“ႁူင်းႁဵၼ်းဢွၼ်ႇ ႁူင်းႁဵၼ်းဢွၼ်ႇ မီးလင်လဵဝ် မီးႁိမ်းပႃႇမႆ့ၶဵဝ်” မြန်မာလို ကတော့ “တောအုပ်ထဲက စာသင်ကျောင်းလေး” ဆိုတဲ့ သျှမ်းကဗျာ ကို တောင်ကြားမှာရှိတဲ့ ဇရပ်ဟောင်းကလေးထဲက ကလေးတွေ ရွတ်ဆိုနေတဲ့ အသံကိုကြားရပါတယ်။

အဲ့ဒီ ကဗျာ ရွတ်ဆိုသံကို ကြားလိုက်တာ နဲ့ သျှမ်းကလေးတွေ သျှမ်းစာသင်နေတယ်ဆိုတဲ့ စွဲဆောင်မှု တစ်ချက် ဝင်လာပြီး ရုပ်ရှင်ကို ကြည့်ဖို့အတွက် စိတ်အားထက်သန်ခဲ့ပါတယ်။

အဲ့ဒီ ဗီဒီယိုဟာ ၁၉၉၀ ခုနှစ်လောက်က စပြီး သျှမ်းပြည်တွင်း စစ်တပ်က ပြည်သူ လူထုတွေအပေါ် ရက်စက် ကြမ်းကြုတ်မှုကို ရိုက်ကူးထားတာကို တွေ့ရပါတယ်။

ရုပ်ရှင်ထဲက ကွက်ကွက်ကွင်းကွင်း မှတ်မိတဲ့အချက်ကတော့ လင်မယား နှစ်ဦး ရွာလမ်းအတွင်း နွားလှည်း မောင်းလာစဥ် စစ်တပ် က ဟန့်တားပြီး စစ်ဆေးမေးမြန်းကာ မိန်းကလေးကို သေနတ်နဲ့ ပစ်သတ်လိုက်ခြင်း၊ စျေးအတွင်း သေနတ်ပစ်ဖောက် ရမ်းကားခြင်း၊ ရွာသူကြီးကို ဖမ်းဆီး ခေါ်ဆောင်သွားတာတွေကို ရိုက်ကူးပုံဖော်ထားတာကို တွေ့ရပါတယ်။

“သျှမ်းအလံကို အလေးပြုပြီး ကြည့်ရတဲ့ ပထမဆုံး သျှမ်းရုပ်ရှင်ကို ရိုက်ကူး ပုံဖော်ထားသူက ကျနော် ဖြစ်လိမ့်မယ်လို့ တခါမှ အိမ်မက်တောင် မမက်ဖူးခဲ့ပါဘူးဗျ” လို့ သျှမ်းရုပ်ရှင် ဖန်တီးရှင်က သူ့ရဲ့ လူမှုကွန်ရက် စာမျက်မှာ ရေးသားထားတာ တွေ့ရပါတယ်။

The Teacher & The School နာမည်ရှိတဲ့ ရုပ်ရှင် ဇာတ်လမ်းတွဲ ဖြစ်ဖို့အတွက် ကျောင်းသားတွေက ကိုယ်တိုင် ဖန်တီးရိုက်ကူးထားတဲ့ ရုပ်ရှင်ဖြစ်ပါတယ်။

အဲ့ဒီ ရုပ်ရှင်ကို ရိုက်ကူးတာကတော့ သျှမ်းလူငယ်ဒါရိုက်တာ စိုင်းထျန်ခေးက ဦးဆောင်ပြီးရိုက်ကူးခဲ့ပါတယ်။

“ကျနော်တို့ အချိန် (၄) လလောက် ယူပြီး စာတွေ့ လက်တွေ့ သင်ကြားပြီးတော့ နောက်ဆုံးတော့ ဒီဗီဒီယို ကို ရိုက်ကူးရတာဖြစ်တယ်။ သင်တန်းသူ/ သား တွေကလည်း ဖြစ်ရပ်မှန်ကို အခြေခံပြီးတော့ ပြန်ပြီး ပုံဖော် ရိုက်ကူးထားတာပါ” လို့ ရုပ်ရှင်ဒါရိုက်တာလည်းဖြစ် သင်တန်းဆရာလည်း ဖြစ်တဲ့ စိုင်းထျန်ခေး က ပြောပါတယ်။

