောသည်။

အဆိုပါ စစ်ဆေးဂိတ်သည် တောင်ကြီး – လားရှိုး သွားသည့် ကားတိုင်းဖြတ်သန်းသွားရသည့် နေရာဖြစ်ကြောင်း သိရသည်။

ထိုဒေသအတွင်း နေထိုင်သည့် ပြည်သူများသည် မိုင်ကိုင်မြို့ရှိ ပြည်သူ့ဆေးရုံသို့ သွားချိန်တွင်လည်း ဂိတ်ကိုဖြတ်သန်း ရသဖြင့် စစ်ကောင်စီက ငွေကောက်ခံမှုပြုလုပ်ကြောင်း၊ ဘုရားဖူးခရီးစဥ်သွားလျှင်လည်း ဂိတ်ခပေးဆောင်ရသည့်အဆင့်ဟု နယ်မြေခံ ပြည်သူများက ပြောသည်။

“ ဟိုနား ဒီနားသွားရင်လည်း ဂိတ်တစ်ခါဖြတ်ရင် တစ်ခါပေးရတယ်။ ဆေးရုံသွားလည်း ပေးရတယ်။ ဘုရားဖူးသွားလည်း ပေးရတယ်။ မိုင်းဖုန်းဆရာတော် မွေးနေ့ သွားတဲ့ကားတွေကိုလည်း ပိုက်ဆံတောင်းတာ အများကြီးပဲ။ တစ်ကားကို ၁ သိန်း ၂ သောင်းလောက်အထိ ကောက်ယူကြတယ်။ ဖြတ်တိုင်းပေးရတာတော့ အဆင်မပြေဘူး” ဟု ဒေသခံ အမျိုးသားတစ်ဦး ကဆိုသည်။

စစ်အာဏာသိမ်းပြီးနောက်ပိုင်း သျှမ်းပြည်တဝှမ်းတွင် စစ်ကောင်စီဂိတ်များ ပိုပြီးလာရောက်ဖွင့်လှစ်ကာ ကားသမားပြည်သူများကို ငွေအဆမတန် ကောက်ခံမှုကြောင့် ပြည်သူများ ကားမောင်းရန် ကြောက်ရွံ့ နေကြသည်။

“ ကားမောင်းသွားဖို့တောင် ကြောက်နေကြပြီ။ ပြီးတော့ အခုဆိုရင် စီးပွားလည်းမဖြစ်ဘူး။ ကုန်ဈေးနှုန်း ကလည်း ကြီးတယ်။ အဲ့လမ်းကို သွားဖို့တောင် ကျနော်တို့ ဒေသခံတွေက ကားနဲ့ဆို သိပ်မသွားချင်တော့ဘူး” ဟု အထက်ပါ ဒေသခံ အမျိုးသားက ပြောသည်။

စစ်တပ်က အာဏာသိမ်းပြီးနောက်ပိုင်း ၂ နှစ်နီးပါးတွင် သျှမ်းပြည်အတွင်း စစ်ကောင်စီက ရှောင်သခင်ဂိတ် နှင့် စစ်ဆေးရေးဂိတ်များကို တိုးချဲ့ပြီး စစ်ဆေးနေလျက်ရှိသည်။

Leave a Comments

- Advertisement -spot_img

Latest article