အဲ့ဒီ ရုပ်ရှင်ဟာ သျှမ်းဘာသာ နဲ့ ရိုက်ကူးထားပြီး အင်္ဂလိပ်ဘာသာ စာတန်းထိုးထားပြီး ရုပ်ရှင်ကြာချိန် ကတော့ မိနစ် (၃၀) လောက်သာရှိပြီး အဲ့ဒီ အချိန်တိုအတွင်းမှာ စစ်တပ်တွေရဲ့ ရက်စက်ကြမ်းကြုတ် တာတွေ ဖော်ပြထားပါတယ်။

ဒါဟာ သျှမ်းလူမျိုးတွေ ကြည့်ရှု့ဖို့အတွက်ပဲလားလို့ မေးခွန်းထုတ်စရာဖြစ်နေပါတယ်။ ဒီလို တခေတ်တခါ က သျှမ်းလူထုတွေဖြစ်ခဲ့တဲ့အရာကို တခြား တိုင်းရင်းသားတွေလည်း သိသင့်တယ်လို့ ရုပ်ရှင်ကြည့် ပရိသတ်အနေနဲ့ ပြောချင်ပါတယ်။

အဲ့ရုပ်ရှင်ဟာ ၁၉၉၀ လောက်က သျှမ်းလူမျိုးတွေအပေါ် စစ်တပ်က ရက်စက်ကြမ်းကြုတ်တဲ့ ဇာတ်ကားကို အခြေခံ ရိုက်ကူးထားတာကို တွေ့ရတယ်။ အဓိက ဇာတ်အိမ်ကတော့ အဲ့ဒီကာလမှာ စစ်တပ်က ဖြတ်လေးဖြတ် ပြုလုပ်ပြီး သျှမ်းစာသင်ခွင့် ပိတ်ပင်တာတွေကို အခြေခံ ရိုက်ကူးထားတာ တွေ့ရပါတယ်။

ရုပ်ရှင်ဟာ သျှမ်း ဆရာမ နဲ့ ဆရာဝန် တို့ရဲ့ အချစ်ဇာတ်လမ်း ပုံဖော်ရိုက်ခြင်း၊ စစ်တပ်က မြေမြှုပ်မိုင်း ထောင်ပြီး ရွာသားတွေ တောင်ယာ သွားရာမှာ မြေမြှုပ်မိုင်းနင်းမိပြီး အသက်ဆုံးရှုံးသွားရခြင်း၊ အမျိုးသမီး အပေါ် မုဒိမ်းကျင့် သတ်ဖြတ်ခြင်း စတာတွေကို ရသစုံလင်စွာ နဲ့ ပုံဖော်ရိုက်ကူးထားတာကို တွေ့ရပါတယ်။

“ဖြတ်လေးဖြတ် ကာလက ဖြစ်ပွားခဲ့တဲ့ သမိုင်းကို အခြေခံပြီး ရိုက်ကူးထားတာဖြစ်ပါတယ်။ ရိုက်ကူးချိန်ကတော့ (၁၀) ရက် နီးပါးလောက် အချိန်ယူပြီး ရိုက်ကူးရတယ်။ ရုပ်ရှင်ကြာချိန်ကတော့ မိနစ် (၃၀) လောက်ပဲရှိမယ်” လို့ စိုင်းထျန်ခေး က ပြောပါတယ်။

အဲ့ဒီ ရုပ်ရှင်ကို သျှမ်းပြည်တွင်းက လွတ်မြောက်နယ်မြေ တစ်နေရာမှာ သျှမ်းတိုင်းရင်းသားလူငယ် တွေက ရိုက်ကူးပုံဖော်ထားတာကို တွေ့ရပါတယ်။

အဲ့ဒီ ရုပ်ရှင် ဇာတ်ကားကို ဂျပန်နိုင်ငံ နဲ့ ထိုင်းနိုင်ငံ မှာ ရုံတင်ပြနိုင်ဖို့ အတွက်လည်း ကြိုးစားသွားမည် ဖြစ်ကြောင်း ရုပ်ရှင် ဒါရိုက်တာ စိုင်းထျန်ခေး က သျှမ်းသံတော်ဆင့် အင်တာဗျူးမှာ ပြောခဲ့ပါတယ်။